MESSAĠĠ MILL-KAPPILLAN IL-ĠDID

Dan l-ewwel messaġġ tiegħi lilkom, għeżież Tarxiniżi, qed niktibulkom f'mument privileġġjat fil-ħajja tal-Knisja f'pajjiżna: wara konsultazzjoni ma' numru kbir ta' nies, diskussjonijiet fit-tul, u approvazzjoni tad-dokumenti bħala frott ta' dawn, issa qegħdin fil-fażi tat-twettieq tas-Sinodu Djoċesan. Diġà kull parroċċa, inkluża dik tagħna, fasslet pjan pastorali għas-sentejn li ġejjin. Issa jmiss li lkoll kemm aħna nxammru l-kmiem biex is-suġġerimenti li saru minnkom u f'isimkom nibdew narawhom jieħdu l-ħajja għall-ġid ta' kulħadd.

Quddiem dan kollu, responsabbiltà partikulari taqa' fuqi bħala kappillan; kappillan TAGĦKOM, għaliex huwa mingħand l-Arċisqof li jien irċevejt dan il-mandat; kappillan GĦALIKOM, għaliex bħas-saċerdoti l-oħra fil-parroċċa nixtieq inkun qrib ta' min hu żgħir u ta' min hu kbir, ta' min jiflaħ u ta' min ma jiflaħx, ta' min iħoss ħafna entużjażmu u ta' min imtela bil-qrusa, ta' min dejjem fuq quddiem u ta' min dejjem fuq wara; kappillan MAGĦKOM, għaliex nemmen bis-sħiħ li l-komunità parrokkjali tinbena bis-sehem ta' tant persuni li t-talenti u l-kariżmi tagħhom joħorġuhom għad-dawl. Hawnhekk ma nistax ma niħux l-okkażjoni biex nuri l-apprezzament tiegħi għall-ħidma tal-kappillani li mexxew din il-parroċċa, u mhux inqas lil Dun Karm Mercieca, li għal dawn l-aħħar disa' snin kien ir-ragħaj li b'dedikazzjoni mhux żgħira mexxa l-komunità parrokkjali ta' Ħal Tarxien.

B'dawn is-sentimenti nwasslilkom din l-ewwel kelma tiegħi. Nittama li fis-snin li ġejjin jien inkun ta' servizz għal kull wieħed u għal kull waħda minnkom biex flimkien inkomplu ninbnew f'komunità li togħġob lill-Mulej u lil Marija.

Fr Renè Vella

Kappillan

IL-PAPA QIEGĦED L-ISPTAR

Frar, 2, 2005 - Il-Papa Ġwanni Pawlu II għadda lejl ta’ mistrieħ fil-poliklinika Ġemelli ġewwa Ruma, fejn il-bieraħ stess kien meħud b’urġenza minħabba diffikultajiet respiratorji. Il-ġimgħa li għaddiet, il-papa, li llum għandu 84 sena, kellu jħassar l-udjenza ġenerali tiegħu ta’ kull nhar ta’ Erbgħa minħabba problemi intestinali, waqt li t-Tnejn, 31 ta’ Jannar ikkanċella l-appuntamenti kollha tiegħu minħabba dak li l-Vatikan iddeskriva bħala ‘attakk ħafif ta’ influwenza’.

Il-Ħadd li għadda, il-Papa, flimkien ma’ tifel u tifla, tajjar żewġ ħammimiet bojod mit-tieqa tal-appartament tiegħu bħala sinjal ta’ paċi lid-dinja.

Din mhix l-ewwel darba li Ġwanni Pawlu II kien rikoverat fil-klinika Ġemelli. F’Mejju tal-1981 huwa kien ittieħed l-isptar wara attentat fuq ħajtu fi sparatura li seħħet fi Pjazza San Pietru.  Min dak in-nhar sal-lum huwa ttieħed l-isptar f’ta l-inqas sitt okkażżjonijiet oħra.

Il-kattoliċi huma mħeġga biex fit-talb tagħhom jiftakru kontinwament fil-Papa Ġwanni Pawlu II, għaliex bħala mexxej tal-Knisja, huwa wkoll il-Missier Spiritwali tagħna lkoll.

Adorazzjoni Ewkaristika f'San Bert

Matul dawn l-aħħar ġimgħat, il-Kappella ta’ San Bert, qegħda ftit, ftit issir il-post fejn diversi persuni qed imorru jagħmlu ftit ħin ta’ skiet fil-preżenza ta’ Ġesu’ fl-Ewkaristija.

Il-Papa ħeġġeġ sabiex matul din is-sena Ewkaristika, li bdiet f’Ottubru li għadda, l-adorazzjoni Ewkaristika barra mill-quddiesa, ssir impenn partikolari ta’ kull parroċċa.  “Ejjew insibu l-ħin”, kiteb il-Papa, “sabiex ninżlu għarkubtejna quddiem Ġesù preżenti fl-Ewkaristija u npattu bil-fidi u bl-imħabba tagħna għal dawk l-atti ta’ traskuraġni u negliġenza u anke insulti, li s-Salvatur tagħna jirċievi f’bosta partijiet tad-dinja.”

Il-kappella qed tkun miftuħa mit-Tnejn sas-Sibt, bejn is-6.30 u l-10.00 ta’ filgħodu u bejn 6.30 u d-9.00 ta’ filgħaxija.

Ġesù qiegħed jistiednek biex tasal wasla int ukoll.