SENA 2000

Mulej, kemm hawn fid-dinja,

Li għadhom ma għarfukx,

Jixtiequ li jitgħallmu,

L-għalliema ma waslux.

Aħna jeħtieġ nirsistu,

Biex Lilek inressquk,

Għand dawn il-bnedmin kollha,

Li għadhom ma jafukx.

Ejjew infittxu nqumu,

Mill-mod l’aħna reqdin,

Għax għad hemm ħafna x’nagħmlu,

Fl-għelieqi mħarbtin.

Fi żmien ta’ tmien snin oħra,

Tkun is-sena elfejn,

Intom kollha tafu bħali,

Din ser tingħatha lill-Mulej.

Int tajtna eżempju tajjeb,

Ta’ l-għalqa kollha żbul,

Int xorta bqajt tgħassisha,

La l-ħassada ma waslux.

Mulej, jien darba rajtek,

F’din l-għalqa kollha żbul,

Kont Int bilqiegħda f’nofsha,

Żgur ħaddiema ma dehrux.

Imm’ Inti ma kontx waħdek,

Għax fuq għolja ftit warajk,

Kien hemm l-għadu qed jistenna,

Li jsibek ftit aljenat.

Kull tant ħin jagħti titjira,

Għal fuq l-għalqa fejn kont Int,

Kellu l-ħsieb illi jniġġisha,

B’ħafna mard u bid-dnubiet.

Meta jħoss il-qawwa tiegħek,

Jerġa’ lura minn fejn ġie,

Ipoġġi mgerbeb fuq l-għolja,

Irrabjat, maħruġ tellief.

Mel’ejjew inqawwu qalbna,

Immiddu għonqna għax-xogħol,

Jekk l-għalqa naħsduha aħna,

Kristu jibqa’ fuq it-tron.