|
|
IT-TIFKIRA SOLENNI TA’
TLUGĦ IL-MULEJ
FIS-SEMA
L-1 QARI -
Bidu tal-Ktieb ta’ l-Atti ta’ l-Appostli
- Atti 1, 1-11
FL-EWWEL KITBA TIEGĦI, O
Teofilu, tkellimt fuq dak kollu li Ġesù kien għamel u
għallem mill-bidu sal-jum li fih kien meħud fis-sema, wara
li bl-Ispirtu s-Santu wissa lill-appostli li hu kien għażel.
Lil dawn hu deher ħaj wara mewtu b’xhieda sħiha għalih
innifsu, billi dehrilhom għal erbgħin jum u kellimhom fuq
is-Saltna ta’ Alla. Waqt li kien magħhom, qalilhom biex ma
jitilqux minn Ġerusalem, imma joqogħdu jistennew isseħħ
il-wegħda tal-Missier. “Fuq din,” qalilhom, “smajtuni
nkellimkom: li Ġwanni għammed bl-ilma, imma intom titgħammdu
bl-Ispirtu s-Santu fi ftit jiem oħra.”
Għalhekk, xħin kienu flimkien, staqsewh, “Mulej, hu dan
iż-żmien li fih int se terġa’ twaqqaf is-saltna ta’ Israel?”
Hu weġibhom: “Mhix biċċa tagħkom li tkunu tafu l-jiem u ż-żmien
li l-Missier żamm fis-setgħa tiegħu. Imma intom tiksbu qawwa,
meta jiġi fuqkom l-Ispirtu s-Santu. U tkunu xhieda tiegħi
f’Ġerusalem, fil-Lhudija kollha u s-Samarija, u sa truf
l-art.”
Wara li qal dan, kien meħud ’il fuq waqt li huma kienu
jħarsu lejh, u sħaba ħadithulhom minn quddiem għajnejhom. Hu
u tiela’ ’l fuq huma kienu jħarsu b’għajnejhom iċċassati
lejn is-sema, meta f’daqqa waħda ġew ħdejhom żewġt irġiel bi
lbies abjad, li qalulhom: “Irġiel tal-Galilija, x’intom
tħarsu lejn is-sema? Dan Ġesù, li ttieħed minn magħkom lejn
is-sema, hekk għad jerġa’ jiġi kif rajtuh sejjer.”
Il-Kelma tal-Mulej.
SALM RESPONSORJALI - Salm 46
Tela’ l-Mulej b’għajat ta’ ferħ.
Ċapċpu idejkom, intom ġnus kollha,
ifirħu b’Alla, għajtu u għollu leħinkom!
Għax il-Mulej, il-Għoli, hu tal-biża’,
hu Sultan kbir fuq l-art kollha. R/.
Tela’ l-Mulej b’għajat ta’ ferħ,
il-Mulej bid-daqq tat-trombi.
Għannu lill-Mulej, għannu,
għannu lis-Sultan tagħna, għannu! R/.
Għax hu s-Sultan ta’ l-art kollha:
għannu bis-sengħa lil Alla!
Isaltan Alla fuq il-ġnus kollha,
Alla qiegħed fuq it-tron imqaddes tiegħu. R/.
IT-2 QARI - Qari mill- Ittra ta’ San Pawl Appostlu
lill-Efesin. - Ef 1, 17-23
ĦUTI: Alla ta’ Sidna Ġesù Kristu, il-Missier tal-glorja,
jagħtikom spirtu ta’ għerf u rivelazzjoni biex tagħarfuh, u
jdawlilkom il-għajnejn ta’ qalbkom biex tagħarfu x’inhi
t-tama tas-sejħa tagħkom, x’inhu l-għana tal-glorja tal-wirt
tiegħu mal-qaddisin, u x’inhu l-kobor bla qjies tas-setgħa
tiegħu fina li emminna, skond il-ħila tal-qawwa kbira tiegħu
li wera fi Kristu, meta qajmu mill-imwiet u qiegħdu
fil-lemin tiegħu fis-smewwiet, ’il fuq minn kull Saltna u
Setgħa, minn kull Qawwa u Ħakma, ’il fuq minn kull isem li
jissemma, mhux biss għaż-żmien ta’ issa, imma wkoll għalli
ġej.
U hu qiegħed kollox taħt riġlejh, u għamlu Ras fuq il-Knisja
kollha, li hi l-Ġisem tiegħu, il-Milja ta’ dak li jimla
kollox f’kollox.
Il-Kelma tal-Mulej.
VERSETT
Hallelujah. Halleluljah.
Morru għallmu l-Ġnus kollha, jgħid il-Mulej;
jiena magħkom dejjem, sa l-aħħar taż-żmien.
Hallelujah.
L-EVANĠELJU - Għeluq mill-Evanġelju ta’ San Mattew.
- Mt 28, 19-20
F’DAK IŻ-ŻMIEN: il-Ħdax-il dixxiplu telqu lejn
il-Galilija u marru fuq il-muntanja fejn kien ordnalhom Ġesù.
Kif rawh, inxteħtu quddiemu; imma xi wħud iddubitaw.
Ġesù resaq ikellimhom u qalilhom: “Lili ngħatat kull setgħa
fis-sema u fl-art. Morru, mela, għallmu l-ġnus kollha, u
għammduhom fl-Isem tal-Missier u ta’ l-Iben u ta’ l-Ispirtu
s-Santu, u għallmuhom iħarsu dak kollu li ordnajtilkom jien.
U ara, jiena magħkom dejjem, sa l-aħħar taż-żmien.”
Il-Kelma tal-Mulej.
|