|
|
KIF GĦANDHA TKUN
IL-QIMA TAGĦNA
L-1 QARI - Qari mill-Ktieb tal-Profeta Ħosegħa. -
Ħos 6, 3-6
NAGĦARFU L-MULEJ, u nfittxu nagħarfuh iżjed;
daqs kemm hu żgur is-sebħ, hekk il-ħruġ tiegħu;
hu jiġi, bħalma tiġi x-xita fuqna,
bħax-xita nwaħħra illi ssaqqi l-art.
U x’nista’ nagħmel jien għalik, Efrajm?
Għalik x’se nagħmel, Ġuda?
It-tjieba tagħkom qisha s-sħab tal-għodwa,
tixbah lin-nida li tinxtorob kmieni.
Għalhekk onġorthom jiena bil-profeti,
u bi kliem fommi qtilthom,
għax il-ħaqq tiegħi joħroġ qisu dawl.
Għaliex jien tjieba rrid, mhux sagrifiċċju;
li tagħarfu ’l Alla rrid,
u mhux vittmi maħruqa.
Il-Kelma tal-Mulej.
SALM RESPONSORJALI - Salm 49 -
Min jimxi sewwa jara s-salvazzjoni ta’
Alla.
Tkellem il-Mulej, Alla fuq l-allat, u sejjaħ l-art.
Għas-sagrifiċċji tiegħek ma nċanfrikx,
il-vittmi tiegħek maħruqa huma dejjem quddiemi. R/.
Li kont bil-ġuħ, mhux se ngħid lilek,
għax tiegħi l-art u kull ma fiha.
Huwa jien se niekol laħam il-gniedes,
jew nixrob id-demm tal-gidien? R/.
Agħti ’l Alla sagrifiċċju ta’ radd il-ħajr,
u rodd lill-Għoli l-wegħdiet tiegħek.
Imbagħad sejjaħli f’jum id-dwejjaq:
jien neħilsek, u int tweġġahni. R/.
IT-2 QARI - Qari mill- Ittra ta’ San Pawl Appostlu
lir-Rumani. - Rum 4, 18-25
ĦUTI: Meta ma seta’ jara ebda tama, Abraham ittama u emmen;
u hekk sar missier ta’ kotra kbira ta’ ġnus, skond ma kien
intqal lilu, “Hekk għad ikun kotran in-nisel tiegħek.”
U ma naqasx fil-fidi tiegħu, anqas meta ġieb quddiem
għajnejh li ġismu kien sarlu bla saħħa, għax kien għoddu
laħaq il-mitt sena, u li ġuf Sara kien mejjet. Quddiem
il-wegħda ta’ Alla ma qagħadx itella’ u jniżżel jekk jemminx
jew le, imma ssaħħaħ fil-fidi, u filwaqt li sebbaħ lil Alla,
żamm bis-sħiħ li min kien għamillu l-wegħda kien qawwi
biżżejjed biex iżomm kelmtu. U kien għalhekk li dan ġie lilu
meqjus b’ġustifikazzjoni.
Iżda l-kelmiet “ġie lilu meqjus” ma nkitbux għalih biss,
imma se jiġi meqjus ukoll lilna li emminna f’dak li qajjem
mill-imwiet lil Ġesù Sidna, li kien mogħti għal dnubietna u
mqajjem għall-ġustifikazzjoni tagħna.
Il-Kelma tal-Mulej.
Hallelujah. Halleluljah.
Fidil il-Mulej f’kull kelma tiegħu,
twajjeb fl-għemil tiegħu kollu.
Hallelujah.
L-EVANĠELJU - Qari mill-Evanġelju ta’ San Mattew.
- Mt 9, 9-13
F’DAK IŻ-ŻMIEN: Huwa u għaddej Ġesù ra wieħed bilqiegħda
quddiem il-mejda tat-taxxi; kien jismu Mattew. “Ejja warajja,”
qallu. Dak qam u mar warajh.
U ġara li, kif qagħad għandu għall-mejda, ġew bosta
publikani u midinbin u qagħdu madwar il-mejda ma’ Ġesù u d-dixxipli
tiegħu. Rawh il-Fariżej, u qalu lid-dixxipli tiegħu:
“Għaliex jiekol mal-publikani u l-midinbin l-Imgħallem
tagħkom?”
Hu semagħhom u qal: “It-tabib ma jeħtiġuhx dawk li huma
f’saħħithom, iżda l-morda. Mela morru tgħallmu x’jiġifieri
“Ħniena nistenna, u mhux sagrifiċċju”; għax mhux lill-ġusti
ġejt insejjaħ, iżda lill-midinbin.”
Il-Kelma
tal-Mulej.
|