Ftit ħsibijiet miġbura minn Joe Farrugia

Fl-Isem tal-Missier u ta’ l-Iben u ta’ l-Ispirtu s-Santu

Sena B -

IT-TRINITÀ QADDISA

Għeluq ta’ l-Evanġelju ta’ San Mattew. (Mt 28, 16-20)

F’dak iż-żmien: Il-ħdax-il dixxiplu telqu lejn il-Galilija u marru fuq il-muntanja fejn kien ordnalhom Ġesù. Kif rawh, inxteħtu quddiemu; imma xi wħud iddubitaw.
Ġesù resaq ikellimhom u qalilhom: “Lili ngħatat kull setgħa fis-sema u fl-art. Morru, mela, għallmu l-ġnus kollha, u għammduhom fl-Isem tal-Missier u ta’ l-Iben u ta’ l-Ispirtu s-Santu, u għallmuhom iħarsu dak kollu li ordnajtilkom jien. U ara jiena magħkom dejjem, sa l-aħħar taż-żmien.”

Il-Kelma tal-Mulej.

 

Il-Misteru  – Quddiem il-kelma misteru, spiss nagħlqu moħħna għax ngħidu, “Ma jgħoddx għalija.  Mhux suġgett għal snini.”  Lili jfakkarni f’xena ta’ Santu Wistin f’xatt il-baħar u bit-tfajjel maġenbu jgħidlu; “Hekk kif din il-ħofra żgħira fir-ramel ma tista’ qatt tesa’ l-ilmijiet kollha tal-baħar, bl-istess mod il-moħħ żghir tieghek ma jista’ qatt jifhem il-kobor infinit ta’ Alla.”  U allura nikkonkludi, li jekk ma wasalx id-duttur tal-Knisja Santu Wistin, kif qatt nista’ nasal jien?  Inwarrab u ndawwar moħħi fuq ħwejjeġ oħra, l-istess kif darba kienu għamlu d-dixxipli: “Iebes dal-kliem! Min jiflaħ jisimgħu?” (Ġw 6:60) U minn dak in-nhar bosta minnhom telquh.

Xi minn daqqiet jiġri li l-misteru nistħajluh bħal ħajt taż-żonqor li bl-ebda mod ma nistgħu ninfdu u għalhekk inwarrbu minnu. Ninsewh jew nippruvaw ma naħsbux dwaru.  Forsi wkoll ftit li xejn nagħtu każ tiegħu. Għax aħna nsara, ngħidu li nemmnu, imma daqshekk; dan spiss ikun paroli biss.

Iżda l-misteri tal-fidi tagħna; dak tat-Trinità Qaddisa, dak ta’ l-Inkarnazzjoni ta’ l-Iben ta’ Alla, dak tal-Fidwa tagħna,  mhumiex bibien li jagħlquna barra.  Mhumiex ħajt li ma nistgħux ninfdu, iżda huma bħal oċean immens li dejjem jistedinna li nidħlu fih biex nesplorawh.  Nafu li fiċ-ċokon tagħna qatt mhu se naslu li nitkixxfu biżżejjed dwar l-immensità tiegħu, imma nafu wkoll li iktar ma ninżlu fih fil-fond, aktar insibu x’niskopru.  Aktar inħossuna parti minnu.

It-Trinità Qaddisa -  Alla wieħed fi tliet persuni – il-Missier huwa Alla,  l-Iben huwa Alla, u l-Ispirtu s-Santu huwa Alla.  Imma dawn mhumiex tliet allat, lanqas sempliċiment tliet aspetti differenti ta’ l-istess persuna imma, Alla wieħed fi tliet persuni tabilħaqq distinti minn xulxin u indaqs fil-kobor.

Din hija l-bażi tal-misteru li jiena u int ma nistgħux nifhmu, mhux għax imur kontra r-raġuni, imma għaliex huwa ‘l fuq minnha.  Moħħna, bħal ħofra fir-ramel fl-istorja ta’ Santu Wistin, huwa żgħir wisq. Madankollu l-misteru tat-Trinità Qaddisa, l-istess bħal misteri l-oħra tal-fidi tagħna mhux biss jitlob minna li nemmnuh, imma qiegħed kontinwament jistedinna biex nidħlu fih u nesplorawh.

Rivelat minn Ġesù Kristu – Matul l-istorja tas-Salvazzjoni, Alla kien bil-mod il-mod juri lilu nnifsu lill-poplu tiegħu.  Din ir-Rivelazzjoni Divina laħqet il-milja tagħha fil-persuna ta’ Ġesù Kristu li matul il-ħajja tiegħu fuq l-art uriena wkoll li Alla huwa Trinità; Missier, Iben u Spirtu s-Santu.  Din kienet verità li matul it-Testment il-Qadim, kienet għadha mhix rivelata.

Tul il-ħajja pubblika tiegħu, Ġesù kien kontinwament jitkellem dwar il-Missier. Bosta drabi tkellem dwaru nnifsu bħala l-Iben waħdieni, li ġej mill-MIssier, li huwa daqs il-Missier u li huwa l-istess bħalu.  Lid-dixxipli tiegħu kien ukoll ikellimhom dwar l-Ispirtu s-Santu li huwa wiegħed li jibagħatilhom minn għand il-Missier.

Ambaxxaturi tat-Trinità – Fuq kollox qabel telaqhom Ġesù tahom sehem mill-missjoni tiegħu.  “Morru, mela, għallmu l-ġnus kollha, u għammduhom fl-Isem tal-Missier u ta’ l-Iben u ta’ l-Ispirtu s-Santu.”

Iva, kull nisrani huma mgħammed f’isem it-Trinità Qaddisa u għalhekk il-missjoni tagħna fid-dinja hija li nkunu ambaxxaturi tat-Trinità Qaddisa.  Kull azzjoni li nagħmlu tul ħajjitna nwettquha fl-isem tal-Missier u ta’ l-Iben u ta’ l-Ispirtu s-Santu. Din hija t-tifsira vera tal-kliem li ngħidu kull darba li nroddu s-salib; li dak li qed nagħmlu mhux qed nagħmluh f’isimna, imma biss fl-isem tal-Missier u tal-Iben u tal-Ispirtu s-Santu.

Anke l-kliem li ntennu fit-talba tal-Glorja.  Bih rridu nfissru li dak li nwettqu ma nagħmlux għall-glorja tagħna imma biex tkun mogħtija Glorja lill-Missier, u lill-Iben u lill-Ispirtu s-Santu.

B’dan l-mod ix-xogħol tagħna jieħu dimensjoni Trinitarja. Il-missjoni li nwettqu tieħu dimensjoni Trinitarja.  Il-fidi tagħna, it-talb tagħna, ħajjitna kollha – dan kollu jieħu dimensjoni Trinitarja.

Għaliex Alla tagħna huwa Trinità.  Aħna ġejjin minnu, qed ngħixu fih u għalih. U għalhekk lilu tifħir u glorja għal dejjem ta’ dejjem.  Amen.