|
Ta’
23 sena ġie ordnat saċerdot Anglikan u erba’ snin wara nħatar
Kurat ta’ St. Mary’s, il-knisja ta’ l-Università f’Oxford fejn
ta xhieda ta’ twemminu, l-aktar bil-mod kif kien jippriedka.
Fl-1837 ħareġ l-Uffiċċju Profetiku tal-Knisja li aktar
tard sar magħruf bħala Via Media, li fih jipprova juri li
l-Anglikaniżmu kien it-triq tan-nofs bejn
il-Kattoliċiżmu u l-Protestantiżmu popolari.
Ftit jafu li fost il-ħafna vjaġġi li għamel Newman żar
il-Ġibiltà u anki Malta. Kien ftit wara dan li kiteb il-poeżija
famuża “Lead, kindly light”, li aktar tard saret innu
popolari.
Fl-1842 ġara avveniment importanti li biddillu ħajtu: iddeċieda
li jirtira f’Littlemore, u baqa’ jgħix hemmhekk taħt
il-kundizzjonijiet monastiċi flimkien ma’ grupp żgħir ta’
dixxipli. Lil dawn id-dixxipli tahom il-biċċa xogħol li jiktbu
l-ħajja ta’ xi qaddisin Ingliżi, filwaqt li hu kiteb: “Essay
on the development of Christian doctrine”.
B’din huwa
pprova jerġa’ jitħabbeb mal-Kredu kif imħaddan mill-Knisja
Kattolika. Sena wara, ippubblika stqarrija fl-Oxford
Conservative Journal, fejn irtira formalment dak kollu li
kien qal kontra Ruma(fosthom li l-belt hija sabiħa imma r-reliġjon
tagħha hija waħda deġenerata u mhix twemmin f’Alla wieħed).
Wieħed mid-dixxipli
tiegħu hawnhekk ħallieh imma John Henry Newman iddeċieda li kien
wasal iż-żmien li jippriedka l-aħħar priedka Anglikana tiegħu
f’Littlemore u jirriżenja minn Kurat.
Fid- 9 ta’
Ottubru, 1845 Newman ġie milqugħ fil-Knisja Kattolika minn Patri
Dominic. Din il-bxara ma ntlaqgħetx tajjeb mill-Ingliżi u
kellhom jgħaddu ħafna snin qabel ma ħafruhielu.
Sena wara
telaq lejn Ruma u ddeċieda li jimxi wara r-regoli ta’ San
Filippu Neri, li tiegħu Newman ried iwaqqaf Oratorju f’Londra.
Fl-1879 il-Papa Ljun XIII ħatru Kardinal. Il-motto fuq l-arma
tiegħu kien “Cor ad cor loquitur” (qalb tkellem lil
qalb). Ħafna żmien qabel Newman kien iddikjara “li kien ilu
ħajtu kollha kontra l-Liberaliżmu li jagħraf li m’hemmx verità
fir-reliġjon imma li kull twemmin hu bħal kull ieħor, u li
l-Kristjaneżmu hu biss sentiment u gost, imma mhux fatt
oġġettiv, mhux mirakoluż”.
Wara dan reġa’ dar dawra mal-kitbiet kollha tiegħu bl-aħħar
waħda tkun dwar xi problemi li wieħed isib il-Bibbja. Il-kitba
Il-Ħolma ta’ Ġeronzju(1865) qalibha fil-vers poetiku, u
hi meqjusa fl-istess klassi tal-versi u ħsibijiet ta’ Dante,
fejn iħares lejn l-aħħar pellegrinaġġ tiegħu bħala “waħdi
mal-Waħdieni”.
Miet fit-tbatija, fil-11 ta’ Awwissu, 1890.
Il-funeral tiegħu kien wieħed mill-akbar li qatt saru. Ġie
midfun fl-istess qabar ta’ Ambrose St.John, li kien għenu “jgħix
taħt Alla għal 32 sena”.
Fuq
l-iħama hemm miktub hekk: “Mid-dellijiet u mis-simboli
toħroġ il-verità”. Ġie ddikjarat Venerabbli mill-Papa
Ġwanni Pawlu II fit- 22 ta’Jannar 1991. Ta’ min jinnota li
l-ħsibijiet tal-Kardinal John Henry Newman influwenzaw bis-sħiħ
il-Konċilju Vatikan II partikolarment fl-ekkleżjoloġija,
l-ekunemiżmu, it-teorija ta’ l-iżvilupp dottrinali, il-kuxjenza
u
l-lajċi. |
