|
|
L-1 Qari
Qari mill-Ktieb tal-Profeta Isaija.
Is 7, 10-14
F’dak iż-żmien: Il-Mulej issokta jkellem lil Aħaż u jgħidlu:
“itlob sinjal għalik mingħand il-Mulej, Alla tiegħek,
f’qiegħ l-art jew fil-għoli tas-smewwiet.’’ U Aħaż wieġeb:
“Ma nitlobx: ma rridx nittanta lill-Mulej.’’
U l-profeta wieġeb: “Isimgħu, mela, dar David: mhux
biżżejjed għalikom li tkiddu lill-bnedmin biex issa se
tkiddu lil Alla tieghi? Għalhekk is-sinjal jagħtihulkom Sidi
stess: Arawha, ix-xebba ssir omm u jkollha iben u ssemmih
Għimmanu-El (għax Alla magħna).’’
Il-Kelma tal-Mulej.
Inroddu ħajr lil Alla
SALM RESPONSORJALI
Salm 23
Ħa jidħol il-Mulej: hu s-Sultan tal-Glorja.
Tal-Mulej hi l-art u kull ma fiha,
id-dinja u kull ma jgħix fiha;
għax hu fuq l-ibħra waqqafha,
u fuq ix-xmajjar wettaqha.
R/.
Min jista’ jitla’ fuq il-għolja tal-Mulej,
u min joqgħod fil-post imqaddes tiegħu?
Min għandu idejh indaf u qalbu safja,
min ma tax ruħu għall-frugħa.
R/.
Dan ikollu barka mingħand il-Mulej,
u l-ħlas li ħaqqu minn Alla, is-Salvatur tiegħu.
Dan hu n-nisel ta’ dawk li jfittxuh,
li jfittxu ‘l wiċċek, Alla ta’ Ġakob.
R/.
IT-TIENI QARI
Bidu ta’ l-Ittra ta’ San Pawl Appostlu lir-Rumani.
Rum 1, 1-7
Pawlu, qaddej ta’ Ġesu’ Kristu, imsejjaħ biex ikun appostlu,
maħtur għall-Evanġelju ta’ Alla, li hu, permezz tal-profeti
tiegħu, kien wiegħdu sa minn qabel fil-Kotba Mqaddsa dwar
Ibnu li, skond it-tnissil tal-ġisem, twieled min-nisel ta’
David, u skond l-Ispirtu s-Santu, sar Iben ta’ Alla b’kull
qawwa, bis-saħħa tal-qawmien mill-imwiet, Ġesu’ Kristu Sidna,
li bih aħna rċevejna grazzja u appostolat biex, għall-ġieħ
ta’ ismu, inwasslu għall-ubbidjenza tal-fidi l-bnedmin fost
il-ġnus kollha, li fosthom tinsabu intom ukoll, imsejħin
biex tkunu ta’ Ġesu’ Kristu.
Lill-egħżież kollha ta’ Alla li jinsabu f’Ruma, imsejħin
biex ikunu qaddisin: grazzja lilkom u sliem minn Alla
Missierna u Sidna Ġesu’ Kristu.
Il-Kelma tal-Mulej.
Inroddu ħajr lil Alla.
HALLELUJAH
Hallelujah. Hallelujah
Ara, ix-xebba tnissel u jkollha iben,
u jsemmuh Għimmanu-El, Alla-magħna.
Hallelujah.
L-EVANĠELJU
Qari mill-Evanġelju ta’ San Mattew.
Mt 1, 18-24
It-tnissil ta’ Ġesu’ Kristu sar hekk. Ommu Marija, wara li
tgħarrset ma’ Ġużeppi, qabel ma marru joqogħdu flimkien
ħarġet tqila bil-ħidma ta’ l-Ispirtu s-Santu. Żewġha Ġużeppi,
li kien raġel ġust u li ma riedx ixandarha quddiem kulħadd,
għamel f’rasu li jibgħatha bil-moħbi tan-nies.
Wara li qatagħha li jagħmel hekk, deherlu anġlu tal-Mulej
fil-ħolm u qallu: “Ġużeppi, bin David, la tibżax tilqa’
għandek lil Marija b’martek, għax dak li tnissel fiha ġie
bil-ħidma ta’ l-Ispirtu s-Santu. Hi jkollha iben, u inti
ssemmih Ġesu’, għax hu jsalva l-poplu tiegħu minn dnubiethom.’’
Dan kollu ġara biex iseħħ li kien qal il-Mulej permezz
tal-profeta, meta qal, ‘Ara, ix-xebba tnissel u jkollha iben,
u jsemmuh Għimmanu-El, li bi lsienna jfisser “Alla magħna’’.
Ġużeppi, meta qam, għamel kif ordnalu l-anġlu tal-Mulej u
laqa’ ‘l martu għandu.
Il-Kelma tal-Mulej.
It-Tifħir Lilek Kristu.
|