Ftit ħsibijiet miġbura minn Joe Farrugia

 HENJIN DAWK LI MA RAWX U EMMNU

Sena B -

IT-TIENI ĦADD TA’ L-GĦID

Qari mill-Evanġelju ta’ San Ġwann. (19-31)

Dak il-Ħadd filgħaxija, meta d-dixxipli kienu flimkien imbeżżgħa mil-Lhud, bil-bibien magħluqa, ġie Ġesù u qagħad f’nofshom; u qalilhom: “Il-paci magħkom!” Kif qal hekk, uriehom idejh u ġenbu. Id-dixxipli ferħu meta raw il-Mulej. Imbagħad Ġesù tenna jgħidilhom: “Il-paci magħkom! Kif Missieri bagħat lili, hekk jiena nibgħat lilkom.” Kif qal hekk, nefaħ fuqhom u qalilhom: “Ħudu l-Ispirtu s-Santu: id-dnubiet ta’ dawk li taħfru jkunu maħfura, u d-dnubiet ta’ dawk li żżommu jkunu miżmuma.”
Wieħed mit-Tnax, Tumas, imlaqqam it-Tewmi, ma kienx magħhom meta ġie Ġesù. Għalhekk id-dixxipli l-oħra qalulu: “Rajna ’l-Mulej”. Iżda hu qalilhom: “Jekk ma narax f’idejh il-marka ta’ l-imsiemer, jekk ma nqegħidx sebgħi fuq il-marka ta’ l-imsiemer u idi fuq ġenbu, jiena ma nemminx.”
Tmint ijiem wara, id-dixxipli reġgħu kienu ġewwa u Tumas kien magħhom. Il-bibien kollha kienu magħluqa, imma Ġesù daħal, qagħad f’nofshom, u qalilhom: “Il-paci magħkom!” Imbagħad qal lil Tumas; “Newwel sebgħek ’il hawn u ara idejja, u ġib idek u qegħidha fuq ġenbi: qis li ma tonqosx fik il-fidi, iżda emmen.” Wieġbu Tumas u qallu: “Mulej tiegħi u Alla tiegħi!” Qallu Ġesù: “Emmint għax rajtni! Henjin dawk li ma rawx u emmnu.”
Hemm ħafna sinjali oħra li Ġesù għamel quddiem id-dixxipli tiegħu u li mhumiex imniżżla f’dan il-ktieb. Iżda dawn inkitbu biex intom temmnu li Ġesù hu l-Messija Bin Alla, u biex bit-twemmin tagħkom ikollkom il-ħajja f’Ismu.

Il-Kelma tal-Mulej.
 

Forsi ma kienx jaf li Tumas ma kienx hemm?

Meta fl-imgħoddi kont naqra din il-ġrajja, ġieli tħassibt bejni u bejn ruħi,  “Imma possibli li Ġesù ma kienx jaf li f’dak il-ħin li kien se jidher lill-Appostli, Tumas kienx magħhom?”   U allura nistaqsi, “Jekk kien jaf, għaliex dehrilhom f’dak il-ħin meta wieħed minnhom ma kienx hemm?”

Imma fil-figura ta’ Tumas it-Tewmi, illum ma nilmaħx biss lill-Appostlu li ried jara b’għajnejh u jmiss b’idejh il-pjagi ta’ l-Imgħallem tiegħu, imma nara lil dawk l-imgħammdin ġodda kollha li wara Għid il-Ħamsin emmnu fil-Bxara t-Tajba mxandra minn Pietru u sħabu.  U dan għamluh minkejja li ma rawx lil Ġesù Irxoxt.

Il-komunità li għaliha Ġwanni kiteb ir-raba’ evanġelju kienet tgħix qrib tmiem l-ewwel seklu jew forsi anki lejn il-bidu tat-tieni.  Kienu diġà għaddew bosta snin mill-ġrajja tal-passjoni, il-mewt u l-qawmien mill-mewt ta’ Ġesù.  U lil dawn l-insara, l-evanġelista qed jgħidilhom fi kliem Ġesù, “Imberkin intom li minkejja li ma rajtux b’għajnejkom, imma xorta ħaddantu l-fidi.

Iżda l-evanġelju ma nkitibx għalihom biss.  Inkiteb ukoll għal dawk kollha li fis-snin u s-sekli ta’ wara ħaddnu t-twemmin nisrani.  Lilhom ukoll Ġesù qed jgħidilhom, “Imberkin intom li ma rajtux, imma emmintu.”   Fost dawn hemm aħna wkoll.  U lilna wkoll Ġesù qed itenni l-istess diskors.

Il-fidi ma tista’ qatt tfittex li tinbena fuq is-sensi.  Inkella mhix fidi. Lanqas ma nista’ l-fidi nipprova nasal għaliha b’xi proċess tal-loġika. Ma nista’ qatt nipprova l-ewwel nifhem biex imbagħad nemmen, imma l-proċess huwa bil-maqlub. L-ewwel irrid nemmen.  Imbagħad forsi nibda nifhem xi ħaġa.  Għal min ma jemminx, ebda prova mhi biżżejjed. Għal min jemmen ebda prova mhi meħtieġa.

F’mumenti li fihom il-fidi tiegħi tidher imċajpra u imdallma.

Mill-banda l–oħra, l-bniedem jibqa’ dejjem bniedem.  Waħdu biss ma jista qatt jasal li jkollu lanqas l-iċken żerriegħa ta’ fidi, għax din hija rigal ta’ Alla, li però l-bniedem jista’ jaċċetta jew jirrifjuta;  rigal, li l-bniedem irid jindokra u jrawwem. Inkella l-fidi tmut u tintilef.

Il-bniedem jibqa’ bniedem u d-dubji jibqgħu iħabblu l-imħuħ ta’ kull min jemmen sa l-aħħar nifs.  Iżda dan m’għandu qatt jaqtali qalbi.  L-appostli infushom wara l-esperjenza tagħhom ma Ġesù, baqgħu jiddubitaw sa l-aħħar laqgħa tagħhom miegħu qabel ma tela’ s-sema. (Mt 28:1) 

F’mumenti li fihom il-fidi tiegħi tidher imċajpra u imdallma, l-agħar ħaġa li nista’ nagħmel huwa li noqod nirraġuna mad-dubji li jkolli.  F’dak il-ħin, insibha tgħini ħafna xi talba qasira, imma ħierġa mill-qalb. Bħal per eżempju l-istqarrija ta’ missier dak it-tifel li kellu x-xitan, “Mulej, jiena nemmen. Għini fin-nuqqas ta’ fidi tiegħi.”  (Mk 9:24)   Inkella l-esklamazzjoni ta’ Tumas innifsu, “Mulej tiegħi u Alla tiegħi.”

U jiena ċert li f’dak il-mument, dik in-nitfa żerriegħa ta’ fidi tiegħi, minkejja li ma ċċaqlaqx muntanji, għall-Mulej li jaf u jagħraf kollox tkun biżżejjed.