MIET ĠWANNI PAWLU L-KBIR Ġwanni Pawlu II beda l-aħħar vjaġġ tiegħu fuq il-muntanja tal-Mulej

Ruma, 2 April 2004 - Komunikat tal-kelliem tal-Vatikan Navarro Valls għadu kif ħabbar uffiċċjalment li l-Papa Karol Jòsef Wojtyla miet fid-9.37 tal-lejla. Bla dubju ta’ xejn huwa għad irid jitniżżel fil-kotba ta’ l-istorja bħala Ġwanni Pawlu l-Kbir.

Wara pontifikat ta’ 26 sena li matulhom Ġwanni Pawlu II terraq mal-pajjiżi kollha tad-dinja, illum huwa ta bidu għall-vjaġġ aħħari tiegħu li jwasslu fi ħdan il-Mulej, li huwa tant ħabb u li tiegħu huwa kien il-Vigarju fl-art.

Żgur li l-Madonna, li fil-bidu tal-potifikat tiegħu huwa ddikkjara ruħu “Kollni Tiegħek” kienet hija stess li wasslitu fi ħdan binha Ġesù.

Karol Jòsef Wojtyla twieled fit-18 ta’ Mejju, 1920 f’Wadowice, belt żgħira daqs ħamsin kilometru ‘l bogħod minn Krakovja fil-Polonja.  Kien it-tieni iben ta’ Karol Wojtyla, ex-uffiċċjal fl-armata Pollakka u Emilia Kaczorowska, għalliema.  Ommu mietet fl-1929 meta huwa kellu biss 9 snin u ħuh Edmund, li kien tabib, miet 1932. Missieru miet fl-1941.

Ta’ disa’ snin, iċ-ċkejken Karol irċieva l-ewwel tqarbina imbagħad disa’ snin wara rċieva s-sagrament tal-Griżma ta’ l-Isqof.

Fl-1939, meta l-armata Nażista kienet tokkupa l-Polonja, l-università fejn Karol kien qed jistudja kienet magħluqa u huwa ħadem l-ewwel f’barriera (1940-1944) u wara f’fabbrika.

Fl-1942 daħal fis-Seminarju klandestin ta’ Krakovja waqt li fl-istess żmien kien wieħed minn dawk li ħa sehem f’teatru, klandestin ukoll, li kien kritiku għall-inġustizzji soċjali ta’ żmienu.  Kien ordnat saċerdot fl-1 ta’ Novembru 1946.

Fl-1958 kien maħtur isqof awżiljarju ta’ Krakovja u fl-1964 kien nominat Arcisqof ta’l-istess djoċesi.  Kellu sehem attiv fil-Konċilju Vatikan II b’mod speċjali fit-tfassil tal-Kostituzzjoni Gaudium et Spes, li titratta dwar ir-relazzjoni tal-Knisja mad-dinja. 

Fl-1967, il-Papa Pawlu VI għamlu kardinal, u fis-16 ta’ Ottubru 1978, wara l-mewt tal-Papa Ġwanni Pawlu I, il-kardinali għażluh minn fosthom biex ikun il-Papa li jmexxi l-Knisja Kattolika lejn millenju ġdid.

Fit-13 ta’ Mejju 1981, f’attentat li sar fuq ħajtu, huwa safa ferut gravi minn tir ta’ pistola sparat lejh minn Ali Agca, li l-Papa mhux biss ħafirlu imma wkoll mar iżuru fil-ħabs.

Fost il-104 vista pastorali li għamel barra mill-Italja, Ġwanni Pawlu II żar pajjiżna darbtejn u f’okkażżjoni oħra għamel waqfa qasir fl-ajruport, waqt li kien fi triqtu lejn pajjiż ieħor.

Matul is-26 sena ta’ pontifikat tiegħu huwa kiteb aktar minn 80 dokument uffiċċjali, fosthom 14 l-enċiklika u ppublika wkoll 5 kotba. Iżda żgur se jibqa’ magħruf għall għadd kbir ta’ kanonizazjonjet u beatifikazjonijiet li mexxa.  Minbarra il-miljuni li rawh wiċċ imb’wicc waqt il-vjaġġi pastorali tiegħu, statistika uffiċċjali maħruġa mill-Vatikan tgħid li kważi 18-il miljun persuna attendew għal xi waħda mill-uddjenzi tiegħu ta’ nhar t’Erbgħa.

Ġwanni Pawlu II għamel 232 kardinali fosthom wieħed li sal-lum għadu miżmum in pectore, li jfisser li għal xi raġuni jew oħra ismu kien għadu magħruf biss mill-papa nnifsu u għalhekk jekk il-papa jilħaq imut bla ma jħabbar isem dan il-prelat, allura is-sigriet imut miegħu.  Huma dawn l-istess kardinali, li f’każ tal-mewt tal-Papa, jaħtru minn fosthom lis-suċċessur tiegħu li jrid imexxi l-Knisja għaż-żmien li ġej.

Żgur li mhix b’kumbinazzjoni li l-papa miet fil-vġili tal-festa tal-Ħniena Divina, li huwa stess waqqaf u li kienet tant għal qalbu.  Ta’ min jinnota li t-tieni enċiklika ta’ Ġwanni Pawlu kienet Dives in Misericordia – Għani fil-Ħniena propju dwar il-Ħniena Divina ta’ Alla.