|
Sena B -
IL-ĦDAX-IL ĦADD MATUL IS-SENA
EWWEL
QARI -
(Eżek 17, 22-24)
Qari mill-Ktieb tal-Profeta Eżekjel.
Dan igħid Sidi l-Mulej:
Jien naqta’ mill-quċċata taċ-ċedru għoli,
minn tarf il-friegħi torja, rimja żgħira,
u nxettilha fuq muntanja għolja u kbira;
Fuq il-muntanja f’għolja ta’ Israel inxettilha.
U hi toħroġ il-friegħi
u tagħmel il-frott,
u ssir siġra sabiħa taċ-ċedru.
U taħtha jistkenn kull tajr bil-ġwienaħ,
jistkennu taħt id-dell tal-friegħi tagħha.
U jagħarfu s-siġar kollha tar-raba’
li jien il-Mulej
Li siġra għolja nċekkinha
u siġra żgħira nkabbarha;
Innixxef is-siġra l-ħadra,
u n-niexfa bil-weraq inħaddarha.
Jien hu l-Mulej;
Tkellimt, u li għidt nagħmlu.
Il-Kelma tal-Mulej
Inroddu ħajr lil Alla.
SALM RESPONSORJALI -
(Salm 91)
Tajjeb li nfaħħru l-Mulej.
Tajjeb li nfaħħru l-Mulej.
u ngħannu lil ismek, inti l-Għoli,
inxandru filgħodu t-tjieba tiegħek,
u l-fedelta’ tiegħek fl-iljieli.
R/.
Il-bniedem ġust bħal palma jħaddar,
bħal ċedru tal-Lebanon jikber,
imħawlin f’dar il-Mulej,
iħaddru fil-btieħi ta’ Alla tagħna.
R/.
Sa fi
xjuħithom il-frott jagħmlu,
mimlijin kollha ħajja u ħdura,
biex ixandru li ġust hu l-Mulej:
Hu l-blata tiegħi, ebda qerq m’hemm fih.
R/.
II-TIENI
QARI -
(2 Kor 5, 6-10)
Qari mit-Tieni Ittra ta’ San Pawl
Appostlu lill-Korintin
Ħuti: Aħna dejjem qalbna qawwija, u nafu li, sakemm indumu mlibbsa b’dan
il-ġisem, aħna nibqgħu ‘l bogħod mill-Mulej; għax aħna ngħixu bil-fidi u
mhux b’dak li naraw. Aħna qalbna qawwija u jidhrilna li aħjar noħorġu minn
dan il-ġisem u mmorru noqogħdu għand il-Mulej. Għalhekk fuq kollox aħna
nfittxu li nogħġbu lilu, sew jekk nibqgħu hawn, sew jekk noħorġu minn dan
il-ġisem.
Jinħtieġ li lkoll kemm aħna nidhru quddiem it-tribunal ta’ Kristu, ħalli
kulħadd jieħu skond it-tajjeb jew il-ħażin li jkun għamel meta kien għadu
ħaj fil-ġisem.
Il-Kelma tal-Mulej.
Inroddu ħajr lil Alla.
HALLELUJAH
Hallelujah. Hallelujah.
Ilqgħu bil-ħlewwa l-kelma mħawla fikom,
li tista’ ssalvalkom irwieħkom.
Hallelujah.
L-EVANĠELJU -
(Mk 4, 26-34)
Qari mill-Evanġelju ta’ San Mark.
F’dak Iż-żmien: Ġesu’ qal lill-kotra tan-nies: “Is-Saltna ta’ Alla hi bħal
meta raġel ikun xeħet iż-żerriegħa fl-art. Rieqed jew imqajjem, bil-lejl
jew bin-nhar, iż-żerriegħa tinbet u tikber, bla ma jaf kif. L-art trodd
minnha nnifisha l-ewwel il-qamħ mimli fis-sbula. U meta l-frott isir,
malajr il-bidwi jmidd idu għall-minġel, għax ikun wasal żmien il-ħsad.’’
U qal: “Ma xiex sejrin inqabbluha s-Saltna ta’ Alla, jew b’liema parabbola
nfissruha? Qisha żerriegħa tal-mustarda; din, meta tinżera’ fil-ħamrija,
hi l-iċken fost iż-żrieragħ kollha fuq l-art; imma wara li tinżera’ tikber
u ssir l-akbar waħda fost il-ħxejjex kollha, u toħroġ friegħi wesgħin,
hekk li l-agħsafar ta’ l-arju jkunu jistgħu jistkennu għad-dell tagħha.’’
B’ħafna parrobboli bħal dawn kien ixandrilhom il-kelma, kif kienu jistgħu
jifhmuha huma, u mingħajr xi parabbola ma kienx ikellimhom; imma
lid-dixxipli tiegħu, meta kien ikun waħdu magħhom, kien ifissrilhom
kollox.
Il-Kelma tal-Mulej
Tifħir
lilek, Kristu.
|
|