FIL-ĦLEWWA TA’ MEJJU,

L-OMM TAGĦNA, MARIJA

Ma jistax jonqos li x-xahar ta’ Mejju jfakkarna f’Marija, Omm Ġesù u Ommna lkoll. Dan ma jfissirx li lill-Madonna għandna niftakru fiha biss matul dan ix-xahar, imma f’Mejju, aktar minn xhur oħra, il-Knisja tħeġġiġna biex nersqu aktar mis-soltu lejn din ommna tas-sema.

Ir-rabta ta’ Mejju ma’ Marija hija waħda naturali għaliex matul dan ix-xahar infakkru wkoll Jum l-Omm. U jekk aħna, b’sinjal ta’ mħabba niftakru iktar mis-soltu fl-ommijiet naturali tagħna, kemm jekk dawn huma ħajjin kif ukoll jekk mejtin, allura kemm iktar għandna nsellmu b’mod speċjali lil dik il-mara, li Kristu stess, minn fuq is-salib ħalliha b’ommna lkoll. 

Għada Jum l-Omm Ukoll

Ħadd, 8 ta’ Mejju 2005: Fit-tieni Ħadd ta’ Mejju, infakkru Jum l-Omm. Bħal bosta jiem oħra, anke din l-okkażżjoni ċċapset b’aspett kummerċjali esaġerat. Spiss jiġri li għax nixtru xi rigal, żgħir jew kbir għal ommna, inserrħu l-kuxjenza u naħsbu li għal din is-sena id-dover tagħna wettaqnih.

U hekk nistennew li jerġa jasal Jum l-Omm ta’ sena oħra biex dak in-nhar nerġgħu nagħmlu l-istess. Jekk jasal!  U jekk ma jasalx, aħna wkoll, bħal bosta oħrajn immorru ċ-ċimiterju u flok rigal nieħdu xi bukkett fjuri u xi xema għal fuq qabarha.   Hemmhekk forsi nintebħu li issa huwa tard wisq biex lill-ommna nuruha l-veru mħabba u rispett li suppost urejniha f’ħajjitha - mhux biss f’Jum l-Omm, imma fil-jiem kollha tas-sena. 

Għalhekk, jekk għadek fiċ-ċans, ibda’ llum stess, imma imbagħad toqgħodx tistenna sena oħra tasal.  Għax għada Jum l-Omm ukoll.

IL-PALLIUM TA' BENEDITTU XVI Fiċ-ċerimonja inawgurali tal-papa l-ġdid, ċerimonja mimlija simboliżmu, Benedittu XVI għażel li pallium li jilbes jerġa jmur għat-tifsila oriġinali tiegħu kif tidher fl-ikoni antiki. Mir-ritratti wieħed malajr jintebaħ bid-differenza bejn il-pallium li kien juża Ġwanni Pawlu II u dak li libes Benedittu XVI. Is-simboliżmu spjegah il-papa nnifsu fl-omelija tal-quddiesa inawgurali tiegħu.  Jintlibes u l-ispallejn u magħmul mis-suf tan-nagħaġ, spjega il-papa, il-pallium iffakkru li huwa jrid ikun bħar-Ragħaj it-tajjeb li joħroġ ifittex lin-ngħaġa l-mitlufa, lil dik għajjiena jew batuta u jerfaħha fuq spallejh. Wara fisser ukoll is-simboliżmu li hemm fiċ-ċerimonja tal-għoti taċ-Ċurkett tas-Sajjied. Dan ifakkru f’Pietru, is-sajjied li wara lejl sħiħ waħedhom u ma qabdu xejn, imma b’Ġesù magħhom qabdu kotra kbira ta’ ħut. “Hekk kif nimxu wara Kristu, f’din il-missjoni tagħna li nkunu sajjieda tal-bnedmin, irridu nerfgħuhom minn dan il-baħar mielaħ b’kull xorta ta’ aljenazzjoni u ntellgħhom fuq l-art, fejn hemm id-dawl ta’ Alla.”