Tema: Feddejja ma’ Kristu l-Feddej. 

KKK: 208,863,897-913.

Objettiv:  Ara pp.1-2 hawn fuq.

 

 

1. Talba tal-Bidu: Wara l-eżerċizzju tal-Preżenza ta’ Alla u Kant tal-Bidu, it-Talba lill-Ispirtu s-Santu, jew talba oħra spontanja mill-Animatur.

 

2. L-Esperjenza -  Il-Kelma ta’ Alla fil-Ktieb tal-Ħajja (fil-gruppi ż-żgħar)

Wara ħin ta’ skiet ngħaddu biex nirrifletu x’qiegħed jgħidilna Alla fl-esperjenza ta’ ħajjitna:

Ġieli ħassejt xi sejħa speċjali minn Alla? Kif ġietek? Kif ntbaħt biha? Kif żviluppat? Kellek tiċċaħħad minn xi ħaġa minħabba fiha?

 

3. Il-Kelma ta’ Alla fl-Evanġelju (fi-grupp il-kbir)

Wara li nisimgħu l-esperjenzi, naqraw bil-mod is-silta tal-Evanġelju:

Lq 5,1-11: X’neħtieġu biex inkunu profeti ma’ Kristu l-Profeta?

 

Fis- skiet, nistaqsu: X’qed jgħidilna l-Mulej, dwar l-esperjenzi tagħna?

 

Nieħdu r-reazzjonijiet, imbagħad niċċarawhom b’riflessjonijiet mill-librett tal-Mixja tal-Fidi ma’ l-Assemblea tal-Ewwel Ħadd. Fil-Handouts insibu ġabra f’punti fil-qosor.

 

N.B. Aqra p.3 ta’ hawn fuq biex tkun tista’ tagħmel referenzi għaliha.

 

1. Is-silta tal-lum titkellem dwar is-sejħa tal-ewwel dixxipli. Ġesù jitla’ fid-dgħajsa ta’ Xmun. Hekk huwa nnifsu jsir wieħed mis-sajjieda frustrati wara lejl jitħabtu għalxejn. Din kienet is-sitwazzjoni tal-poplu li miegħu ltaqa’ Ġesù. Poplu bil-ġuħ għall-Kelma ta’ Alla; poplu li jaħdem biex talinqas jaqla’ x’jiekol; m’għandu xejn x’jagħmel  ħlief jaħsel ix-xbieki, vojta wara lejl xogħol.

 

2. Talbu jaqla’ xi ftit ’il barra. Ġesù ried jinqala’ xi ftit il-barra, mhux biex jitbiegħed mill-poplu, imma biex iżommu quddiem għajnejh; u biex iwasslilhom kelma li tolqothom u tidħol f’ħajjithom, teħlishom minn dak li kien jgħakkishom, u ġġib it-tiġdid.

 

3. Ħa l-pożizzjoni ta’ Mgħallem (bilqiegħda). San Luqa ma jgħidilniex x’għallimhom. Hemm bżonn jgħidilna? X’seta’ jgħid Ġesù lil dan il-poplu frustrat u mkasbar, bilkemm jaqla’ x’jiekol? Nibqgħu żguri, m’għamlilhomx priedki fil-vojt. Aħna x’għandna nxandru lin-nies ta’ żmienna? X’inhu meħtieġ biex inkunu profeti? X’lingwaġġ irridu nużaw biex inwasslu l-Bxara t-Tajba lin-nies tal-lum?

 

 4. “La qiegħed tgħid int, ħa nkala x-xbiek. Pietru laqa’l-Kelma tal-Imgħallem u ried jidħol fi sħab miegħu. Minn issa ’l quddiem l-attenzjoni ta’ Pietru kellha tintefa’ fuq il-Kelma tal-Imgħallem, kelma kapaċi ġġib bidla fil-ħajja prekarja tiegħu u tal-poplu kollu.Ir-riżultat ta’ din il-fiduċja fil-Kelma tal-Imgħallem hu l-bidla sħiħa fis-sitwazzjoni, xi ħaġa li ma kienu qatt jistennew: Qabdu kotra kbira ta’ ħut li x-xbiek tagħhom kien għoddu nqasam. Għalhekk għamlu sinjal lil sħabhom... u mlew iż-żewġ dgħajjes hekk li għal ftit ma għerqux.

 

5. Il-frott tax-xandir u s-smigħ tal-Kelma:

-          “Tbiegħed minni, Mulej.”

-          “Tibżax, minn issa ’l quddiem se taqbad in-nies”.

-          Telqu kollox u marru warajh.

 

Is-smigħ tal-Kelma issa jrid jissarraf f’dixxipulat u missjoni. Il-proġett ta’ Ġesù hu li jeħles il-bnedmin kollha tad-dinja billi jagħtihom il-ħajja bil-kotra. Biex dan iseħħ, huwa jsejjaħ lil dawk kollha li jagħtu attenzjoni lill-Kelma tiegħu u jitilqu kollox biex jimxu warajh. Il-Mulej isejjaħ lilna lkoll, kleru u lajċi,  biex nissieħbu miegħu u nkunu sajjieda tal-bnedmin. Ħadd mhu żejjed fid-dgħajsa ta’ Pietru u kulħadd hu meħtieġ, għax xogħol hemm għal kulħadd. Jista’ wkoll li fil-qadi tal-missjoni tagħna jkollna sitwazzjonijiet fejn insejħu ħaddiema oħra li m’humiex “fid-dgħajsa tagħna”: ”Għamlu sinjal lil sħabhom, li kienu fid-dgħajsa l-oħra, biex jiġu jagħtuhom daqqa ta’ id”.

 

Biex inwettqu sew il-missjoni tagħna, aħna lkoll, kleru u lajċi, għandna bżonn nikkonvertu. Il-missjoni tagħna rridu nwettquha b’sens kbir ta’ umiltaÏ, ma nagħmlux lilna nfusna fuq l-oħrajn, għax il-Mulej ma qegħedniex fuq l-oħrajn. Lanqas ma aħna aħjar minnhom. Ma nitqażżu lil ħadd, ma naqtgħu barra lil ħadd, għax aħna lkoll midinbin. Pjuttost, irridu nħallu lil Ġesù  jaħtafna u jiġbidna bil-personalitaÏ tiegħu, bil-Kelma fejjieda tiegħu u bl-Ispirtu li jsawwab fina l-imħabba tiegħu. Hekk inħarsu lejn l-oħrajn, kif iħares lejhom hu.

 

Nemmnu li Ġesù huwa s-Sid tal-impossibbli, anki meta r-realtaÏ ssir iebsa u mudlama, ħafna ’l fuq mill-ħila u mir-raġunamenti tagħna? Lesti li nġibu ruħna bl-umiltaÏ ta’ Pietru u bil-fiduċja tiegħu f’Ġesù, u naqdfu ’l barra fil-fond u mmiddu x-xbiek?

 

4. Azzjoni: Wara din ir-riflessjoni, irridu nirranġaw jew inżidu xi ħaġa ma’ dak li ħsibna qabel? X’qed jgħidilna nagħmlu issa? Ara l-mistoqsijiet u s-suġġerimenti li nsibu  fil-Librett p.28.

 

Għeluq: Nagħlqu b’talb spontanju, il-Missierna u l-Għotja tal-Paċi, Kant tal-għeluq.