HOME     │     EMAIL     │     IDĦOL FL-ARKIVIJU TA’ DIN IL-PAĠNA      │

L-EWWEL QARI

Żakk 9: 9-10

Dan jgħid il-Mulej: Imtela bil-hena, bint Sijon; agħjat bil-ferħ, bint Ġerusalemm! Ara, s-sultan tiegħek ġej għandek; huwa ġust u rebbieħ, umli u riekeb fuq ħmar, fuq felu ta’ ħmara.

Hu jeqred il-karru minn Efrajm u ż-żiemel minn Ġerusalemm; jinqered il-qaws tal-gwerra. Hu jxandar il-paci lill-ġnus, il-ħakma tiegħu tkun minn baħar sa baħar, u mix-xmara sat-trufijiet ta’ l-art.

 

SALM RESPONSORJALI

Salm 144

Inbierek ismek għal dejjem, Mulej.

Ngħollik, Alla tiegħi, sultan,

u nbierek ismek għal dejjem ta’ dejjem.

Kull jum inbierkek u

nfaħħar ismek għal dejjem ta’ dejjem.  R/.

Il-Mulej tajjeb u ħanin,

idum biex jagħdab u kollu tjieba.

Twajjeb il-Mulej ma’ kulħadd,

u ħnientu akbar minn kull ma għamel. R/

Kull ma għamilt iroddlok ħajr, Mulej,

u ħbiebek iberkuk:

is-sebħ tas-saltna tiegħek ixandru,

fuq is-setgħa tiegħek jitkellmu. R/.

Fidil il-Mulej f’kull kelma tiegħu,

twajjeb fl-għemil tiegħu kollu.

Iwieżen il-Mulej kull min se jaqa’,

u jqajjem ’l kull min imil. R/.

 

IT-TIENI QARI

Rum 8: 9. 11-13

Ħuti: Intom ma tgħixux skond il-ġisem, imma skond l-Ispirtu, ladarba hemm l-Ispirtu ta’ Alla jgħammar fikom. Jekk xi ħadd ma għandux fih l-Ispirtu ta’ Kristu, dan mhuwiex tiegħu. Jekk l-Ispirtu ta’ dak li qajjem lil Ġesù mill-imwiet jgħammar fikom, dak stess li qajjem lil Kristu mill-imwiet iqajjem għall-ħajja wkoll il-ġisem tagħkom li jmut, bis-saħħa ta’ l-Ispirtu tiegħu li jgħammar fikom.

Hekk mela, ħuti, aħna midjunin, imma mhux mal-ġisem biex ngħixu skond il-ġisem. Għax jekk tgħixu skond il-ġisem, tmutu; imma jekk tmewtu bl-Ispirtu l-għemil tal-ġisem, tgħixu.

"Ħudu fuqkom il-madmad tiegħi u tgħallmu minni, għax jiena ta’ qalb ħelwa w umli, u intom issibu mistrieħ għal ruħkom. Għaliex il-madmad tiegħi ħelu u t-toqol tiegħi ħafif."

Hallelujah. Halleluljah.

Infaħħrek, Missier, Sid is-sema u l-art,

li wrejt il-misteri tas-saltna liċ-ċkejknin.

Hallelujah.

L-EVANĠELJU

Mat 10:37-42

F’dak iż-żmien: Ġesù qabad u qal: “Infaħħrek, Missier, Sid is-sema u l-art, talli inti dawn il-ħwejjeġ ħbejthom lil min hu għaref u lil min jifhem, u għarrafthom lil min hu ċkejken. Iva, Missier, għax hekk għoġob lir-rieda tiegħek. Kollox kien mogħti lili minn Missieri, u ħadd ma jagħraf lill-Iben ħlief il-Missier, kif ħadd ma jagħraf lill-Missier ħlief l-Iben u dak li l-Iben irid jgħarrafhulu.

Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-madmad tiegħi u tgħallmu minni, għax jiena ta’ qalb ħelwa w umli, u intom issibu mistrieħ għal ruħkom. Għaliex il-madmad tiegħi ħelu u t-toqol tiegħi ħafif.”

 

    ĦSIBIJIET MILL-EVANĠELJU

Ġesù qabad u qal: “Infaħħrek, Missier, Sid is-sema u l-art...

Kemm drabi fil-ħajja tiegħi faħħart lill-Alla tal-opri kbar tiegħu, jew forsi kull darba li nersaq lejh huwa biss biex nittallab u nitkarrab?

Forsi spiss ngħid it-talba tal-Missierna, imma kemm tassew nirrikonoxxi lil Alla bħala Missieri?  

Alla huwa s-Sid tas-Sema u tal-Art.  Imma bil-mod kif inġibu ruħna spiss ninsew din il-verità.  Il-bniedem spiss jagħmel lilu nnifsu sid tal-ħolqien kollu u jinsa li aħna biss amministraturi tal-ħwejjeġ ta’ madwarna.  Lanqas ta’ dawk il-ħwejjeġ li jiena nqishom personalment tiegħi ma jiena sid assolut, għaliex dawn qegħdin għandi biex nagħmel użu tajjeb minnhom kemm għall-ġid tiegħi kif ukoll tal-oħrajn.  Bħala amministratur tal-ġid tal-dinja, il-bniedem irid iħarsu u jara li dan ikun imqassas b’mod ġust bejn kulħadd.

 

.... inti dawn il-ħwejjeġ ħbejthom lil min hu għaref u lil min jifhem, u għarrafthom lil min hu ċkejken. Iva, Missier, għax hekk għoġob lir-rieda tiegħek.

Fl-innu ta’ Marija nkantaw li Alla “xerred lil dawk li huma mkabbra f’qalb, niżżel lis-setgħana minn fuq it-tron tagħhom u għolla ċ-ċkejknin.”  Iva għaliex Alla jirreżisti lis-supperv u jagħti l-grazzja tiegħu lil min huwa umli. Fil-ħajja stess ta’ Ġesù narawh imdawwar minn persuni umli li ma kellhom ebda pretensjoni, jgħallimhom u jgħidilhom il-ħwejjeġ ta’ Alla, imma lil dawk li kienu jqisu ruħhom bħala l-għorrief, għaliex kienu mkabbra bihom infushom, Ġesù warrabhom u ħadha kontrihom. U jiena ma liema grupp nappartjeni? 

 

Ħadd ma jagħraf lill-Missier ħlief l-Iben u dak li l-Iben irid jgħarrafhulu.

Ħadd ma jista’ jmur għand Alla jekk mhux permezz ta’ Ġesù.  Jekk nippretendi li hemm xi triq oħra li twassal għall-hena ta’ dejjem ħlief dik li jurina Ġesù fl-Evanġelju, allura sejjer imqarraq.  Spiss lil Alla nifħmu kif jidhirli jien. Kif ikun jaqbel lili f’dak il-mument.  Imma Alla huwa wieħed.  Ma jinbidilx.  Huwa dak Alla li kellimna dwaru Ġesù stess.  Kull alla ieħor li nfassal għalija nnifsi huwa alla falz.

 

Ejjew għandi, intom ilkoll li tinsabu mħabbtin u mtaqqlin, u jiena nserraħkom.

Spiss infittxu s-serħan u l-paċi tagħna bnadi oħra.  Imma Ġesù jgħidilna li huwa biss jista jagħtina l-veru ferħ sa minn din il-ħajja. Ġesù ma jwegħdnix ħajja bla salib, imma li fis-salib tagħna huwa se jkun hemm biex magħna jerfa huwa wkoll.  F’Ġesù biss insibu il-mistrieħ ta’ ruħna għaliex kif jgħid huwa stess, il-madsmad tiegħu huwa ħelu u l-piż tiegħu ħafif.