Tarxien Parish

Vatikan: Il-ġuħ u nuqqas ta’ nutriment, li minħabba fihom tant miljuni ta’ persuni qed ikollhom l-istess eżistenta tagħhom minaċċata, mhumiex biss kaġunati minn raġunijiet ġeografiċi u klimatiċi, jew minn ċirkustanzi ħżiena għal ħsad tal-prodotti agrikoli. Ħafna drabi l-kaġun huwa l-bniedem nnifsu, l-egoiżmu tiegħu u r-riġidità ta’ strutturi ekonomiċi, li spiss, l-għan uniku tagħhom huwa il-profitt.

Hekk kiteb il-Papa Benedittu XVI, f’messaġġ tiegħu fl-okkażżjoni tas-sittin anniversarju tal-aġenzija tal-Ġnus Magħquda, il-F.A.O. Huwa kompla igħid li dan fost l-agħar skandli li qed jaffettwaw il-familja umana u jeħtieġ l-attenzjoni immedjata tal-komunità internazzjonali.

Ara t-test sħih...

“Agħtuhom intom jieklu...”

Malli beda jikser il-jum, resqu t-tnax u qalu lil Ġesù: “Itlaq il-ġemgħa biex imorru fir-rħula tal-qrib u fir-raba’, biex isibu fejn jgħaddu l-lejl u x’jieklu, għax hawn qegħdin fi mkien imwarrab.” Qalilhom: “Agħtuhom intom jieklu.” Qalulu: “Ma għandniex aktar minn ħames ħobżiet u żewġ ħutiet, jekk m’għandniex immorru aħna nixtru l-ikel għal dal-poplu kollu.” Kienu madwar ħamest elef. Qal lid-dixxipli tiegħu: “Ġegħluhom joqogħdu fi qtajja’ ta’ xi ħamsin-il waħda.” Hekk għamlu, u ġiegħlu ‘l kulħadd joqgħod.

Imbagħad qabad il-ħames ħobżiet u ż-żewġ ħutiet, refa’ għajnejh lejn is-sema, berikhom, kisirhom u tahom lid-dixxipli biex inewlu lill-ġemgħa.” U kielu u xebgħu kollha, u refgħu mill-fdal tagħhom tnax-il qoffa bċejjeċ.

Luqa 9:12 - 17

"Il-Kattoliċi u l-Lhud għandhom jagħtu xhieda komuni lid-dinja tal-fidi tagħhom f'Alla"

Minn Karl Wright, RTK

Vatikan: Il-Papa Benedittu XVI qal li l-kattoliċi u l-Lhud mhux biss għandhom jirrispettaw u jifhmu lil xulxin, iżda għandhom ukoll jagħtu xhieda komuni lid-dinja tal-fidi tagħhom f’Alla u fil-kmandamenti tiegħu. F’messaġġ li nqara waqt ċerimonja kommemorattiva ta’ l-40 anniversarju tad-dikjarazzjoni tal-Konċilju Vatikan II Nostra Aetate, il-Papa appella għal xhieda aktar maqgħuda u fl-istess hin mifruxa. Huwa fisser li huma meħtieġa sforzi konġunti għad-difiża tal-qdusija tal-ħajja, għall-promozzjoni tad-dinjita umana, għad-drittijiet tal-familji u għall-ħtieġa tal-binja ta’ kultura ta’ ġustizzja fid-dinja kif ukoll għal aktar rikonċiljazzjoni u paċi fost il-ġenerazzjonijiet futuri.

Id-dikjarazzjoni tal-Konċilju Vatikan II Nostra Aetate, hija dikjarazzjoni dwar ir-relazzjoni ma’ dawk li mhumiex insara. F’għeluq l-40 sena anniversarju ta’ din id-dikjarazzjoni saret din iċ-ċerimonja sponsorjata mill-kummisjoni tal-Vatikan għar-relazzjonijiet reliġjużi mal-Lhud, attivita li ħarset ukoll lejn il-progress li sar fid-djalogu bejn il-Kattoliċi u l-Lhud, kif ukoll lejn il-possibiltajiet ta’ aktar promozzjoni f’dan il-qasam fil-futur.

(Fir-ritratt il-Papa jidher mar-Rabbi Natanael Teitelbaum fis-sinagoga ta' Cologne, 18 ta' Awissu 2005)

Rabta Speċjali mal-Lhud u l-Istima lejn il-Musulmani

Mill-programm id-Dinja Kattolika, RTK

Il-Papa enfasiżża r-Rabta Speċjali mal-Lhud u l-Istima lejn il-Musulmani u s-segwaċi ta’ reliġjonijiet oħra waqt waħda mill-aħħar riflessjonijiet pubbliċi tiegħu fi pjazza San Pietru fil-Vatikan. Il-Papa afferma wkoll li s-sors ewlieni ta’ edukazzjoni hija l-familja u fakkar fir-responsabbilta’ edukattiva tal-Knisja Kattolika, dik li turi t-triq tal-ħajja. Ma naqasx milli jesprimi s-solidarjeta tiegħu mal-vittmi fil-Kashmir u appella lil dawk kollha ta’ rieda tajba sabiex jagħtu l-appoġġ tagħhom, mhux biss materjalment lil dawk kollha fil-bżonn, iżda wkoll spiritwalment permezz tat-talb.

(Ritratt – Ġwanni Pawli II kien l-ewwel Papa li żar Moskea. Dan kien fis-6 ta’ Mejju 2001, ġewwa Damasku, propju jumejn qabel wasal Malta.)

LITURĠIJA

TAL-ĦDUD U FESTI

6 Novembru 2005

Il-32 Ħadd ta’ Matul is-Sena

"Ishru, mela, għaliex la tafu l-jum u anqas is-siegħa."

13 Novembru 2005

Il-33 Ħadd ta’ Matul is-Sena

"Sewwa, qaddej tajjeb u fidil; int kont fidil fil-ftit, u jien se nafdalek ħafna: idħol fil-hena ta’ sidek."

20 Novembru 2005

Kristu Sultan

Il-34 Ħadd ta’ Matul is-Sena

"Tassew ngħidilkom, kemm għamiltu ma’ wieħed mill-iżgħar fost dawn ħuti, għamiltuh miegħi."

Il-Papa sejjer Spanja

Spanja: Il-president tal-Kunsill Pontifiċju għall-Familja, il-kardinal Alfonso Lopez Truijillo, qal li b’ċertezza jista’ jikkonferma li l-Papa se jivjaġġa lejn Valencia fi Spanja u jattendi għall-5 Laqgħa Dinjija ddedikata lill-Familji.

Il-kardinal Alfonso Lopez Truijillo ta din il-konferma waqt kummenti li kien qed jagħti waqt laqgħa ma’ saċerdoti u koppji miżżewġa, ilkoll mill-arċidjoċesi ta’ Valencia fi Spanja, li huma responsabbli għall-kura pastorali tal-familja. Dawn ir-rapporti ngħataw mill-aġenzija ta’ l-aħbarijiet djoċesana AVAN.

Il-laqgħa dinjija ddedikata lill-familji se tkun qed issir bejn l-1 u d-9 ta’ Lulju li ġej. Il-kardinal Lopez Truijillo qal ukoll li l-parroċċi madwar id-dinja kollha ma jdumux ma jibdew jirċevu materjal bi tħejjija għal din l-attivita dinjija.

(Mill-programm id-Dinja Kattolika, RTK)