L-EWWEL QARI Dewt 8: 2-3, 14b-16a

F’dak iż-żmien: Mosè kellem lill-poplu u qal: “Ftakar fil-mixja kollha li mexxiek il-Mulej Alla tiegħek matul dawn l-erbgħin sena fid-deżert, biex iċekknek u jġarrbek, ħalli jkun jaf x’għandek f’qalbek, jekk tridx toqgħod għall-kmandamenti tiegħu jew le. Huwa ċekknek, ried li tbati l-ġuħ, imbagħad temgħek il-manna li la int u anqas missirijietek ma kontu tafu biha, biex jurik li mhux bil-ħobż biss jgħix il-bniedem imma b’dak kollu li joħroġ minn fomm il-Mulej, b’dan jgħix il-bniedem.

La tinsiex lill-Mulej Alla tiegħek, li ħarġek mill-art ta’ l-Eġittu, minn dar il-jasar; hu, li mexxiek fid-deżert ta’ l-Eġittu, minn dar il-jasar; hu, li mexxiek fid-deżert il-kbir, deżert tal-biża’ bis-sriep jaħarqu w l-iskorpjuni tiegħu, art niexfa bil-għatx u bla ilma, fejn huwa ħariġlek l-ilma mill-blata żonqrija; hu, li fid-deżert temgħek manna li missirijietek ma kinux jafu biha.”

SALM RESPONSORJALI Salm 147

Sebbaħ, Ġerusalemm, il-Mulej.

Sebbaħ, Ġerusalemm, il-Mulej,

faħħar ’l Alla tiegħek, Sijon.

Hu jsaħħah l-istaneg ta’ bwiebek,

bierek lil uliedek ġo fik. R/.

 

Hu qiegħed is-sliem lil truf artek,

u bl-aħjar qamħ ixebbgħek.

Jibgħat il-kmand tiegħu fuq l-art,

kelmtu ħafifa tiġri ma’ kullimkien. R/.

 

Hu jxandar kelmtu lil Ġakob,

il-preċetti u l-liġijiet tiegħu lil Israel.

Ma’ ebda poplu ma għamel hekk,

il-liġijiet tiegħu ma għarrafhomlhomx. R/.

 

IT-TIENI QARI 1 Korintin 10: 16-17

Ħuti: Il-kalċi mbierek li fuqu ngħidu l-barka mhuwiex xirka mad-demm ta’ Kristu?  Il-ħobż li naqsmu mhuwiex xirka mal-ġisem ta’ Kristu? Għax la l-ħobża hi waħda, aħna, li aħna ħafna, aħna ġisem wieħed; għax minn ħobża waħda nieħdu sehem, ilkoll kemm aħna.

ĦSIBIJIET MILL-EVANĠELJU

 “Min jiekol ġismi u jixrob demmi jibqa’ fija u jiena fih”.

L-erba’ Evanġelji lkoll jagħtu importanza kbira lill-miraklu tat-tkattir tal-ħobż b’referenza ċara għall-Ewkaristija. Il-ġrajja tal-miraklu ma setgħetx ma tfakkarx lill-folla tal-Lhud fil-miraklu tal-manna, il-ħobż nieżel mis-sema, li MoseÏ kien tahom jieklu  fid-deżert fi żmien l-Eżodu. Iżjed u iżjed, billi l-miraklu tat-tkattir tal-ħobz kien sar qrib il-Għid, il-festa tal-Lhud (Ġw 6,4), meta fis-sinagogi kienu jinqraw is-siltiet dwar l-Eżodu mir-Rabta l-Qadima.

Ġesù jiġbor flimkien  iż-żewġ ġrajjiet  -  dik tat-tkattir tal-ħobz u l-ġrajja tal-manna fid-deżert - bħala parabboli biex ifisser hu min hu (Jiena hu),  x’inhi l-missjoni tiegħu u x’irid jagħmel fina li nemmnu fih (il-ħobż tal-ħajja).

Mill-ġrajja tal-manna, Ġesù mbagħad jgħaddi għal ġrajja oħra mill-Eżodu, dik tal-ikla tal-ħaruf u d-demm imraxxax tiegħu mal-għetiebi tal-Lhud  - “sinjali”’ tal-ħelsien mill-jasar u mill-mewt tal-poplu u bidu tal-mixja lejn l-Art Imwiegħda: Min jiekol ġismi u jixrob demmi għandu l-ħajja ta’ dejjem u jiena nqajmu mill-imwiet fl-aħħar jum.

1.       “Jiena hu l-ħobż ħaj li niżel mis-sema. . .  U l-ħobż li jiena nagħti huwa ġismi għall-ħajja tad-dinja.”

Il-Lhud ma fehmux il-parabbola: Fuq hekk il-Lhud ma qablux bejniethom, u bdew jgħidu: “Kif jista’ dan jagħtina ġismu biex nikluh?”  Ħasbu li kien se jagħtihom jieklu l-laħam ta’ wieħed mejjet u jixorbulu demmu, xi ħaġa mill-aktar moqżieża, u mhux biss għal-Lhud. Iżda Ġesù insista: Fis-sewwa, fis-sewwa ngħidilkom, jekk ma tiklux il-ġisem ta’ Bin il-Bniedem u ma tixorbux demmu, ma jkollkomx il-ħajja fikom.”

Il-kelma ġisem f’San Ġwann għandha tifsira ħafna aktar wiesgħa minn dik li nagħtuha fl-ilsna moderni. Il-ġisem huwa l-bniedem innifsu bl-istorja ta’ ħajtu. Il-Ġisem ta’ Kristu  huwa Kristu nnifsu bil-ħajja storika tiegħu, b’dak li għamel u għallem, mudell u ħajja tal-ħajja tagħna. Li “tiekol il-Ġisem ta’ Kristu” u “tixrob Demmu” tfisser tagħmel tiegħek l-imħabba li esprima f’ħajtu (Dan huwa Ġismi li jingħata) u f’mewtu (Dan huwa Demmi li jixxerred)

Aqra l-ħsieb sħiħ