|
|
L-EWWEL QARI
Qari mill-Ktieb ta’ Bin Sirak.
Sir 3,2-6,12-14
Il-Mulej iweġġah lill-missier f’uliedu,
U l-jedd ta’ l-omm fuq uliedha jwettaq.
Min iweġġah ‘il missieru, Alla jaħfirlu dnubietu,
U min iweġġah lil ommu, bħal min jaħżen il-ġid.
Min iweġġah ‘il missieru jifraħ b’uliedu,
U meta jitlob ikun mismugħ.
Min iweġġah ‘il missieru jitwal għomru,
Min iweġġah lil ommu Alla jagħtih il-ħlas.
Ibni, ħu ħsieb missierek meta jixjieħ,
U qatt, kemm idum ħaj, ma għandek tweġgħu.
Ukoll jekk moħħu jiħfief, agħdru,
U tgħajrux meta int fl-aħjar ta’ saħħtek.
Il-ġid li tagħmel mal-missier ma jintesiex,
U jieħu post id-dnubiet.
Il-Kelma tal-Mulej.
Inroddu ħajr lil Alla.
SALM RESPONSORJALI
Salm 127,1-5
Ħieni kull min jibża’ mill-Mulej!
Ħieni kull min jibża’ mill-Mulej,
kull min jimxi fit-triqat tiegħu!
Mix-xogħol ta’ idejk inti tiekol,
ħieni int, u riżqek tajjeb.
R/. Ħieni kull min jibża’ mill-Mulej!
Martek tkun bħal dielja għammiela
‘l ġewwa f’darek;
uliedek bħal xitel taż-żebbuġ
madwar il-mejda tiegħek.
R/. Ħieni kull min jibża’ mill-Mulej!
Ara, kif ikun imbierek il-bniedem
Li jibża’ mill-Mulej!
Ibierkek il-Mulej minn Sijon!
Jalla tara l-ġid ta’ Ġerusalem
Tul il-jiem kollha ta’ ħajtek!
R/. Ħieni kull min jibża’ mill-Mulej!
IT-TIENI QARI
Qari mill-Ittra ta’ San Pawl Appostlu lill-Kolossin.
Kol 3,12-21
Ħuti: Intom il-magħżulin ta’ Alla, il-qaddisin u l-maħbubin
tiegħu. Ilbsu mela sentimenti ta’ ħniena, tjieba, umilta’,
ħlewwa u sabar. Stabru b’xulxin, u, jekk xi ħadd minnkom
ikollu x’igħid ma’ ħaddieħor, aħfru lil xulxin; bħalma l-Mulej
ħafer lilkom, hekk agħmlu intom ukoll.
U fuq dan kollu ilbsu l-imħabba, li hi l-qofol
ta-perfezzjoni. Ħalli s-sliem ta’ Kristu jsaltan fi qlubkom,
dak is-sliem li għalih kontu msejħa biex issiru ġisem wieħed.
U ta’ dan roddu ħajr lil Alla. Ħalli l-bxara ta’ Kristu
tgħammar sħiħa fikom; għallmu bil-għerf kollu u widdbu ‘l
xulxin b’salmi u innijiet u b’għana spiritwali, u b’radd
il-ħajr kantaw f’qalbkom innijiet lil Alla. Kull ma tagħmlu
jew tgħidu, agħmlu kollox f’isem il-Mulej Ġesu’, u roddu
ħajr lil Alla l-Missier permezz tiegħu.
Intom, nisa miżżewġa, obdu lil żwieġkom, kif jixraq lin-nies
tal-Mulej. Intom imbagħad, irġiel miżżewġa, ħobbu n-nisa
tagħkom, u tkunux żorri magħhom. Intom, tfal, isimgħu mill-ġenituri
tagħkom f’kollox, għax dan hu li jogħġob lill-Mulej. Intom,
missirijiet, la ddejqux lil uliedkom, għax inkella jistgħu
jaqtgħu qalbhom.
Il-Kelma tal-Mulej.
Inroddu ħajr lil Alla.
HALLELUJAH
Hallelujah. Hallelujah.
Ħalli s-sliem ta’ Kristu jsaltan fi qlubkom;
ħalli l-bxara ta’ Kristu tgħammar sħiħa fikom.
Hallelujah.
 L-EVANĠELJU
Qari mill-Evanġelju ta’ San Mattew
Mt 2, 13-15, 19-23
Meta telqu l-Maġi, deher anġlu tal-Mulej f’ħolma lil Ġużeppi
u qallu: “Qum, ħu miegħek lit-tifel u lil ommu, u aħrab lejn
l-Eġittu. Ibqa’ hemm sa ma ngħidlek jien, għax Erodi se
jfittex lit-tifel biex joqtlu.’’
Ġużeppi qam, ħa miegħu lit-tifel u lil ommu bil-lejl, u
warrab lejn l-Eġittu, u baqa’ hemmhekk sal-mewt ta’ Erodi.
B’hekk seħħ dak li kien qal il-Mulej permezz tal-profeta,
meta qal, “Mill-Eġittu sejjaħt lil ibni’’.
Meta miet Erodi, deher l-anġlu tal-Mulej f’ħolma lil Ġużeppi
fl-Eġittu u qallu: “Qum, ħu miegħek lit-tifel u lil ommu, u
erġa’ lura lejn l-art ta’ Israel, għax mietu dawk li kienu
jfittxu l-ħajja tat-tifel.’’ Ġużeppi qam,, ħa miegħu lit-tifel
u lil ommu, u mar fl-art ta’ Israel. Imma billi sema’ li
fil-Lhudija kien qiegħed isaltan Arkelaws flok Erodi
missieru, beża’ jmur hemm. Fuq twissija li kellu fil-ħolm,
inġabar fl-inħawi tal-Galilija, u mar joqgħod f’belt jisimha
Nażaret, biex hekk iseħħ dak li kien ingħad permezz
tal-profeti, “Ikun jissejjaħ Nażri.’’
Il-Kelma tal-Mulej
It-Tifħir Lilek Kristu. |