IR-RUŻARJU

 

 

SAN DUMINKU U R-RUŻARJU

 

·         L-istorja tar-Rużarju tmur lura lejn it-tnax il-seklu u hi marbuta ma’ San Duminku.

·         Duminku Gużman twieled fis-sena 1170 ġo Kalaroga, f’Kastilja (Spanja).  Kien żmien meta l-Islam kien xtered mal-Meditterran kollu, il-knejjjes insara bdew jinbidlu f’Moskej u bosta reġjuni ta’ Spanja spiċċaw taħt il-ħakma tal-Mori.

·         Ta’ 24 sena Duminku kien ordnat saċerdot.

·         Ta’ 33 sena ġie f’kuntatt ma’ l-ereżija ta’ l-Albiġensi, li kienet qegħda tħalli ħsara kbira.  Dawn kienu jemmnu li l-adulterju, il-fornikazzjoni u s-suwiċidju huma tajba, anzi ta’ min ifaħħarhom.  La kienu jemmnu fil-ġenna u lanqas fl-infern. Għalihom ma kienet hemm l-ebda kodiċi ta’ liġi morali.

·         Duminku dar minn post għall-ieħor jippriedka kontra dan it-tagħlim żbaljat.

·         Kien fuq kollox jitlob kontinwament biex il-Mulej jagħtih arma kontra dawn l-ereżiji.

·         Kien hawn li skond l-istorja, Marija tagħtu r-Rużarju.

 

IR-RUŻARJU U L-MADONNA

 

·         Minn żmien San Duminku sal-lum il-Madonna stess diversi drabi dehret li xi persuni f’partijiet differenti tad-dinja u talbithom biex jgħidu r-Rużarju u jxerrdu d-devozjoni tiegħu mal-oħrajn.

·         Spiss inqisuh bħala talba lill-Madonna.  Iżda t-talb tagħna għandu jkun dejjem indirizzat lill-Missier, permezz ta’ l-Iben u bl-għajnuna ta’ l-Ispirtu s-Santu.  B’hekk it-talb tagħna jkollu dimensjoni Trinitarja.

·          Allura fejn tidħol il-Madonna?  Minflok inħarsu lejn ir-Rużarju u ngħiduh bħala talba lill-Marija, jkun ħafna ħjar jekk inqisuh bħala talba ma’ Marija.  Għaliex waqt ir-Rużarju hija wkoll titlob magħna kif fl-ewwel żminijiet tal-Knisja kienet titlob ma’ l-Appostli u ma’ l-ewwel insara.  Naqraw fl-Atti tal-Appostli; “U lkoll qalb waħda kienu jitolbu flimkien ma’ xi nisa u ma’ Marija, omm Gesú u ma’ ħutu (qrabatu).”  (Att 1:14)

 

 

IT-TALBA TAR-RUŻARJU

 

·         Ir-Rużarju mhux biss talba vokali kif spiss huwa meqjus minn bosta persuni. Ħafna jħarsu lejh bħala talba ta’ kliem, tgedwid, bħala talba ripetittiva u monotona.

·         Imma ir-Rużarju huwa talba kemm vokali kif ukoll meditattiva għaliex filwaqt li ngħidu il-Missieran, is-Sliema u l-Glorja aħna rridu wkoll naħsbu u nimmeditaw dwar il-misteri differenti tal-ta’ Ġesú.

·         Għalhekk ir-Rużarju huwa qabel xejn talba Kristoloġika għaliex fic-ċentru tiegħu hemm il-Misteru ta’ Ġesú, l-Inkarnazzjoni tiegħu, il-Ħajja, il-Passjoni, Mewt u l-Qawmien tiegħu kif ukoll it-Tlugh tiegħu fis-sema.    Anke l-aħħar tliet misteri tal-Glorja huma Kristoloġiċi għaliex fihom naraw l-ewwel it-twettiq tal-wegħda ta’ Ġesú li jibgħat l-Ispirtu s-Santu imbagħad il-bidu tat-twettiq ta’ wegħda oħra tiegħu, “Sejjer inlestilkom post.  Imbagħad nerġa niġi u noħodkom miegħi biex fejn inkun jien, hemm tkunu intom ukoll.” (Ġwanni 14:2)   Din il-wegħda bdiet isseħħ fit-tlugħ is-sema ta’ Marija u fl-inkurunuzzjoni tagħha mit-Trinitá Qaddisa.

 

IL-MISTERI TAR-RUŻARJU

·         Oriġinarjament il-Misteri tar-Rużarju kienu ħmistax, imma fis-16 ta’ Ottubru 2002, il-Papa Ġwanni Pawlu II, f’Ittra Appostolika, Rosarium Virginis Mariae, ippublika ħames misteri oħra, dawk tad-dawl, biex b’hekk issa hemm għandna għoxrin misteru biex nistgħu nimmeditaw dwarhom.

·         Il-misteri tar-Rużarju huma mqassma hekk:

a.       Il-ħames misteri tal-Ferħ.

b.       Il-ħames misteri tat-Tbatija.

c.       Il-ħames misteri tad-Dawl.

d.       Il-ħames misteri tal-Glorja.

 

F’kull waħda minn dawn it-taqsimiet hemm LINK għall-pagna oħra b’kull wieħed mill-għoxrin Misteru fejn ukoll tista’ tisma’ r-Rużarju jingħad bil-Malti u tingħaqad miegħu. Rużarju huwa rekordjat u provdut mill-RTK.