|
|
L-1 QARI
Qari mill-ktieb tal-Profeta Isaija.
Is 2, 1-5
Il-ħwejjeġ li ra Isaija, bin Għamos, dwar Ġuda u Ġerusalem.
Għad jiġri fl-aħħar jiem li l-għolja tad-dar tal-Mulej
togħla ’l fuq mill-qċaċet tal-muntanji u tintrefa’ ’l fuq
mill-għoljiet. Lejha għad jiġru l-ġnus kollha, kotra sħiħa
ta’ popli għad jiġu u jgħidu: “Ħalli mmorru u nitilgħu fuq
il-għolja tal-Mulej, lejn id-dar ta’ Alla ta’ Ġakob, biex
igħallimna t-triqat tieghu u nimxu fil-mogħdijiet tiegħu.
Għax minn Sijon toħroġ il-liġi, u l-kelma tal-Mulej minn
Ġerusalem.”
Il-Mulej jagħmel il-ħaqq bejn il-ġnus u jaqta’ s-sentenza
bejn ħafna popli; u huma jibdlu x-xwabel taghhom f’sikek
tal-moħriet, u l-lanez tagħhom fi mnieġel. Ebda ġens ma
jerfa’ x-xabla kontra ġens ieħor, u s-sengħa tal-gwerra ma
jgħallmuhiex iżjed. Ejja, dar Ġakob, ħalli nimxu fid-dawl
tal-Mulej.
Il-Kelma tal-Mulej.
Inroddu ħajr lil Alla.
SALM RESPONSORJALI
Salm 121
Fraħt meta qaluli: “Immorru f’dar il-Mulej!”
Fraħt meta qaluli:
“Immorru f’dar il-Mulej!”
Diġa’ qegħdin riġlejna
fi bwiebek Ġerusalem.
R/.
Ġerusalem, mibnija bħal belt,
magħquda ħaġa waħda!
Lejha t-tribù jitilgħu,
it-tribù tal-Mulej.
R/.
Minħabba f’ħuti u l-ġirien tiegħi,
jiena ngħidlek: “Is-sliem għalik!”
Minħabba f’dar il-Mulej, Alla tagħna,
infittixlek ir-riżq!
R/.
IT-2 QARI
Qari mill-Ittra ta’ San Pawl Appostlu lir-Rumani.
Rum 13, 11-14
Ħuti: Intom tafu f’liema żmien qegħdin. Waslet is-siegħa
li intom tqumu min-ngħas; għax is-salvazzjoni tagħna hi
eqreb issa minn meta bdejna nemmnu. Il-lejl għoddu għadda u
qorob il-jum. Inwarrbu mela l-għemil tad-dlam u nilbsu l-armi
tad-dawl.
Ngħixu kif jixraq, bħal bin-nhar; mhux bl-ikel iż-żejjed u
s-sokor, mhux biż-żina u t-tbahrid, mhux bil-ġlied u l-għejra,
imma ilbsu ’l Sidna Ġesù Kristu, u ħallukom mill-ħsieb
tal-ġisem u l-ġibdiet tiegħu.
Il-Kelma tal-Mulej.
Inroddu ħajr lil Alla.
Hallelujah. Hallelujah.
Uri lilna, Mulej, it-tjieba tiegħek
u s-salvazzjoni tiegħek agħtina.
Hallelujah.
L-EVANĠELJU
Qari mill-Evanġelju ta’ San Mattew.
Mt 24, 37-44
F’dak iż-żmien: Ġesù qal lid-dixxipli tiegħu: “Bħal fi żmien
Noè, hekk tkun il-miġja ta’ Bin il-bniedem. Għax kif
fiż-żmien ta’ qabel id-dilluvju kienu jieklu u jixorbu,
iżewġu u jiżżewġu, sa dak in-nhar li Noè daħal fl-arka,
b’xejn ma ntebħu sa ma wasal id-dilluvju u ġarr ’il kulħadd,
hekk tkun il-miġja ta’ Bin il-bniedem. Imbagħad tnejn ikunu
fil-għalqa: wieħed jittieħed u l-ieħor jitħalla; żewġ nisa
jkunu jitħnu flimkien, waħda tittieħed u l-oħra titħalla;
ishru, mela, ghax ma tafuhx il-jum li fih jiġi Sidkom. Kunu
afu dan, li kieku sid id-dar kellu jkun jaf f’liema siegħa
tal-lejl ikun se jiġi l-ħalliel, kien jishar u ma jħallix
min jinfidlu l-ħitan ta’ daru. Mela kunu lesti intom ukoll,
għax qatt ma tistgħu tobsru s-siegħa li fiha jiġi Bin
il-Bniedem”.
Il-Kelma tal-Mulej.
Tifħir lilek Kristu.
|