Il-Ħadd, 5 ta’ Frar - Jum il-Ħajja

Fl-okkażjoni ta’ Jum il-Ħajja, li ser jitfakkar fil-gżejjer Maltin nhar il-Ħadd, 5 ta’ Frar 2006, s-Segretarjat Assistenza Soċjali ta’ l-Azzjoni Kattolika u l-Moviment ta’ Kana, filwaqt li jippromwovu l-valur tal-ħajja, jixtiequ jaqsmu dawn il-ħsibijiet mal-poplu Malti u Għawdxi li fil-maġġoranza kbira tiegħu jgħożż hafna l-valur tal-ħajja u d-dinjita’ tal-bniedem.

Ġo fina Alla poġġa l-istint li nħobbu l-ħajja u nagħmlu dak li nistgħu biex ngħixu dejjem aħjar. Dan narawħ jibda jitwettaq fost il-ħafna familji tagħna sa mill-bidunett tal-ħajja meta fil-familja tiġi fid-dinja tarbija li hi rigal kbir ta’ Alla.

Iżda f’dinja mgħaġġla li fiha qed ngħixu, u mingħajr ma qed nindunaw, bl-atteġġjament tagħna qed naġixxu b’mod li ninsew il-valur nobbli tal-ħajja u li kull bniedem għandu dinjità sagrosanta.

Il-ġid komuni tas-soċjetà kollha jinsab fil-bniedem. Għaldaqstant għandna d-dmir li naħdmu biex il-ħajja u d-dinjità tal-bniedem tkun rispettata sa mill-bidu tat-tnissil sal-mewt naturali.

Dan id-dmir jitlob minna responsabbiltà biex din id-dinjità tkun ukoll rispettata f’kull stadju u livell tal-ħajja, kemm dik familjari, kif ukoll tax-xogħol u tas-soċjetà tagħna.

Il-Papa Ġwann Pawlu II ħallielna ħafna tagħlim, u fost dan it-tagħlim qalilna ċar: “jekk rridu l-paċi naħdmu għall-ġustizzja; jekk rridu l-ġustizzja, naħdmu għall-ħajja; jekk rridu l-ħajja, fittxu l-verità kif ġiet rivelata minn Alla.”

Għall-grazzja t’Alla f’Malta għandna ħafna nies ġenerużi u responsabbli li jaħdmu bis-sħiħ biex iġibu ‘l quddiem is-solidarjetà umana mhux biss fost il-Maltin li jinsabu fil-bżonn, iżda anke barra mix-xtut tagħna. Tant, li minbarra s- saċerdoti u s-sorijiet, f’dawn l-aħħar snin qed imorru wkoll lajċi b’impenn sħiħ biex itejbu l-għijxien tal-bniedem biex hekk jieħu u jgawdi d-dinjità tiegħu.

Id-dinjità tal-bniedem u l-kwalità tal-ħajja għandhom jitħarsu:

(1) fil-familja, billi nkomplu naħdmu u ngħożżu l-valuri tat-talb, ta’ l-għożża tal-ħajja, tar-rispett u qadi bla interess, ta’ l-imħabba, kompassjoni, maħfra, solidarjetà u ġustizzja;

(2) fis-settur tax-xogħol, billi naħdmu għall-għaqda u l-ġustizzja;

(3) fis-soċjetà, billi lkoll naħdmu u nsaħħu l-valuri tas-solidarjetà u tal-ġustizzja flimkien ma’ dawk il-valuri li jinżergħu fil-familja. Dan nistgħu nuruh f’sewqan moderat kif ukoll f’kontroll fl-uzu ta’ l-alkohol, tat-tabakk, u b’astinenza minn drogi ta’ abbuz. Nistennew li l-Membri Parlamentari li qed jirrappreżentaw lill-poplu Malti u Għawdxi (fil-Parlament Malti u dak Ewropew) dejjem jilleġiżlaw biex isaħħu l-valur tal-familja li hi s-sisien tas-Soċjetà.

Filwaqt li fid-dinja sar ħafna progress xjentifiku, anki fil-qasam tat-tnissil tal-ħajja,

għandu wkoll ikun assigurat li “l-interessi u l-ġid tal-bniedem għandu jibqa’ jiġi qabel l-interessi tas-soċjetà u tax-xjenza”. Ara l-Konvenzjoni ta’ Oviedo, Artiklu 2. Dan ifisser li dawn għandhom dejjem ikunu għall-qadi tal-ħajja tal-bniedem anki meta din tiġi mhux kif nixtiequha aħna.

Fl-1994 il-Papa Ġwanni Pawlu II, fl-ittra tiegħu lill-familji fis-Sena tal-Familja, qalilna li “rridu nibnu ċiviltà ta’ mħabba u l-ewwel ċellola li fiha trid tinżera’ hija l-familja.” Ikompli jgħidilna l-Papa: “iżda ċiviltà ispirata minn mentalità konsumistika u kontra t-twelid m’hijiex u qatt ma tista’ tkun ċiviltà ta’ l-imħabba”, para 13.

Minħabba diversi raġunijiet, diżgrazzjatament f’pajjiżna wkoll qed titbaxxa rata tat-twelid tat-trabi. Min-naħa l-oħra, għall-grazzja t’Alla, bl-avvanzi li saru fil-mediċina u fil-mod kif qed ngħixu, il-bniedem qed jgħix ħajja itwal u aħjar.

Nappellaw lill-mezzi kollha tax-xandir biex ikomplu jsaħħu l-valuri tas-soċjeta’ Maltija, speċjalment dawk dwar id-dinjita’ tal-bniedem. Hekk, ikollna ċittadini onesti u soċjetà b’saħħitha.

30 ta’ Jannar 2006.

Ġino Axisa Fr. Louis Camilleri

President Direttur

Segretarjat Assistenza Soċjali Moviment ta’ Kana

Azzjoni Kattolika Maltija