|
L-1 QARI
Qari mill-Ktieb tal-Profeta Isaija.
58, 7-10
Dan jgħid il-Mulej:
Aqsam ħobżok ma’ min hu bil-ġuħ,
daħħal f’darek lill-imsejken bla saqaf,
libbes lil min hu għarwien,
u n-nies ta’ darek tinsiehomx.
Imbagħad ifeġġ bħaż-żerniq id-dawl
tiegħek,
u malajr tagħlaqlek il-ġerħa tiegħek.
Quddiemek timxi l-ġustizzja tiegħek,
u l-glorja tal-Mulej timxi warajk.
Jekk biss issejjaħlu, iwieġeb il-Mulej;
Jekk tgħajjatlu, jgħidlek: “Hawn jien.”
Jekk inti twarrab minn nofsok il-moħqrija
u ma tmiddx sebgħek u ma tlissinx il-qerq,
jekk taqsam ħobżok ma’ min hu bil-ġuħ
u xxabba’ lir-ruħ imsejkna,
jiddi mbagħad id-dawl tiegħek fid-dlam,
u d-dlam tiegħek ikun bħal nofs in-nhar.
Il-Kelma tal-Mulej.
SALM RESPONSORJALI
Salm 111
Bħal dawl fid-dlam jiddi l-ġust għat-tajbin.
Bħal dawl fid-dlam jiddi l-ġust
għat-tajbin,
twajjeb, ħanin u ġust.
Hieni l-bniedem li jħenn u jislef,
li jmexxi ħwejġu bir-reqqa.
R/.
Għax il-ġust qatt ma jintemm,
it-tifkira tiegħu tibqa’ għal dejjem.
Xejn ma jibża’ minn aħbar ħażina,
qalbu qawwija bit-tama fil-Mulej.
R/.
Qalbu sħiħa, ma jibżax.
Iqassam u jagħti lill-foqra;
il-ġustizzja tiegħu tibqa’ għal dejjem,
is-saħħa tiegħu tikber fil-ġieh.
R/.
IT-2 QARI
Qari mill-Ewwel Ittra ta’ San Pawl Appostlu
lill-Korintin.
1 Kor 2, 1-5
Meta jien ġejt għandkom, ħuti, ma ġejtx
inħabbrilkom ix-xhieda ta’ Alla bi kliem kbir jew għaref. Ma
qistx ruħi li kont naf xi ħaġa fostkom, ħlief ’il Kristu
Ġesù, u ’l dan imsallab. U jiena ġejt għandkom dgħajjef,
imbeżża’ u mriegħed; il-kelma u l-aħbar tiegħi ma kinux
imlibbsa bil-kliem qawwi tal-għerf, imma bil-wiri ta’ l-Ispirtu
u l-qawwa, sabiex il-fidi tagħkom tinbena mhux fuq il-għerf
tal-bniedem, imma fuq il-qawwa ta’ Alla.
Il-Kelma tal-Mulej.
HALLELUJAH
Hallelujah. Hallelujah.
Musbieħ għal riġlejja kelmtek,
u dawl għall-mogħdijiet tiegħi.
Hallelujah.
L-EVANĠELJU
Qari mill-Evanġelju ta’ San Mattew.
5, 13 - 16
F’dak iż-żmien: Ġesù qal lid-dixxipli
tiegħu: “Intom il-melħ ta’ l-art. Imma jekk il-melħ jaqta’,
biex jerġa jieħu l-imluħa tiegħu? Għal xejn iżjed ma hu
tajjeb ħlief biex jintrema barra u jintrifes min-nies.
Intom id-dawl tad-dinja. Ma tistax tkun
moħbija l-belt li tkun qiegħda fuq muntanja. Anqas ma
jixegħlu musbieħ u jqegħduh taħt il-kejl, iżda fuq l-imnara,
ħa jdawwal lil min ikun fid-dar.
Hekk għandu jiddi d-dawl tagħkom quddiem
il-bnedmin, biex jaraw l-għemil tajjeb tagħkom, u jagħtu
glorja lil Missierkom li hu fis-smewwiet.
Il-Kelma tal-Mulej.
|
