MULEJ SID IL-ĦOLQIEN

 

Għodwa waħda kont ħriġt kmieni

Dlam kien għadu kullimkien

Hemm kont Inti xorta waħda

Imxejna jien u Int flimkien.

 

Waqt li mxejna tul it-toroq

Għollejt ħarsti fis-smewwiet

Hemhekk rajt qamar u stilel

Bid-dawl tagħhom rajt it-triq.

 

Għadda l-ħin u beda jisbaħ

Għeb il-qamar, tfaċċat ix-xemx

Dak il-ħin kont qiegħda nifhem

Li aqwa minnek żgur li m’hemmx.

 

L-għasafar ħarġu minn ġol-bejta

Bdew itiru ’l hawn u ’l hinn

Sebbħu ’l-għodwa bl-għana tagħhom

Fihom kont tinstema’ Int.

 

Ħarist lejn l-uċuh tar-raba

Kollha jħaddru bil-ħaxix

Kienu mxarrbin bin-nida

Tagħhom Int kont il-ġennien.

 

Aktar  tard spiċċat il-ħemda

Li jġib miegħu ż-żernieq

In-nies qamet, bdew il-ħsejjes

Li fihom aħna mehdijin.

 

Mhux aħjar li kieku aħna

Nieqfu naqra u naħsbu ftit

Kemm ħabbna Alla tagħna

Qegħedna f’dinja kollha ġmiel.

 

Ejja f’kull m’hawn madwarna

Nibdew nifhmu lill-Ħallieq

U b’leħen wieħed ngħidu

Kemm għandna Alla ħanin.