|
"Min jilqa lilkom, jilqa lili..."
|
IL-ĦTIEĠA TAL-KNISJA
L-1 QARI - Qari mit-Tieni Ktieb tas-Slaten. - 2 Slat
4, 8-11. 14-16a
JUM WIEĦED Eliżew għadda sa Sunem; u jkun hemm mara minn
familja għolja, li żammitu għandha għall-ikel. U hekk ġara
li, kull darba li kien jgħaddi minn hemm, kien jasal sa
għandha għall-ikel. Hi qalet lil żewġha: “Issa, ara, jiena
naf li dan li dejjem jgħaddi sa għandna hu raġel qaddis ta’
Alla. Ejja nibnu kamra żgħira fuq, u nqegħdulu fiha sodda,
mejda, siġġu u mnara, biex meta jiġi għandna joqgħod fiha.”
Mela jum wieħed, meta mar hemmhekk, daħal fil-kamra ta’ fuq
u mtedd hemm. U qal: “X’nistgħu nagħmlu għaliha din il-mara?”
U Ġieżi wieġbu: “Kos, din ma għandhiex tfal, u żewġha xiħ!”
Qallu Eliżew: “Sejħilha.” Dak sejħilha, u hi waqfet fil-bieb.
U qalilha: “Bħal dil-ħabta, meta jasal iż-żmien, inti tkun
qed tħaddan iben.”
Il-Kelma tal-Mulej.
SALM RESPONSORJALI - Salm 88 -
It-tjieba tal-Mulej irrid dejjem ngħanni.
It-tjieba tal-Mulej irrid dejjem ngħanni,
minn nisel għal nisel
b’fommi nxandar il-fedeltà tiegħek.
Għax jien għidt: “Il-ħniena hi mwaqqfa għal dejjem;
fis-sema int wettaqt il-fedeltà tiegħek. R/.
Hieni l-poplu li jaf jgħajjat bil-ferħ,
li jimxi, Mulej, fid-dawl tal-ħarsa tiegħek.
B’ismek jithennew il-jum kollu,
u bis-sewwa tiegħek jitgħollew. R/.
Għax inti l-foħrija tal-qawwa tagħhom;
għal tjubitek nerfgħu rasna fil-għoli.
Għax il-Mulej it-tarka tagħna,
il-Qaddis ta’ Israel, is-sultan tagħna. R/.
IT-2 QARI - Qari mill-Ittra ta’
San Pawl Appostlu lir-Rumani. - Rum 6, 3-4, 8-11
ĦUTI: Ma tafux li aħna, li tgħammidna fi Kristu Ġesù,
tgħammidna fil-mewt tiegħu? Aħna ndfinna miegħu permezz
tal-magħmudija fil-mewt, biex kif Kristu qam mill-imwiet
bil-qawwa glorjuża tal-Missier, hekk ukoll aħna ngħixu ħajja
ġdida.
Jekk mitna ma’ Kristu, nemmnu li wkoll ngħixu miegħu. Aħna
nafu li Kristu qam mill-imwiet biex ma jmutx aktar: il-mewt
ma ssaltanx iktar fuqu. Hu li miet, miet darba għal dejjem
għad-dnub; imma issa qiegħed jgħix għal Alla. Hekk intom,
qisu ruħkom mejta għad-dnub, imma ħajjin għal Alla, marbutin
ma’ Kristu Ġesù.
Il-Kelma tal-Mulej.
VERSETT
Hallelujah. Halleluljah.
Is-Salvatur tagħna, Kristu Ġesù, qered il-mewt,
u wera fid-dawl il-ħajja permezz ta’ l-Evanġelju.
Hallelujah.
L-EVANĠELJU - Qari mill-Evanġelju ta’ San Mattew.
- Mt 10, 37-42
F’DAK IŻ-ŻMIEN: Ġesù qal lill-appostli tiegħu: “Min iħobb
’il missieru jew ’l ommu iżjed minni ma jistħoqqlux li jkun
miegħi; min iħobb lil ibnu jew ’il bintu iżjed minni ma
jistħoqqlux li jkun miegħi. U min ma jerfax salibu u jimxi
warajja ma jistħoqqlux li jkun miegħi. Min isib ’il ħajtu,
jitlifha; u min jitlef ħajtu minħabba fija jsibha. Min jilqa’
lilkom ikun jilqa’ lili, u min jilqa’ lili jkun jilqa’ ’l
dak li bagħatni. Min jilqa’ profeta għax hu profeta, ħlas ta’
profeta jieħu; u min jilqa’ bniedem ġust għax hu ġust, ħlas
ta’ wieħed ġust jieħu. U kull min jagħti mqar tazza ilma
friska lil xi ħadd minn dawn iż-żgħar għax hu dixxiplu,
tassew, ngħidilkom, li ma jitlifx il-ħlas tiegħu.”
Il-Kelma tal-Mulej.
|