MESSAĠĠ MILL-KAPPILLAN IL-ĠDID

Dan l-ewwel messaġġ tiegħi lilkom, għeżież Tarxiniżi, qed niktibulkom f'mument privileġġjat fil-ħajja tal-Knisja f'pajjiżna: wara konsultazzjoni ma' numru kbir ta' nies, diskussjonijiet fit-tul, u approvazzjoni tad-dokumenti bħala frott ta' dawn, issa qegħdin fil-fażi tat-twettieq tas-Sinodu Djoċesan. Diġà kull parroċċa, inkluża dik tagħna, fasslet pjan pastorali għas-sentejn li ġejjin. Issa jmiss li lkoll kemm aħna nxammru l-kmiem biex is-suġġerimenti li saru minnkom u f'isimkom nibdew narawhom jieħdu l-ħajja għall-ġid ta' kulħadd.

Quddiem dan kollu, responsabbiltà partikulari taqa' fuqi bħala kappillan; kappillan TAGĦKOM, għaliex huwa mingħand l-Arċisqof li jien irċevejt dan il-mandat; kappillan GĦALIKOM, għaliex bħas-saċerdoti l-oħra fil-parroċċa nixtieq inkun qrib ta' min hu żgħir u ta' min hu kbir, ta' min jiflaħ u ta' min ma jiflaħx, ta' min iħoss ħafna entużjażmu u ta' min imtela bil-qrusa, ta' min dejjem fuq quddiem u ta' min dejjem fuq wara; kappillan MAGĦKOM, għaliex nemmen bis-sħiħ li l-komunità parrokkjali tinbena bis-sehem ta' tant persuni li t-talenti u l-kariżmi tagħhom joħorġuhom għad-dawl. Hawnhekk ma nistax ma niħux l-okkażjoni biex nuri l-apprezzament tiegħi għall-ħidma tal-kappillani li mexxew din il-parroċċa, u mhux inqas lil Dun Karm Mercieca, li għal dawn l-aħħar disa' snin kien ir-ragħaj li b'dedikazzjoni mhux żgħira mexxa l-komunità parrokkjali ta' Ħal Tarxien.

B'dawn is-sentimenti nwasslilkom din l-ewwel kelma tiegħi. Nittama li fis-snin li ġejjin jien inkun ta' servizz għal kull wieħed u għal kull waħda minnkom biex flimkien inkomplu ninbnew f'komunità li togħġob lill-Mulej u lil Marija.

Fr Renè Vella

Kappillan

IL-PAPA JBIEREK IL-FOLLA MIT-TIEQA TAL-ISPTAR

Frar, 6, 2005: B’sorpriża għal dawk kollha miġbura barra il-poliklinika Ġemelli, il-Papa Ġwanni Pawlu II deher għal ftit mumenti fit-tieqa tal-appartament fejn bħal issa qiegħed għal kura wara li xi jiem ilu ddaħħal b’urġenza minħabba attakk ta’ l-influwenza li kkawżalu kumplikazzjonijiet fis-sistema respiratorja.

Kif il-papa tfaċċa fit-tieqa qamet kommozzjoni kbira fil-folla mdaqqsa, imbagħad Mons Sandri qara messaġġ, fejn il-papa qal li anke mis-sodda tal-isptar huwa ser jibqa’ fis-servizz tal-Knisja. Fl-aħħar il-papa nnifsu ta l-barka tiegħu, imma mill-ftit kliem li tenna, deher kemm il-vuċi tiegħu hi għajjiena u leħnu batut.

Adorazzjoni Ewkaristika f'San Bert

Matul dawn l-aħħar ġimgħat, il-Kappella ta’ San Bert, qegħda ftit, ftit issir il-post fejn diversi persuni qed imorru jagħmlu ftit ħin ta’ skiet fil-preżenza ta’ Ġesu’ fl-Ewkaristija.

Il-Papa ħeġġeġ sabiex matul din is-sena Ewkaristika, li bdiet f’Ottubru li għadda, l-adorazzjoni Ewkaristika barra mill-quddiesa, ssir impenn partikolari ta’ kull parroċċa.  “Ejjew insibu l-ħin”, kiteb il-Papa, “sabiex ninżlu għarkubtejna quddiem Ġesù preżenti fl-Ewkaristija u npattu bil-fidi u bl-imħabba tagħna għal dawk l-atti ta’ traskuraġni u negliġenza u anke insulti, li s-Salvatur tagħna jirċievi f’bosta partijiet tad-dinja.”

Il-kappella qed tkun miftuħa mit-Tnejn sas-Sibt, bejn is-6.30 u l-10.00 ta’ filgħodu u bejn 6.30 u d-9.00 ta’ filgħaxija.

Ġesù qiegħed jistiednek biex tasal wasla int ukoll.