1. Il-Preżenza ta’ Alla: “Ejja Spirtu s-Santu”.

 

2. L-Esperjenza -  Il-Kelma ta’ Alla fil-Ktieb tal-Ħajja:

“Avvent” ifisser il-miġja ta’ Alla. Liema huma s-sinjali li juruna l-miġja ta’ Alla fil-ħajja tagħna? U fid-dinja ta’ żmienna? Ġieli ltaqjna ma sinjali li ħawduna? Kif weġibna għalihom?

 

3. Il-Kelma ta’ Alla fl-Evanġelju: Aqra bil-mod is-silta mill-Evanġelju: Lq 21, 25-28.34-36: “Qumu u erfgħu raskom. Il-fidwa tagħkom fil-qrib.”

Wara ħin ta’ skiet, aħseb u staqsi: X’qed tgħidili, Mulej, fuq l-esperjenzi tiegħi?

 

·          Fil-bidu ta’ din is-sena liturġika l-Knisja tatna din is-silta tal-Evanġelju li tagħlaq b’sejħa urġenti għat-talb fuq l-istil ta’ Ġesù. Mhux talb ta’ tlablib, li jagħlaqna fina nfusna, mimli “tħassib fuq il-ħtiġiet tal-ħajja”; imma talb ta’ smigħ u ta’ dixxerniment tar-rieda ta’ Alla, li jibgħatna naħdmu b’ħeġġa ħalli s-Saltna ta’ Alla sseħħ fostna. 

 

Ġesù kien jitlob kontinwament (Lq 3,21; 5,16; 6,12; 9,18.29; 22, 41; 23, 24-46). It-talb fil-ħajja ta’ Ġesù kien ir-ruħ ta’ kull ma jagħmel. Kien tfittxija bla waqfien għar-rieda tal-Missier u għat-twettiq tas-Saltna tiegħu. Hekk għallimna u riedna nitolbu aħna wkoll: “Tiġi Saltnatek, ikun li trid int.”

 

·          F’ħajjitna, fil-ġrajjiet ta’ pajjiżna u tad-dinja, jekk noqogħdu għassa u ma nħallu xejn itaqqalna - jekk ikollna post u ħin tad-“deżert” f’ħajjitna - nintebħu li l-Mulej il-ħin kollu jagħtina sinjali tal-preżenza u l-imħabba tiegħu, anki fiż-żminijiet koroh. Is-Saltna ta’ Alla tinsab fostna wkoll, imma “moħbija”. Ħafna ma jintebħux biha u jagħtuha għal attivitajiet u proġetti li ma jħallu l-ebda frott.

 

L-Evanġelju ma jippretendix li jagħtina informazzjoni dwar l-aħħar tad-dinja. Imma jrid ifakkarna li “ż-żminijiet ta’ l-aħħar”  ġa bdew - bit-twelid, il-mewt u l-qawmien ta’ Ġesù. Kristu rebaħ il-qawwa tal-mewt, jinsab ġa fostna, u għandu jerġa’ jiġi “b’setgħa u glorja kbira”  biex isalvana. Hekk l-Evanġelju jagħmel kuraġġ lill-ewwel Insara u lilna, fiż-żminijiet diffiċli tal-ħajja. It-taqlib fin-natura jfisser il-ġudizzju ta’ Alla, li jaġixxi fl-istorja favur il-ħbieb tiegħu. Kollox se jiġġedded.  It-taqlib fix-xemx, fil-qamar u fil-kwiekeb, m’humiex “sinjali” ta’ falliment imma ta’ salvazzjoni, simboli li juru li l-miġja ta’ Bin il-Bniedem hi fil-qrib. Dinja qadima se tispiċċa, u dinja ġdida se tibda tissawwar. Fid-dinja ta’ żmienna x’inhuma “x-xemx, il-qamar u l-kwiekeb” li narawhom jitħawdu u jaqgħu? U x’inhuma “s-sinjali” li l-Mulej hu fil-qrib tagħna, ħafna fil-qrib? Is-sħaba hija xbieha tal-preżenza ta’ Alla. Bin il-Bniedem huwa mogħni bis-setgħa u l-qawwa ta’ Alla nnifsu, u hekk ġej biex jifdi lil dawk li huma tiegħu. Filwaqt li d-dixxipli ta’ Ġesù jibnu d-dinja l-ġdida, l-għedewwa tal-proġett ta’ Alla jaħdmu wkoll, imma mexjin lejn it-telfien.

 

·          Fil-ħidma tagħna, se jkollna niffaċċjaw il-konflitti - l-oppożizzjoni u l-persekuzzjoni minn dawk li ma jridux li l-affarijiet jinbidlu. Iżda f’din il-ġlieda, Bin il-Bniedem se jkun il-qawwa tagħna. U, fl-istess ħin, se jkun l-imħallef, li jiddikjara bla ħtija u rebbieħa lil dawk li jibqgħu fidili lejh. Il-miġja ta’ Bin il-Bniedem, għalhekk, mhix ġrajja li għandna nistennewha b’idejna marbuta. Seħħet diġà, imma kemm se tkun tidher jiddependi mix-xiehda qalbiena tal-Insara u mill-ħidma u l-istinkar tagħna lkoll bħala dixxipli tiegħu.

 

·          Għalhekk l-Evanġelju jħeġġiġna biex nżommu għajnejna miftuħa f’sahra attiva, imnebbħa mit-talb u mid-dixxerniment. Il-miġja ta’ Bin il-Bniedem m’għandhiex tissarraf fi stennijja passiva ta’ ġrajjiet fil-futur. Imma, permezz tat-talb, għandna nfittxu r-rieda ta’ Alla; u permezz tal-prattika tal-ħajja nisranija, inwettquha f’kull waqt u kull ambjent. Inħarsu dejjem b’sens kritiku lejn is-soċjetà u l-ġrajjiet tal-istorja, u hekk niskopru l-preżenza ta’ Alla, miexi magħna u jwiżinna bil-qawwa tiegħu. Huwa issa, fl-istorja tagħna mimlija diffikultajiet u konflitti, li aħna għandna nagħmlu l-kuraġġ u ma nitħeddlux, għaliex il-ħelsien hu fil-qrib, anzi diġà beda jseħħ.  Min jgħix aljenat u ma jimpurtahx minn dak li jkun qiegħed jiġri madwaru, jixbah lil wieħed fis-sakra, ma jintebaħx bil-preżenza u l-ħidma ta’ Alla fil-ħajja tiegħu u fil-ġrajjiet tal-istorja. U ma jkunx kapaċi jagħraf l-urġenza tal-prattika u tax-xiehda nisranija fid-dinja. Il-ġudizzju ta’ Alla jaqa’ fuqu, “f’dak il-Jum”, bħal xibka.

 

·          Il-Mulej ikellimna u jgħidilna li hu ma jridx ikun ’il bogħod minna. Imma biex nintebħħu bih u bis-Saltna li qed tinżera’ fostna, jridna ngħaddu minn reliġjon magħluqa fil-knisja, ritwalista, interessata biss b’dehra ta’ Alla fil-bogħod u magħluq fil-glorja tiegħu fis-sema, għal Alla fil-qrib - Għimmanu-El, imma wkoll “Alla moħbi”  fl-għaġna tal-istorja. Ilkoll kemm aħna għandna nagħtu sehemna fil-bini ta’ dinja ġdida ta’ nies ħielsa, li jgħixu f’armonija bejniethom u mal-proġett ta’ Alla fl-istorja ta’ żmienna. 

 

4. Konverżazzjoni/Azzjoni:  Xi tridni nagħmel, Mulej? Xi tridni nbiddel?     

 

1. Kif nistgħu nisimgħu lil Alla jkellimna fil-ġrajjiet tal-ħajja tagħna u ta’ madwarna? Kif nistgħu nifhmu s-sinjali li jagħtina? 2. Il-miġja ta’ Ġesù fostna ġa wrietna li l-imħabba ta’ Alla toħroġ rebbieħa fuq dak kollu li jfixkel ir-rieda tiegħu li jsalva lill-bnedmin. Kif nistgħu nkomplu nagħtu xiehda llum ta’ din ir-rebħa ta’ Alla?

 

5. Għeluq: Agħmel talba spontanja u itlob “Il-Missierna”.