Wara l-Qtil ta’ Terry Schiavo

Il-każ tal-qtil ta’ Terry Schiavo reġa’ għal darba oħra tella’ fil-wiċċ il-kwestjoni dwar l-ewtanasja, jew kif inhuwa komunement magħruf, mercy killing – litteralment qtil ta’ ħniena; daqslikieku xi ħaġa ħażina fiha nfisha tista’ qatt issir tajba għaliex magħmula bi skop tajjeb!

Nixtieq qabel xejn ngħid li ħadd minna ma jista’ qatt jiġġudika l-ħtija jew nuqqas ta’ ħtija li l-persuni involuti f’dawn il-każi jista’ jkollhom. Alla biss huwa l-imħallef ġust u ħanin u għalhekk kull ġudiżżju nħalluh f’idejħ.  Aħna nistgħu biss nitkellmu dwar il-moralità tal-azzjoni fiha nfisha bla ma naslu għal xi konklużżjoni dwar jekk il-bniedem hux ħati nkella le.

Il-Konċilju Vatikan II, fil-Kostituzzjoni Pastorali dwar il-Knisja fid-Dinja tal-Lum, Gaudium et Spes, jgħid ċar u tond li dak kollu li huwa kontra l-ħajja, bħal kull xorta ta’ qtil tal-bniedem, il-ġenoċidju, l-abort, l-ewtanasja u s-suwiċidju volontarju, huwa ħażin. (27)

Imbagħad fil-Katekiżmu tal-Knisja Kattolika (2276 sa 2279) naqraw li huma x’inhuma l-motivi u l-mezzi, l-ewtanasja diretta li sseħħ meta wieħed itemm il-ħajja ta’ persuna ħandikappata, jew marida, jew qegħda tmut, moralment ma tistax tiġi aċċettata.

Alla biss huwa s-sid tal-ħajja u għalhekk ħadd ma għandu d-dritt li jtemm la l-ħajja ta’ ħaddieħor u lanqas tiegħu stess.  Ħajjitna mhix tagħna.  Hi biss mislufa lilna u aħna stess m’għandna ebda dritt fuqha.

Tassew li t-tbatija mhix xi ħaġa li wieħed jixtieqha.  Ġesù stess talab lil Missier biex jekk jista’ jkun jitwarrab minnu il-kalċi tal-passjoni u l-mewt li kienu riesqa lejh. Iżda għaliex Ġesù għadda wkoll mit-triq tas-salib, allura għalina l-insara t-tbatija tikseb tifsira speċjali.  Hija tbatija li ma tintilifx fix-xejn imma fiha skop għaliex tifdi.  Hija tbatija redentiva.  U għalhekk meta l-bniedem ikun qiegħed isofri taħt it-toqol tal-mard, m’għandux iħares lejħ innifsu bħala oġġett inutli, xi ħaġa li ma tiswa għal xejn.  Anzi meta norbtu t-tbatijiet tagħna ma’ dawk ta’ Ġesù dawn jiksbu tifsira tassew speċjali.

Il-ħajja hija dritt ta’ kull bniedem.  Iżda għaliex kull dritt iġib miegħu ukoll dmir, aħna obligati li nħarsu ħajjitna u kif ukoll dik ta’ l-oħrajn. Dan ifisser li ħadd minna ma jista’ jagħmel ewtanasja jew b’xi mod jgħin biex din titwettaq.  Lanqas nagħtu l-kunsens tagħna għaliha ma nistgħu.

Madankollu il-ħajja mhix valur assolut u hu propju għalhekk li wieħed jista’ jħalli ħajtu għal ħaddieħor.  Ġesù mhux biss qal li m’hemmx imħabba akbar minn dik li wieħed jagħti ħajtu għall-oħrajn, imma kien huwa stess li għamel dan.

Matul l-istorja naraw tant u tant persuni oħrajn li b’att erojku ħallew ħajjithom biex oħrajn ikun salvati.  Imbagħad hemm il-martri li mietu, u anke fi żmienna għadhom imutu, għal fidi tagħhom.  Anke dan ma jmurx kontra l-valur tal-ħajja, għaliex Ġesù qal li min jitlef ħajtu għall-imħabba tiegħu isibha fil-ħajja ta’ dejjem.

U hu għaliex hemm ħajja oħra wara l-mewt li l-ħajja li għandna hawn fuq l-art irridu napprezzawha. Wara kollox din hija don ta’ Alla u kull min ma japprezzax rigal lanqas japprezza lil dak li tah ir-rigal.

L-Adorazjoni Ewkaristika f’San Bert

Sitt xhur ilu, eżattament fis-16 ta’ Ottubru 2004, fil-parroċca tagħna kienet bdiet inizjattiva ġdida.  Fl-okkażżjoni tas-Sena ta’ l-Ewkaristija, imħabbra mill-Papa Ġwanni Pawlu II, il-kappella ta’ San Bert bdiet tkun miftuħa għal diversi siegħat kuljum biex aħna nkunu nistgħu mmorru nagħmlu ftit ħin ta’ adorazjoni u talb privat quddiem Ġesù.  “Ejjew,” kien stedinna l-Papa “niskopru l-għana ta’ l-Ewkaristija fil-ħajja tagħna u tal-Knisja.”

Anke llum Ġesù għadu jistedinna, “Ejjew għandi intom lkoll li tinsabu imħabbtin u mtaqqlin u jiena nserraħkom.”  Qatt ippruvajt int ukoll biex tara kemm huwa tassew ta’ kelmtu l-Mulej?

Ħajr tar-ritratt lis-Sinjuri Alfred u Clyde Abela >>>