|
IL-JUM QADDIS TAL-QAWMIEN TAL-MULEJ MILL-IMWIET |
|
|
Sena C- L-GĦID IL-KBIR Mill-Qawmien ta’ Kristu titwieled il-Knisja. L-Ewwel Qari: Atti 10, 34a.37-43: Il-fidi fi Kristu Rxoxt tagħmilna xhiehda tiegħu. It-Tieni Qari: Kol 3, 1-4: Ngħixu l-Qawmien ta’ Kristu, illum issa fit-twettiq definittiv. L-Evanġelju ta’ filgħodu: Ġw 20, 1-9: Il-Komunità tfittex lil Ġesù u tfittex lilha nfisha. - L-imħabba twassalha għall-fidi. L-Evanġelju ta’ filgħaxija: Lq 24, 13-35: Għarfuh fil-qsim tal-ħobż.
L-1 QARI -
Atti
10, 34a, 37-43 F’dak iż-żmien: Pietru qabad jitkellem u qal: “Intom tafu b’dak li ġara mal-Lhudija kollha, ibda mill-Galilija, wara li Ġwanni xandar il-magħmudija: kif Alla kkonsagra ’l Ġesù ta’ Nażaret bl-Ispirtu s-Santu u bil-qawwa, u kif dan Ġesù għadda jagħmel il-ġid u jfejjaq ’il dawk kollha li kienu maħkuma mix-xitan, għax Alla kien miegħu. U aħna xhieda ta’ dak kollu li hu għamel fl-art tal-Lhudija u f’Ġerusalemm. Tawh il-mewt billi dendluh ma’ salib. Imma Alla qajmu mill-imwiet fit-tielet jum u għamel li hu jidher, mhux lil kulħadd, imma lilna, bħala xhieda li Alla għażilna minn qabel, aħna li miegħu kilna u xrobna wara li qam mill-imwiet. Lilna ordnalna biex inxandruh lill-poplu u nixhdu li hu dak li ġie magħmul minn Alla imħallef tal-ħajjin u tal-mejtin. Għalih jagħtu xhieda l-profeti kollha: li kull min jemmen fih jaqla’ f’ismu l-maħfra tad-dnubiet. Il-Kelma tal-Mulej.
SALM RESPONSORJALI - Salm117
Faħħru l-Mulej, għaliex hu tajjeb,
Il-leminija tal-Mulej marret minn fuq,
Il-ġebla li warrbu l-bennejja
Għat-Tieni Qari tingħażel silta mit-tnejn li ġejjin.
IT-2 QARI -
Kol
3, 1-4 Ħuti: Jekk intom irxoxtajtu ma’ Kristu, fittxu l-ħwejjeġ tas-sema, fejn Kristu qiegħed fuq il-lemin ta’ Alla. Aħsbu fil-ħwejjeġ tas-sema, mhux f’dawk ta’ l-art. Għax intom mittu, imma ħajjitkom hi moħbija flimkien ma’ Kristu f’Alla. Meta jidher Kristu, li hu l-ħajja tagħkom, imbagħad intom ukoll tidhru flimkien miegħu fis-sebħ. Il-Kelma tal-Mulej. jew: Qari mill-Ewwel Ittra ta’ San Pawl Appostlu lill-Korintin. (1 Kor 5, 6b-8) Ħuti: Ma tafux li ftit ħmira ttella’ l-għaġna kollha? Naddfu ’l barra l-ħmira l-qadima ħa tkunu għaġna ġdida, kif intom bla ħmira. Il-Ħaruf tal-Għid tagħna, li hu Kristu, hu maqtul. Nagħmlu festa, mela, mhux bil-ħmira l-qadima, anqas bil-ħmira tal-qerq u tal-ħażen, imma bil-ħobż bla ħmira tas-safa u tas-sewwa. Il-Kelma tal-Mulej.
SEKWENZA
F’taqbida tal-għaġeb mal-Ħajja
Għidilna, Marija, ħabbrilna:
“Jien rajt qabar Kristu li rxoxta
Oh, nemmnu li llum Kristu rxoxta
HALLELUJAH
L-EVANĠELJU - Ġw. 20,
1-9 Kien l-ewwel jum tal-ġimgħa, filgħodu kmieni kif kien għadu d-dlam, u Marjam ta’ Magdala ġiet ħdejn il-qabar u rat il-blata mneħħija mill-qabar. Għalhekk telqet tiġri għand Xmun Pietru u għand id-dixxiplu l-ieħor il-maħbub ta’ Ġesù , u qaltilhom: “Qalgħu l-Mulej mill-qabar, u ma nafux fejn qegħduh.” Pietru u d-dixxiplu l-ieħor ħarġu u ġew ħdejn il-qabar. It-tnejn ġrew flimkien, imma d-dixxiplu l-ieħor ħaffef aktar minn Pietru, u laħaq qablu ħdejn il-qabar. Tbaxxa, u ra l-faxex tal-għażel mixħutin hemm, iżda ma daħalx. Imbagħad wasal warajh Xmun Pietru, daħal fil-qabar, u ra l-faxex tal-għażel mixħutin, u l-maktur li kien madwar rasu; dan ma kienx mal-faxex, imma mgeżwer u mixħut għalih. Imbagħad id-dixxiplu l-ieħor, li kien wasal l-ewwel ħdejn il-qabar, daħal wkoll, ra, u emmen. Sa dak in-nhar kienu għadhom ma fehmux l-Iskrittura li kienet tgħid li kellu jqum mill-imwiet. Il-Kelma tal-Mulej.
Fil-Quddiesa ta’ filgħaxija ta’ llum jista’ jinqara
Qari mill-Evanġelju ta’ San Luqa. (Lq 24, 13-35) Dak in-nhar stess fl-ewwel jum tal-ġimgħa tnejn mid-dixxipli kienu sejrin lejn raħal jismu Għemmaws, sittin stadju ’l bogħod minn Ġerusalemm, jitħaddtu bejniethom fuq kulma kien ġara. Huma u jitħaddtu u jistaqsu ’l xulxin, Ġesù nnifsu resaq lejhom u baqa’ miexi magħhom. Imma għajnejhom kellhom xi jżommhom u ma setgħux jagħrfuh. U hu qalilhom: “X’intom titħaddtu bejnietkom intom u mexjin?” U huma waqfu, b’ħarsa ta’ niket fuqhom. Imbagħad wieħed minnhom, jismu Kleofa, wieġeb u qallu: “Int waħdek f’Ġerusalemm il-barrani li ma tafx x’ġara hemmhekk f’dawn il-jiem?” “X’ġara?” staqsiehom. Qalulu: “Fuq Ġesù ta’ Nażaret, li kien profeta, setgħan fl-għemil u fil-kliem quddiem Alla u quddiem il-poplu kollu, kif il-qassisin il-kbar u l-kapijiet tagħna tawh biex ikun ikkundannat għall-mewt u sallbuh. Aħna konna nittamaw li hu kien dak li kellu jifdi lil Israel; iżda mbagħad fuq kollox, ġa għaddew tliet ijiem fuq din il-ġrajja! Issa wkoll xi wħud min-nisa tagħna ħasduna, għax marru kmieni ħdejn il-qabar u l-ġisem tiegħu ma sabuhx, u ġew jgħidu wkoll li dehrulhom xi anġli li qalulhom li hu ħaj. Imbagħad marru ħdejn il-qabar xi wħud minn tagħna u sabu kollox kif kienu qalu n-nisa, imma lilu ma rawhx!” Imbagħad qalilhom Ġesù: “Kemm intom bla għaqal u moħħkom tqil biex temmnu dak kollu li qalu l-profeti! U ma kellux il-Messija jgħaddi minn dawn il-ħwejjeġ u hekk jidħol fil-glorja tiegħu?” U beda minn Mosè u l-profeti kollha ifissrilhom kull ma kien hemm fuqu fl-Iskrittura. Meta qorbu ħdejn ir-raħal fejn kienu sejrin, hu għamel tabirruħu li se jibqa’ sejjer ’il bogħod. Iżda huma riedu jżommuh u qalulu: “Ibqa’ magħna, għax issa sar ħafna ħin u l-jum ġa wasal biex jispiċċa.” Imbagħad daħal joqgħod magħhom. U waqt li kien fil-mejda magħhom, qabad il-ħobż, qasmu u tahulhom. Għajnejhom imbagħad infetħulhom u għarfuh, iżda hu kien għab minn quddiemhom. U wieħed lill-ieħor bdew jgħidu: “Ma kinetx imħeġġa qalbna ġewwa fina waqt li kien qiegħed ikellimna fit-triq u jfissrilna l-Iskrittura?” Dak il-ħin stess qamu u reġgħu lura Ġerusalemm. Hemm sabu l-Ħdax u ’l sħabhom miġburin flimkien, u dawn qalulhom: “Il-Mulej qam tassew, u deher lil Xmun!” U huma wkoll tarrfulhom x’kien ġralhom fit-triq u kif għarfuh fil-qsim tal-ħobż. Il-Kelma tal-Mulej.
|
Matul il-jum tal-Għid, li jkompli fil-Ħdud li ġejjin, aħna ngħixu mill-ġdid l-esperjenza tal-ewwel komunità Nisranija, il-Knisja li titwieled mill-qawmien ta’ Kristu. Filgħodu kmieni, kif kien għadu d-dlam, il-komunità tfittex lil Ġesù ħdejn il-qabar (-Evanġelju ta’ San Ġwann filgħodu), sa ma tiltaqa’ miegħu fit-triq u tagħrfu ferħana fil-qsim tal-ħobż u fil-qsim tal-ħajja flimkien (l-Evanġelju ta’ San Luqa filgħaxija). Hekk, tirxoxta miegħu (it-tieni qari mill-Ittra lill-Kolossin); u tagħti xiehda tiegħu fid-dinja (l-ewwel qari mill-Atti). Il-qari jagħtina l-proċess li rridu nagħmlu biex nimmaturaw fil-fidi. Is-silta hija katekeżi fuq il-Qawmien ta’ Ġesù mill-komunità ta’ Ġwanni. Għal seba’ darbiet tissemma l-kelma qabar, insistenza li tqanqalna biex nieħdu pożizzjoni. Kif se nħarsu lejn il-qabar vojt ta’ Kristu f’Ħadd il-Għid? Ġesù għadu mejjet jew ħaj? Neħtieġu iktar “sinjali” biex nibdew nemmnu?
1. Marija ta’ Magdala - Il-komunità li għadha tfittex lil Ġesù Marija Magdala tirrappreżenta l-komunità li għadha ma tistax tassimila l-mewt ta’ Ġesù. Għadha mifxula, ma tafx fejn taqbad tagħti rasha. Tmur tfittex ħdejn il-qabar, il-post tal-mejtin. Quddiem il-qabar vojt, titkellem f’isem ġemgħa ta’ nies: Qalgħu l-Mulej mill-qabar u ma nafux fejn qegħduh. Tirrappreżenta lil dawk kollha li jaħsbu li l-qabar hu l-post fejn il-proġett ta’ Alla tfarrak u falla. Mal-mewt spiċċa kolox. Kien l-ewwel jum tal-ġimgħa, filgħodu kmieni, kif kien għadu d-dlam. Kien diġà sebaħ il-jum tal-ħolqien il-ġdid, imma għal Marija ta’ Magdala kien għadu d-dlam, għadu bil-lejl. Il-lejl, id-dlam, jirrappreżentaw lid-“dinja” li ċaħdet il-ħajja, li ma emmnitx f’Ġesù (Ara Ġw 1,5; 3,19; 6,17; 12,35). Il-komunità tfittex anzjuża biex issib il-ħajja u l-imħabba, imma xi kultant tfittixhom fejn ma tistax issibhom..
2. Pietru u Ġwanni: Jiġru flimkiem - Jasal l-ewwel min iħobb l-aktar. Iż-żewġ dixxipli wkoll jirrappreżentaw il-komunità. L-Evanġelju jagħti x’jifhem li l-komunità kienet xterrdet (ara 16,32). Marija ta’ Magdala kienet iltaqgħet mat-tnejn waħedhom. Il-ħsieb ta’ San Ġwann jidher ċar: il-komunità ma tistax tingħaqad qabel ma ssib lil Kristu Rxoxt.. Iż-żewġ dixxipli, ħarġu jiġru lejn il-qabar. Imma d-dixxiplu l-ieħor, il-maħbub ta’ Ġesù. . . ħaffef aktar minn Pietru u wasal qablu. Jasal l-ewwel minn iħobb l-aktar. Tbaxxa u ra l-faxex tal-għażel mixħutin hemm, iżda ma daħalx. Ra sinjali ta’ ħajja, imma kien għadu ma interpretax sew dak li ġara. Il-faxex u l-fwejjaħ jistgħu jkunu allużjoni għas-sodda ta’ żwieġ: Għal Ġwanni, id-dixxiplu l-maħbub, il-qabar m’hux il-post tal-mewt, imma laqgħa tal-Mulej mal-Għarusa tiegħu, il-komunità nisranija, li minnu tieħu ħajjitha. Imbagħad wasal warajh Xmun Pietru, daħal fil-qabar. Id-dixxiplu l-maħbub ma jqisx lilu nnifsu ogħla minn Pietru. Għalkemm kien hu li baqa’ ma’ Ġesù sal-aħħar, meta l-oħrajn beżgħu u telqu, ħalla lil Pietru jidħol qablu, ġest ta’ rikonċiljazzjoni u ta’ maħfra, fuq l-eżempju ta’ Ġesù. Pietru daħal fil-qabar, ra l-faxex tal-għażel imqiegħda hemm, u l-maktur li kien madwar rasu, dan ma kienx mal-faxex, imma mitwi u mqiegħed f’post għalih. Dawn id-dettalji juru ċar li ma kienx hemm vjolazzjoni tal-qabar, lanqas serq tal-katavru - il-ħallelin ma kinux se joqogħdu jitwu l-maktur. Ġara xi ħaġa li qatt ma nstemgħet. Imma kien id-dixxiplu l-maħbub biss li seta’ jifhimha u jagħmilha l-oġġett tal-fidi tiegħu: Imbagħad daħal id-dixxiplu l-maħbub, ra, u emmen. Nikbru fil-fidi skond kemm inkunu intimi ma’ Ġesù: id-dixxiplu l-maħbub kien l-istess iwieħed li kien qrib ta’ Ġesù fl-Aħħar Ikla, fil-ħin tal-kundanna tiegħu u sal-mewt fuq is-salib. Ġesù ħall l-irbit tal-mewt. Huwa ħaj. Imiss issa lill-komunità li tagħmel dak li Ġesù kien ordna fil-qawmien ta’ Lazzru: Ħollulu l-faxex u ħalluh imur (Ġw 11,44).
3. Id-dixxipli ta’ Għemmaws: Tqal biex jifhmu - Għarfuh fil-qsim tal-ħobż. L-Evanġelju ta’ Luqa jġib fit-tmiem dan il-Jum. Iż-żewġ dixxipli juru biċ-ċar kif kienet tinsab l-ewwel komunita’ dak in-nhar, mifxula, imxerrda, mitluqa għal għonq it-triq bla direzzjoni, bla tama u bla messaġġ, titbiegħed dejjem iżjed minn Ġerusalemm, il-post fejn Ġesù kien ta x-xiehda tiegħu. Ġesù nnifsu jersaq lejhom u jimxi magħhom fit-triq, ifissrilhom l-Iskrittura, iħeġġilhom qalbhom, jiftħilhom għajnejhom biex jagħrfuh fil-qsim tal-ħobż u fl-għaqda ta’ bejniethom: Dak il-ħin stess qamu u reġgħu lura Ġerusalemm. Hemm sabu l-Ħdax u ’l sħabhom miġburin flimkien, u dawn qalulhom: “Il-Mulej qam tassew u deher lil Xmun!”
Il-qawmien ta’ Ġesù jqanqalna biex nagħmlu mistoqsijiet importanti dwar ħajjitna, kemm personali u wkoll bħala komunità ta’ Kristu fid-dinja ta’ żmienna: X’inhi s-sitwazzjoni tal-ħajja tal-fidi tagħna? Anzjuża, bħal Marija ta’ Magdala, tfittex lil Ġesù fil-qabar? jew bħal Pietru tara s-sinjali u ma tifhimhomx? jew bħal Ġwanni “tara u temmen”? jew, bħad-dixxipli ta’ Għemmaws, imxerrdin, “għajnejna tqal biex nifhmu”, bla tama u bla direzzjoni? Nafu li Ġesù miexi magħna fit-triq, jew għadu “barrani” għalina? Qed jitħeġġu qlubna u jinfetħulna għajnejna fit-tifsir tal-Iskrittura, fil-qsim tal-ħobż u fil-komunjoni ta’ bejnietna? Fejn huma s-sinjali tal-qawmien ta’ Ġesù fostna? X’inhi x-xiehda tal-qawmien tiegħu li qed nagħtu lid-dinja u lis-soċjetà ta’ żmienna? It-tweġibiet għal dawn il-mistoqsijiet jiftħulna t-triq biex inkomplu ngħixu dan il-Jum fil-Ħdud li ġejjin.
|
L-Evanġelju
f’ħajjitna llum -