KRISTU U L-PROVIDENZA

Tawk l-aħbar illi lil Ġwanni

Kienu qatlu dawk il-jiem

Int qbadt dgħajsa u tlaqt waħdek

F’post imwarrab u għas-skiet.

Kif il-kotra lilek lemħet

Hi xtaqet tiġi warajk

Malli semgħet fejn kont sejjer

B’ħeġġa telqu f’ġemgħat kbar.

Hekk kif int inżilt mid-dgħajsa

Sibthom b’ħeġġa jistennewk

Inti ħniena ġietek minnhom

U lill-morda tfejjaq bdejt.

Issa kien sar il-ħin sewwa

Anqas kienu indunaw

Id-dixxipli ġew jgħidulek

Illi n-nies kienu ffjakkaw.

Kienu waslu f’post imwarrab

Ikel x’jixtru ma sab ħadd

Ġesu`  wieġeb b’kalma kbira:

Tinkwetawx, ma jimpurtax.

Dak il-ħin minn nofs il-folla

Żagħżugħ ġie ħdejn il-Mulej

Qallu: dawn biss għandi jiena

Forsi bihom tirranġaw.

Ġesu` ħa l-ħobż u l-ħut f’idu

Lejn is-sema għolla għajnejh

Talab lill-għażiż Missieru

Biex ikattarhom it-tnejn.

Ġesu` niżel fl-art bilqiegħda

Hu għamlilhom is-sinjal

Biex ilkoll jinżlu madwaru

Waqt li ’l Alla radd il-ħajr.

Wara kellem lid-dixxipli

Qallhom biex jagħtu ’l kulħadd

Għax b’dak li Alla pprovda

B’xejn ma kien ser jibqa’ ħadd.

Dawk baqgħu iċċassati

B’dak li qallhom dak il-ħin

U lil min ser jibdew jagħtu

Dal ftit ħut, ħames ħobżiet.

Imm’ huma għall-kelma tiegħu

Baxxew rashom u obdew

Bdew iqassmu milli kellhom

Lil dawk li kienu jistennew.

Il-barka t’Alla kienet niżlet

Fuq il-ħut u l-ħobżiet

Il-folla kielet u xebgħet

U mlew il-qfief bil-fdalijiet.