Siltiet mid-Domine Deus (Sinjur Alla) tal-Beatu Ġorġ Preca

Sinjur Alla – Inti hawn u jiena fik bħal ħuta fl-ilma safi.  Fik ngħix, fik niċċaqlaq, fik nistrieħ u mill-ħarsa tiegħek b’ebda mod ma nista’ ninħeba.

Sinjur Alla – Kemm ħabbejtna meta ħlaqtna fuq ix-xbieha tiegħek u kemm unurajtna!  U xi skola tajtna biex nagħrfuk!

Sinjur Alla – Inti ħlaqtna għalik u kwiet u paċi ma sibux ħlief fik.

Sinjur Alla _ Inti Alla qawwi li tissaporti l-azzjonijiet ħżiena li nagħmlulek aħna bnedmin!

Sinjur Alla – Meta naħseb fuq il-Ġustizzja tiegħek nitriegħed, iżda meta naħseb fuq il-Ħniena tiegħek nithenna.

Sinjur Alla – Tiegħek hija l-art u kull ma fiha; f’idejk il-ħajja u –mewt, inti Sid ta’ kulħadd u ta’ kollox.

Sinjur Alla – F’kollox u għal kollox għandi bżonnk u mingħajrek xejn ma niswa, xejn ma niflaħ, u xejn ma nista’.  Int ħajja ta’ ruħna u ta’ ġisimna.

Sinjur Alla – Jiena ibnek u inti Missieri.  B’dan il-ħsieb jiena ntaffi l-biża tal-qalb tiegħi, għax f’kollox nilmaħ is-serjetà tal-Manijifiċenza tremendissma tiegħek.

Sinjur Alla – Kemm jiena obbligat lejk!  Nixtieq nirringrazzjak kif jistħoqqlok.

Sinjur Alla – Nitolbok tberikni, li tindukrani u li ssalvani.

Grazzi Sinjur Alla u aħfirli Sinjur Alla.