|
Festa
tal-Qaddisin Kollha
u l-Għid ta’ l-Imwiet
Nhar it-Tlieta, 1 ta’ Novembru,
il-Knisja Kattolika tiċċelebra is-solennità tal-Qaddisin kollha.
Il-Knisja tgħallem li l-qaddisin, mhumiex biss dawk li ġej kanoniżżati
mill-Knisja u li allura sejħulhom bit-titolu San jew Santa, imma huma
dawk il-mejtin kollha li qegħdin il-ġenna, jgawdu il-viżżjoni
beatifika ta’ Alla. Fost dawn hemm żgur għadd kbir ta’ persuni li
matul ħajjithom kienu ħbieb jew qraba tagħna.
Hemm rabta kbira bejnna, il-membri
tal-Knisja li għadna ħajjin, bejn il-qaddisin tal-ġenna u bejn
l-erwieħ li hemm jissaffew fil-purgatorju. Din ir-rabta ġejja
mill-fatt li aħna lkoll nagħmlu parti mill-Ġisem Mistiku ta’ Kristu li
hu l-Knisja.
Matul l-ewwel żminijiet tal-Knisja,
l-insara kollha kienu jissejħu qaddisin.
Għalkemm f’dan il-jum m’hemmx
obbligu tas-smiegħ tal-quddies, madankollu aħna mħeġġin nieħdu sehem
fiċ-ċelebrazzjoni ewkaristika (il-quddiesa)
Imbagħad l-Erbgħa, 2 ta’ Novembru
huwa l-Għid ta’ l-Imwiet, li fih niftakkru iktar milli f’jiem oħra
fl-erwieħ tal-mejtin. Matul din il-ġurnata, il-quddies fil-knisja
parrokkjali jibda’ fil-5.30am u jkun kull nofs siegħa sat-8.00am.
Imbaghad ikun hemm quddiesa oħra fis-6.00pm.
L-Ewwel
Enċiklika
tal-Papa Benedittu XVI
Vatikan:
Il-Papa Benedittu XVI temm jikteb l-ewwel enċiklika tiegħu f’dan
il-pontifikat. Sorsi qrib il-Vatikan qalu li din l-enċiklika
hija mistennija fil-bidu ta’ Diċembru li ġej. L-istess sorsi tkellmu ma’
l-aġenzija Catholic News Service u qalu li l-enċiklika fiha madwar 46
paġna li jiffukaw fuq meditazzjoni spiritwali dwar l-imħabba u l-kelma
t’Alla, u u kif dawn it-tnejn huma marbuta mal-persuna ta’ Kristu.
 Ara
aktar dettalji minn Karl Wright, RTK...
 Griżma
tal-Isqof fil-Parroċċa
Tarxien, Ħadd, 30
Ottubru 2005: Il-bieraħ u llum, 100 tifel u tifla mill-Parroċċa ta’
Ħal Tarxien irċevew is-Sagrament tal-Konfermazzjoni jew kif hu magħruf
popolarment, il-Griżma tal-Isqof.
Il-bieraħ, kienu
konfermati dawk it-tfal li kienu jattendu ċ-ċentri tad-duttrina ta’ Dar
Nażaret u ta’ Simmons Avenue. Illum kien imiss lit-tfal li kienu
jattendu l-MUSEUM tas-subien u tal-bniet, kif ukoll iċ-ċentru
tal-Agostinjani.
Kull nisrani jirċievi
l-Ispirtu s-Santu fil-Magħmudija, imma bis-Sagrament tal-Griżma, aħna
nġeddu personalment dawk il-wegħdiet li l-ġenituri u l-parriniet tagħna
kien għamlu f’isimna dak in-nhar tal-Magħmudija. Għalhekk hija xewqa
tal-Knisja li s-Sagrament tal-Konfirmazzjoni jkun amministrat meta
in-nisrani jkun laħaq sewwa l-użu tar-raġuni b’mod li jkun jaf sewwa
x’qed jirċievi.
Tifkira tal-Konsagrazzjoni tal-Knisja Parrokkjali
Tarxien, 30 Ottubru
2005: Illum
il-liturġija ċelebrata fil-knisja parrokkjali ta’ Ħal Tarxien fakkret
il-konsagrazzjoni tal-knisja. Il-konsagrazzjoni ta’ knisja tfisser li
dan il-post ġie magħżul bħala post sagru għall-qima lil Alla u li
għalhekk, kemm bl-imġieba u kif ukoll bl-ilbies tagħna għandna nuru
r-rispett li hu mistħoqq post qaddis.
L-Arċisqof lura mis-Sinodu tal-Isqfijiet
 Mdina:
L-Arċisqof
Ġużeppi Mercieca irritorna lura Malta wara li ħa sehem fis-Sinodu
tal-Isqfijiet li sar fil-Vatikan.
Waqt is-sinodu, li
kellu t-tema
“L-Ewkaristija: għajn u quċċata tal-ħajja u tal-missjoni tal-Knisja.”,
l-Arċisqof Mercieca tkellem dwar it-tifsir ta’ l-espressjoni “kult
ewkaristiku” u spjega li din l-espressjoni tħaddan fiha l-atti ta’
venerazzjoni lejn l-Ewkaristija li jsiru barra l-Quddiesa, bħalma huma
l-adorazzjoni Ewkaristika, il-Kwaranturi u l-festa ta’ Corpus, li fiha
wieħed juri l-fidi tiegħu fid-divinta’ ta’ Ġesu’, Alla u bniedem,
fil-ħobż u l-inbid konsagrati li jibqgħu wara t-Tqarbin u l-adorazzjoni.
Quddiesa mill-Arċisqof għall-Ħaddiema Mejtin
Valletta: Monsinjur Arċisqof Ġużeppi Mercieca se jmexxi
Quddiesa Konċelebrata b’suffraġju għall-ħaddiema li mietu fuq il-post
tax-xogħol tagħhom, nhar l-Erbgħa, 2 ta’ Novembru 2005,
fil-KonKattidral ta’ San Ġwann, Valletta, fis-6.00 p.m.
Għall-Quddiesa huwa mistieden kulħadd, b’mod speċjali l-membri
tal-familji tal-ħaddiema li tilfu ħajjithom fuq il-post tax-xogħol
fl-aħħar tliet snin, sħabhom ħaddiema, dawk li kienu jħaddmuhom u
l-membri tal-unions tal-ħaddiema.
|
