KUNGRESS EWKARISTIKU NAZZJONALI

FL-OKKAŻJONI TAS-SENA TA’

L-EWKARISTIJA

Ħamis, 2 Ġunju 2005: Fl-okkażjoni tas-Sena ta’ l-Ewkaristija, l-Arċidjoċesi ta’ Malta u d-Djoċesi ta’ Għawdex qed jorganizaw Kungress Ewkaristiku Nazzjonali li jilħaq il-quċċata tiegħu b’ċelebrazzjoni fuq il-Fosos tal-Floriana, nhar il-Ġimgħa, 3 ta’ Ġunju 2005, fis-7.30p.m. bis-sehem ta’ l-Isqfijiet.

Il-programm ta’ l-attivitajiet f’Malta fetaħ uffiċjalment nhar il-Ħadd, 29 ta’ Mejju, b’Quddiesa fil-KonKattidral ta’ San Ġwann fis-6.00 p.m. Wara l-Quddiesa saret purċissjoni fit-toroq ewlenin tal-Belt Valletta. Imbagħad il-Kungress f’Malta kompla b’sitt ta’ laqgħat għas-saċerdoti, reliġjużi nisa u lajċi fis-Seminarju ta’ l-Arċisqof, f’ Tal-Virtu’, ir-Rabat.

Bħala parti mill-attivitajiet ta’ l-okkażjoni se ssir ukoll laqgħa għat-tfal, nhar il-Ġimgħa, 27 ta’ Mejju, fl-10.00 a.m. fil-Knisja ta’ Santa Tereża, Birkirkara. Il-laqgħa se titmexxa minn Dun Raphael Pace, li jmexxi programm għat-tfal fuq Radju RTK. Jattendi wkoll Mons. Arċisqof Ġużeppi Mercieca.

Interessanti ħafna hija wirja dwar Mirakli tal-Ewkaristija li hemm fis-Semnarju tal-Arċisqof ir-Rabat.  Fil-wirja wieħed jista’ jara wkoll diversi biċċiet tal-arti kollha relatati mal-istess suġġett, fosthom il-miraklu li seħħ fl-Lanciano ġewwa l-Italja fit-tmien seklu.  Dak in-nhar saċerdot li kellu dubji ta’ fidi dwar il-preżenza reali ta’ Ġesú fl-Ewkaristija, inħasad meta waqt il-quddiesa jilmaħ il-ħobż u l-inbid jinbidlu quddiem għajnejh f’laħam u d-demm uman.  Minkejja li għaddew diversi mijiet ta’ snin, dawn għadhom jidhru sal-lum.  Saru fuqhom diversi eżamijiet xjentifiċi u kien stabbilit li l-laħam huwa tassew magħmul minn tessuti ta’ qalb umana fil-waqt li d-demm huwa ta’ tip AB, l-istess bħal dak ta’ diversi mirakli Ewkaristiċi oħra kif ukoll l-istess bħal dak fuq il-kefen ta’ Kristu li hemm meqjum f’Turin.

Minkejja li dawn il-mirakli ma jagħmlux parti mit-twemmin tagħna, madankollu huma jistgħu jkunu mezz biex jgħinuna nikbru fil-fidi u fil-qima lejn dan is-Sagrament tant għażiz għalina l-Insara.