Tema: Profeti ma’ Kristu l-Profeta lesti għal kolllox.

KKK: 574-576, 1816.

Objettiv:  Ara pp.1-2 hawn fuq.

 

 

1. Talba tal-Bidu: Wara l-eżerċizzju tal-Preżenza ta’ Alla u Kant tal-Bidu, it-Talba lill-Ispirtu s-Santu, jew talba oħra spontanja mill-Animatur.

 

2. L-Esperjenza -  Il-Kelma ta’ Alla fil-Ktieb tal-Ħajja (fil-gruppi ż-żgħar)

Wara ħin ta’ skiet ngħaddu biex nirrifletu x’qiegħed jgħidilna Alla fl-esperjenza ta’ ħajjitna:

 

X’tifhem bil-kelma “profeta”? Għad hawn “profeti” fi żmienna? Inti “profeta”?

 

3. Il-Kelma ta’ Alla fl-Evanġelju (fi-grupp il-kbir)

Wara li nisimgħu l-esperjenzi, naqraw bil-mod is-silta tal-Evanġelju:

Lq 4,21-30: Ġesù profeta mkeċċi.

 

Fis- skiet, nistaqsu: X’qed jgħidilna l-Mulej, dwar l-esperjenzi tagħna?

 

Nieħdu r-reazzjonijiet, imbagħad niċċarawhom b’riflessjonijiet mill-librett tal-Mixja tal-Fidi ma’ l-Assemblea tal-Ewwel Ħadd. Fil-Handouts insibu ġabra f’punti fil-qosor.

 

1. Bit-tkeċċija ta’ Ġesù mis-sinagoga ta’ Nazaret, San Luqa jrid jurina dak li ġara matul l-Evanġelju kollu u wkoll dak li ġara fil-mixja tal-ewwel Komunitajiet Insara kif jirrakkontaha fl-Atti tal-Appostli. Il-messaġġ ta’ ħelsien se jibqa’ jiltaqa’ dejjem ma’ reżistenzi kbar u twarrib. X’għandhom jistennew għalihom dawk li jagħżlu li jissieħbu ma’ Ġesù fil-missjoni tiegħu?

 

2. Għaliex Ġesù ġie mkeċċi mis-sinagoga ta’ pajjiżu? L-ewwel ostaklu kien l-Inkarnazzjoni. It-tieni ostaklu kien ix-xewqa tal-mirakli”. Il-poplu stenna messija li jagħmel l-għeġubijiet, messija tal-mirakli. Dawn kien wkoll tnejn mit-tentazzjonijiet tax-xitan, u baqa’ jimsagħhom sa fuq is-salib. Imma Ġesù l-għażla tiegħu kien għamilha u baqa’ fidil lejha sa l-aħħar. Ġesù qatt ma ġie aċċettat mil-Lhud, kif jixhdu wkoll l-Atti tal-Appostli.  L-Evanġelju jrid iwissina li dak li ġara lil Ġesù sa mill-bidu tax-xandir tiegħu f’pajjiżu stess; se jiġri lil min ixandar il-Bxara t-Tajba ta’ Ġesù. L-Evanġelista ġabarhom jurina xi ġralu l-poplu li kellu tant familjaritaÏ ma’ Ġesù ta’ Nazaret. Wasal biex fl-aħħar mill-aħħar iwarrab il-messaġġ ta’ ħelsien ta’ Ġesù u jitlef darba għal dejjem il-kuntatt mas-salvatur u mas-salvazzjoni. Jista’ jigri l-istess lilna wkoll?

 

3. Ħarġuh barra mill-belt. Din hi espressjoni importanti għax tħabbar minn qabel il-mewt ta’ Ġesù. Dak li ġara f’Nazaret sab it-twettiq tiegħu f’Ġerusalemm fejn Ġesù ġie msallab u maqtul minn dawk li ma ridux jaċċettawh. San Luqa matul l-Evanġelju kollu jżomm quddiemna l-perspettiva tas-salib.

 

4. Ġesù huwa bniedem għal kollox ħieles; u l-proċess tal-ħelsien li beda hu ma jistax jitwaqqaf, ukoll jekk jiltaqa’ mal-konflitt u l-persekuzzjoni. Pietru anzi jxandar li “Ġesù għadda jagħmel il-ġid u jfejjaq ’il dawk kollha li kienu maħkuma mix-xitan, għax Alla kien miegħu”[1] .Għal San Luqa, dan kien il-mudell li ispira lil dawk li ħabbru l-Evanġelju wara l-qawmien ta’ Ġesù. Meta l-Bxara t-Tajba ġiet miċħuda mil-Lhud, l-Appostli u dawk li ġew warajhom daru għal mal-pagani. U l-Bxara t-Tajba xterdet mad-dinja kollha.

 

Il-proġett ta’ Ġesù kien li jeħles lill-fqar u lill-imwarrbin (ara l-Evanġelju tal-Ħadd li għadda). Min jirrifjuta jifhem li l-Bxara t-Tajba tingħata lill-fqar, min ma jridx jarahom meħlusin, jippersegwita  lil dawk li jħabbru l-ħelsien tagħhom; u jispiċċa biex iwarrab lilu nnifsu  mil-“lum” ta’ Alla li jaħdem fl-istorja u permezz tal-istorja f’kull żmien.

 

5. Il-ħajja u l-missjoni ta’ profeta qatt ma kienet komda. Għax il-profeti ma jimxux mal-kurrent, anzi sikwit imorru kontra l-kurrent tan-nies ta’ żmienhom. Biex tkun profeta kif kien Ġesù, trid tkun ħieles bħalma kien hu minn kull ma jista’ jfixklek u jorbtok. Aħna lesti nkunu profeti fil-familja, fuq il-post tax-xogħol, fl-arena pubblika, billi nuru fil-beraħ il-konvinzjonijiet tagħna?

 

Jekk jisktu l-profeti veri, li bil-kuraġġ jikxfu u joħorġu għad-dawl is-sitwazzjoni ta’ miżerja tal-bnedmin, allura jkollna nammettu li s-Saltna hi ta’ dawk li jirnexxilhom jaħtfu, li jistagħnew minn fuq il-miżerja tal-oħrajn, u li jġibu fix-xejn il-proġett ta’ Ġesù ta’ dinja fejn il-bnedmin kollha għandhom jiġu stmati bħala  wlied tal-istess Missier.

 

4. Azzjoni: Wara din ir-riflessjoni, irridu nirranġaw jew inżidu xi ħaġa ma’ dak li ħsibna qabel? X’qed jgħidilna nagħmlu issa? Ara l-mistoqsijiet u s-suġġerimenti li nsibu  fil-Librett p.24.

 

Għeluq: Nagħlqu b’talb spontanju, il-Missierna u l-Għotja tal-Paċi, Kant tal-għeluq.