1. Il-Preżenza ta’ Alla: “Ejja Spirtu s-Santu”.

 

2. L-Esperjenza -  Il-Kelma ta’ Alla fil-Ktieb tal-Ħajja:

Kif iċċelebrajt il-Milied fil-familja tiegħek? X’se tagħmel biex Ġesù jibqa’ jikber fil-fil-ħajja tiegħek u fil-familja tiegħek?

 

3. Il-Kelma ta’ Alla fl-Evanġelju: Aqra bil-mod is-silta mill-Evanġelju:

Mt 2,1-12: Is-Salvazzjoni miftuħa għall-bnedmin kollha permezz ta’ Ġesù.

 

Wara ħin ta’ skiet, aħseb u staqsi: X’qed tgħidili, Mulej, fuq l-esperjenzi tiegħi?

 

·          Il-ġrajja tal-Maġi nsibuha biss fl-Evanġelju ta’ San Mattew. Fiha jurina li s-salvazzjoni li ġab Ġesù fit-twelid tiegħu ma ġietx biss għal-Lhud, imma wkoll għall-pagani, rappreżentati mill-“Maġi”.  Iżda, quddiem din il-ġrajja ħadd ma jista’ jibqa’ newtrali, indifferenti. Kemm Lhud u kemm pagani, il-bnedmin kollha, jridu xi darba jew oħra jieħdu pożizzjoni. Ir-rakkont tal-Maġi jagħtina konklużjoni xierqa għall-mixja li għamilna mill-bidu tal-Avvent sal-lum.

 

·          Bil-kelma “Maġi” x’aktarx li l-Evanġelju jifhem xi għorrief-saċerdoti mill-Persja. Meta dawn imxew mal-kewkba u waslu Ġerusalemm bdew jistaqsu għad-direzzjoni fejn twieled is-sultan tal-Lhud. Erodi sema’ b’dan u hu wkoll xtaq ikun jaf il-post. Il-Maġi, jirrappreżentaw lil dawk kollha li għadhom ifittxu lil veru Sultan u Salvatur tad-dinja. Il-mixja tista’ tkun twila u mhux mingħajr xkiel.

 

·          Meta waslu fl-għar, għarfu lil dak li tant fittxew u offrewlu l-aħjar rigali tagħhom: deheb, inċens u mirra. Għal missirijiet il-Knisja dawn ir-rigali għandhom tifsira simbolika: id-deheb - Ġesù hu l-veru sultan; l-inċens – Ġesù hu Alla; il-mirra – Ġesù se jwettaq il-missjoni ta’ salvazzjoni permezz tal-mewt fuq is-salib.

 

·          L-Evanġelju jrid juri li l-veru sultan m’hux Erodi, krudil u għatxan għall-poter. Il-poter għandu postu f’Ġerusalemm, fejn saħansitra r-reliġjon setgħet tintuża biex issaħħaħ il-poter tas-sultan flok tagħti qima lil Alla. Il-veru sultan tal-Lhud hija dik it-Tarbija li għadha kemm twieldet f’Betlehem, il-belt tas-sultan David, ir-Ragħaj tal-Poplu ta’ Alla.

 

·          Meta reġgħu lura ma għaddewx minn Ġerusalemm. Qatgħu kull relazzjoni ma’ Erodi u dak li, skond l-Evanġelju, kien ifisser Erodi - ħakma, ambizzjoni, vjolenza, qerq, qerda: Reġgħu lura minn triq oħra.

 

L-Evanġelju jgħidilna li ġew imwissijin f’ħolma. Aħna lkoll, bħalhom, noħolmu dinja oħra aħjar, dinja ta’ paċi, ta’ solidarjetà, ta’ ġustizzja, ta’ mħabba. Imma spiss ninsewha; jew ngħawġuha biex issir skond ma jgħidilna l-egoiżmu tagħna. It-triq it-tajba hija t-triq li tana Ġesù permezz ta’ ħajtu, fil-qadi lil Alla u lill-bnedmin, bla ma warrab lil ħadd, lanqas lil dawk li sallbuh. Din it-triq Ġesù qed joffrihielna biex insiru “wirt” ta’ Alla u tal-wegħda tiegħu. X’se nwieġbu?

 

·          Il-festa ta’ l-Epifanija trid tfisser is-sejħa li Alla jagħmel lil kull bniedem u lil kull poplu biex jagħrfuh bħala Alla tagħhom u hekk id-dinja ssir spazju dejjem aktar uman u aktar fratern. Din is-sejħa ssir konkreta u mwassla lillna, fil-persuna u l-ħajja ta’Ġesù, l-Iben ta’ Alla. Il-Maġi għarfu li huwa biss Ġesù, il-Mibgħut minn Alla, li seta’ jwettaq il-ħolma li l-bnedmin kollha isiru tassew familja waħda, ulied ta’ Missier wieħed u aħwa ta’ xulxin.

 

·          Erodi fittex li jeqred lit-tarbija ta’ Betlehem. Għaraf fiha theddida għax-xewqat ta’ vendetti u ħakma li bihom qalbu kienet mimlija. Il-ġibda lejn l-għana u s-setgħa – l-“Erodi” ta’ kull żmien – tfixkel lil kull bniedem fil-mixja u t-tfittxija tal-veru hena. Iżda xorta waħda l-ħolma tibqa’ hemm - dik ta’ dinja aħjar, differenti u ma tixbah xejn lid-dinja tas-setgħana, dinja li bdiet fil-preżenza u fil-kelma tat-tarbija ta’ Betlehem. Ilkoll irridu nifhmu li biex il-ħolma ssir realta’, il mixja hi twila, mimlija riskji u reżistenzi, imma hu Alla li qiegħed imexxiha u jweżinha ’l quddiem.

 

·          Il-maġi offrew lill-Bniedem-Alla r-rigali tagħhom. Iżda l-aqwa rigali ma kenux id-deheb, l-inċens u l-mirra, imma l-għotja tagħhom infushom: “U nxteħtu jqimuh”. Din hija d-deċiżjoni li jqimuh bħala Alla tagħhom u joqogħdu għat-tmexxija tiegħu.

 

Il-vera adorazzjoni ta’ dan is-Sultan-Ragħaj ssirx bil-vjolenza,  mill-ħakma ta’ wieħed fuq l-ieħor jew bl-għana u l-flus, lanqas b’reliġjon li tibqa’ biss fuq ġewwa bla bidla fil-ħajja u bla mpenn fl-għemil. Imma billi wieħed jagħti lilu nnifsu lil dan it-Tfajjel ċkejken, li l-ħajja u t-tagħlim tiegħu se jurina r-rieda ta’ Alla u kif ngħixuha f’ħajjitna. Kif se nwieġbu għas-sejħa tiegħu?

 

4. Konverżazzjoni/Azzjoni:  Xi tridni nagħmel, Mulej? Xi tridni nbiddel?     

 

1. Xi tfisser “tadura” lil Alla? Inkunu qed naduraw lil Alla tassew, jekk l-adorazzjoni tagħna ma tissarrafx f’ħajja ta’ impenn għal soċjetà aktar ġusta u fraterna? X’azzjonijiet konkreti tipproponi biex dan l-impenn iseħħ?

3. Hemm x’jinbidel fl-attteġġjament tagħna lejn nies ta’ razez oħra, kulur jew twemmin ieħor, u lejn l-immigranti, “ir-rgħajja” tal-lum fostna?

 

5. Għeluq: Agħmel talba spontanja u itlob “Il-Missierna”.