1. Il-Preżenza ta’ Alla: “Ejja Spirtu s-Santu”.

 

2. L-Esperjenza -  Il-Kelma ta’ Alla fil-Ktieb tal-Ħajja:

X’għandu jfisser għalina li tiċċelebra l-Milied illum?

 

3. Il-Kelma ta’ Alla fl-Evanġelju: Aqra bil-mod is-silta mill-Evanġelju:

Lq 2, 1-21: “Illum, twildilna Salvatur, li hu l-Messija, il-Mulej.”

Wara ħin ta’ skiet, aħseb u staqsi: X’qed tgħidili, Mulej, fuq l-esperjenzi tiegħi?

 

·          Mill-Milied sa l-Ewwel tas-Sena, l-Evanġelju tat-twelid u t-tfulija ta’ Ġesù jilħaq il-qofol tiegħu bit-tħabbira tal-bidu tas-salvazzjoni. B’sengħa mill-isbaħ, San Luqa jirnexxilu jagħtina l-qofol tal-misteru ta’ Ġesù: Min hu Ġesù u x’kienet il-missjoni tiegħu. Imma dan jagħmlu mhux b’mod atratt, intellettwali, iżda  permezz tar-rakkont ta’ storja sempliċi, l-istorja tal-Milied.

 

·          Fl-Evanġelju tiegħu, San Luqa jħobb juża l-kelma “llum”.  Din hi l-ewwel darba; b’kollox jużaha seba’ darbiet oħra, l-aħħar darba jqegħedha fuq fomm Ġesù fuq is-salib: “Illum, tkun fil-Ġenna miegħi” (Lq  23,43). “Illum”, meta  fil-Liturġija jitħabbrilna  t-twelid ta’ Ġesù, aħna ngħixu mill-ġdid din il-ġrajja fis-sitwazzjoni tagħna u fis-sitwazzjoni tad-dinja ta’ żmienna.

 

·          F’Betlehem, “Marija tat lid-dinja l-ewwel iben tagħha, fisqietu u medditu f’maxtura.”  B’dan il-kliem San Luqa jfisser it-twelid ta’ Ġesù fid-dawl tal-ġrajja ewlenija tal-fidi tagħna, il-ġrajja tal-mewt u l-qawmien ta’ Ġesù – it-twelid hu tħabbira minn qabel tal-Għid. Lejn it-tmiem tal-Evanġelju, Luqa jgħidilna li “Ġużeppi ta’ Arimatija . . keffen il-ġisem ta’ Ġesu’ f’liżar u qiegħdu f’qabar” (Lq 23,53).

 

Dan hu Alla tagħna: “Alla Magħna”. Alla sar bniedem biex il-bniedem isir iben Alla: Fi twelidu, imfisqi fiċ-ċraret u mqiegħed f’maxtura; f’mewtu, imfisqi f’liżar u mqiegħed fil-qabar; fl-Ewkaristija, magħmul ħobż u mogħti għall-qadi u l-ikel ta’ dawk li jħobb.

 

·          San Luqa joħloq żewġ kuntrasti importanti. L-ewwel  kuntrast bejn Ġesù, li għadu kif twieled, u l-imperatur Ruman. Dan għamel ċensiment biex jikkontrolla l-popli ta’ taħtu u jikkalkula d-dħul mit-taxxi. Ġesù, “il-Messija u l-Mulej”, min-naħa tiegħu, daħal fl-istorja tal-bnedmin, bħala  tfajjel tarbija, bin “emigranti”, imwarrbin u minsija. Imma Ġesù huwa l-veru Messija u Mulej, mhux Ċesari Awgustu.

 

It-tieni kuntrast, bejn it-twelid ta’ Ġesù u dak ta’ Ġwanni l-Battista (Lq 1,57-66). Ġwanni jitwieled id-dar, Eliżabetta tirċievi żjarat mill-qraba, u l-poplu jbassar il-missjoni li kellu jwettaq. Min-naħa l-oħra, Ġesù jitwieled matul vjaġġ, barra mid-dar, abbandunat u minsi. Iżda l-anġlu ta’ Alla jħabbar l-missjoni tiegħu: dan il-fqir hu s-Salvatur, hu l-Mulej, it-titlu mogħti lil Ġesù wara l-Qawmien mill-mewt!

 

·          L-anġli jagħtu l-aħbar; iżda t-tħabbira ma ssirx lis-setgħana u lill-għonja, imma lir-rgħajja, kategorija ta’ nies fit-tarf tas-soċjetà. Is-Salvatur twieled fost il-fqar, u twieled ta’ fqir, ma’ l-aħħar fost il-bnedmin. Jekk trid is-salvazzjoni tfittixx fost is-setgħana u l-għonja, imma ħares lejn il-fqar. Kristu l-Mulej mhux biss kien magħhom, imma kien ukoll wieħed minnhom – Alla solidali għal kollox mal-aktar imwarbin tad-dinja.

 

Ir-rgħajja għarfuh u emmnu fih; u minn rgħajja tal-merħliet saru ħabbara tas-salvazzjoni ta’ Alla. Reġgħu lura lejn xogħolhom mogħnija b’sens ġdid f’ħajjithom, “isebbħu lil Alla għal dak kollu li kienu raw u semgħu”. L-isess għandu jiġri lilna fiċ-ċelebrazzjoni ta’ dan il-lejl.

 

·          Iċ-ċirkonċiżjoni kienet sinjal li t-tarbija saret tagħmel parti mill-poplu. Hekk ried ikun Kristu l-Mulej, parti mill-għaġna tal-poplu. Permezz ta’ Ġesù, Alla għamel tiegħu l-valuri kollha tal-poplu tiegħu; iżda tahom tifsira u direzzjoni ġdida billi fetaħhom għall-popli kollha tad-dinja: Ġesù - “Alla jsalva”.  Dak kollu li Alla ried iwettaq se jitwettaq permezz ta’ Ġesù.  Aktar ‘il quddiem, Ġesù nnifsu jiddikjara bil-kliem ta’ Isaija: “L-Ispirtu tal-Mulej fuqi. . .  Bagħatni nħabbar il-ħelsien lill-imjassrin, inwassal il-bxara t-tajba lill-fqajrin”  (Lq 4, 18-19).

 

·          Fiċ-ċentru tar-reliġjon tagħna għandna Persuna, mhux idea astratta jew liġi li rridu nagħmlu. Ir-rakkont tat-twelid ta’ Ġesù jagħtina programm u stil ta’ ħajja. “Il-programm...għandu ċ-ċentru tiegħu fi Kristu, li jenħtieġ nagħrfu, inħobbu u nimitaw, biex fih nistgħu ikollna l-ħajja tar-Trinità, u bih inbiddlu l-istorja sakemm din issib il-milja tagħha f’Ġerusalemm tas-sema.”

 

4. Konverżazzjoni/Azzjoni:  Xi tridni nagħmel, Mulej? Xi tridni nbiddel?     

1. X’qiegħed iħabbrilna u xi jrid minna l-Mulej fis-sitwazzjoni tad-dinja u ta’ żmienna llum?

2. X’azzjonijiet konkreti nistgħu nieħdu, biex nagħtu glorja lil Alla u nġibu l-paċi li ħabbru l-anġli llum?

 

5. Għeluq: Agħmel talba spontanja u itlob “Il-Missierna”.