Tema: Nidħlu fil-Patt taż-Żwieġ bejn Kristu u l-Umanità.

KKK: 1335,1612-1617,2618..

Objettiv:  Ara pp.1-2 hawn fuq.

 

1. Talba tal-Bidu: Wara l-eżerċizzju tal-Preżenza ta’ Alla u Kant tal-Bidu, it-Talba lill-Ispirtu s-Santu, jew talba oħra spontanja mill-Animatur.

 

2. L-Esperjenza -  Il-Kelma ta’ Alla fil-Ktieb tal-Ħajja (fil-gruppi ż-żgħar)

Wara ħin ta’ skiet ngħaddu biex nirrifletu x’qiegħed jgħidilna Alla fl-esperjenza ta’ ħajjitna:  Xi jfisser Ġesù għalina? B’liema titlu nħobbu nitkellmu fuqu?

 

3. Il-Kelma ta’ Alla fl-Evanġelju (fi-grupp il-kbir)

Wara li nisimgħu l-esperjenzi, naqraw bil-mod is-silta tal-Evanġelju:

 Ġw 2,1-11: Id-dixxipli raw il-glorja tiegħu u emmnu fih.

Fis- skiet, nistaqsu: X’qed jgħidilna l-Mulej, dwar l-esperjenzi tagħna?

 

Nieħdu r-reazzjonijiet, imbagħad niċċarawhom b’riflessjonijiet mill-librett tal-Mixja tal-Fidi ma’ l-Assemblea tal-Ewwel Ħadd.

 

1. “Fis-sitt jum”, Alla ħalaq il-bniedem “fuq xbihietu, raġel u mara” (Ġen 1,26-31). Hekk intemm ix-xogħol tal-Ħolqien.  Fir-rakkont tat-Tieġ ta’ Kana fis-sitt jum, l-umanità l-ġdida tal-“ħolqien il-ġdid” issir dixxipla ta’ Ġesù u temmen fih. Il-qalba ta’ din l-umanità l-ġdida se jkun il-Patt taż-żwieġ li Ġesù nnifsu, il-Ħaruf-Għarus, jissiġilla b’demmu (Apok 19,5-9).

 

Ġesù hu l-veru Għarus tal-umanità. It-tieġ fil-Bibbja sikwit kien ifisser il-Patt ta’ Alla mal-poplu (ara l-Ewwel Qari). Fit-tieġ ta’ Kana jissemma l-għarus, imma ma tissemmiex Fejn hi l-Għarusa? “Omm Ġesù”, f’dan l-episodju, għandha valur simboliku; Marija tirrappreżenta lil dawk li baqgħu fidili jistennew li jseħħu l-wegħdiet tal-Patt il-Qadim, u hekk saru l-Poplu l-Ġdid ta’ Alla, “l-Għarusa mart il-Ħaruf” (ara l-Ewwel Qari u Apok 21,9).

 

2. Id-djalogu bejn Ġesù u Marija. Marija hija l-Mara l-Ġdida, li tħares lejn ir-rabta ta’ Alla ma’ l-umanità b’għajnejn ġodda u tintebaħ b’dak li l-oħrajn ma jintebħux bih. Il-Patt il-Qadim spiċċa, kien żvojta. Issa l-ġarar kienu vojta, jistennew li jimtlew bl-inbid tal-Patt il-Ġdid. Is-siegħa ta’ Ġesù kienet is-siegħa tas-salib. F’Kana Ġesù biddel l-ilma fl-inbid, fis-siegħa tiegħu biddel l-inbid f’demmu. 

 

3. “Kull ma jgħidilkom agħmluh.”  Marija kienet temmen f’Binha qabel ma għamel il-miraklu; kienet temmen li Ġesù se jġib l-imħabba li għandha l-qawwa li tibdel u ġġedded kollox[1]. Id-dixxipli, min-naħa tagħhom, emmnu fih wara li raw is-sinjal. Marija hija l-bidu tal-Komunità-Għarusa, dixxipla ta’ Ġesù, mudell tal-Poplu l-Ġdid ta’ Alla, li jemmnu f’Ġesù u jagħmlu kull ma jgħidilhom (ara l-Ewwel Qari).

 

L-inbid fl-Iskrittura huwa simbolu tal-imħabba[2]. Fis-siegħa tiegħu Ġesù se juri s-simbolu tal-imħabba definittiva, “sa l-aħħar”, li għad tidher fis-“siegħa” tiegħu (ara Ġw 13,1), li għad tkun il-karatteristika ewlenija tal-Poplu l-Ġdid ta’ Alla (ara Ġw 14,35). Mela min huma ”l-ġarar tal-ħaġar”, iebsa u vojta, jistennew l-inbid abbundanti tal-imħabba?  

 

4. Dan li għamel Ġesù f’Kana tal-Galilija kien l-ewwel wieħed fost is-sinjali tiegħu. Bih wera l-glorja  tiegħu u d-dixxipli tiegħu emmnu fih. Aħna qegħdin ngħixu fi żmien tal-inbid il-ġdid. Din hi s-siegħa ta’ Ġesù. Dawk li “jagħmlu dak li jgħidilhom  hu” jsiru damiġġani ġodda lesti li  jilqgħu b’abbundanza l-Ispirtu tiegħu (ara t-Tieni Qari). Aħna lkoll, minn mistiedna ġejna msejħin biex insiru l-Għarusa - li bħal Marija, Omm Ġesù, “timbotta” l-Għarus fuq quddiem biex jimla “l-ġarar vojta” ta’ żmienna.

 

5. Fit-Tieġ ta’ Kana, Ġesù “wera l-glorja tiegħu” mhux fit-Tempju jew b’riti, imma f’ċirkustanza “profana” ta’ festa tat-tieġ, f’ċirkustanza ta’ ferħ. Meta “waslet is-siegħa” tiegħu[3], wera l-glorja tiegħu fuq is-salib. Min jemmen f’Ġesù jrid ikun kapaċi jara l-glorja tiegħu mhux biss f’okkażjonijiet  straordinarji, lanqas biss fir-riti tal-liturġija, imma wkoll fil-ħajja ta’ kull jum. U jrid ikun kapaċi wkoll jintebaħ bil-bżonnijiet urġenti ta’ ħutu u jagħti glorja lil Alla billi jieqaf magħhom.

 

L-Ispirtu ta’ Alla jaħdem f’kulħadd, għalkemm mhux f’kulħadd bl-istess mod (ara t-Tieni Qari tal-lum). Tkun Nisrani jfisser li tara l-glorja u r-rigal ta’ Alla f’kull bniedem. Mela għaliex naraw tant rivalità u tilwim fil-Komunità Nisranija? Kif nistgħu nissuperaw dan?

 

Aħna għandna rabta intima ma’ Ġesù l-maħbub, tant li nsiru “ġisem wieħed” miegħu, bħar-rabta intima bejn raġel u mara fiż-żwieġ? Nistgħu nikkuntentaw billi sempliċiment “nitgħallmu” fuq Ġesù, flok nitgħallmu lil Ġesu?

 

Marija, omm Ġesù tgħidilna: “Kull ma jgħidilkom agħmluh.” Jista’ jkun li għandna bżonn nisimgħu “Leħen il-Maħbub”[4], naqrawh, nixtarruh, niggustawh u nqiegħdu fil-prattika dak li jgħidilna? Jista’ jkun li anki r-riti tal-Liturġija tagħna, saħansitra s-sagramenti, isiru “riti vojta”? Kif  nistgħu nevitaw li jsir dan?

 

4. Azzjoni: Wara din ir-riflessjoni, irridu nirranġaw jew inżidu xi ħaġa ma’ dak li ħsibna qabel? X’qed jgħidilna nagħmlu issa? Ara l-mistoqsijiet fil-Librett pp.14-15.

 

Għeluq: Nagħlqu b’talb spontanju, il-Missierna u l-Għotja tal-Paċi.