Tarxien Parish

Vatikan: Il-Papa Benedittu XVI qed jagħti Indulġenza Plenarja għas-Solennita' ta' l-Immakulata Kunċizzjoni (8 ta' Dicembru 2005). Id-Digriet jgħid li t-8 ta' Dicembru jimmarka l-40 sena minn meta l-Qaddej ta' Alla, l-Papa Pawlu VI, f’għeluq il-Konċilju Vatikan II iddedika tifħir kbir lill-Verġni Marija li, bħala Omm Kristu, hija Omm Alla u l-omm spiritwali tagħna lkoll.

“F’din is-Solennita’, il-Papa Benedittu XVI, waqt li jfaħħar pubblikament lil Marija Immakulata, minn qalbu jixtieq li l-Knisja kollha tingħaqad miegħu, sabiex dawk kollha li jemmnu, magħqudin f’isem l-Omm komuni, jissaħħu fil-fidi, jikbru fid-devozzjoni lejn Kristu, u jħobbu lil ħuthom billi jitħeġġu aktar fil-karita’. Minn dan – kif għallem b’tant għaqal il-Konċilju Vatikan II – jinbtu ħidmiet ta’ ħniena lejn dawk fil-bżonn, l-osservanza tal-ġustizzja, u d-difiża u t-tfittxija għall-paċi,” jgħid iid-digriet.

Għal din ir-raġuni, il-Papa kkonċeda d-don ta’ Indulġenza Plenarja bil-kundizzjonijiet normali tas-soltu: Qrara sagramentali, Tqarbina u talba skond l-intenzjoni tal-Papa. L-Indulġenza Plenarja tista’ tinkiseb minn dawk li, b’ruħ
meħlusa mir-rabta mad-dnub, fis-Solennita’ ta’ l-Immakulata Kunċizzjoni ta’ din is-sena jieħdu sehem f’ċelebrazzjoni liturġika f’ġieh il-Verġni Marija, jew
għallinqas joffru xiehda bil-miftuħ ta’ devozzjoni Marjana quddiem xbiha ta’ Marija Immakulata li tkun għall-qima tan-nies, waqt li jgħidu wkoll il-Missierna u l-Kredu u xi invokazzjoni lil Marija.

Dawk li minħabba mard jew raġuni oħra ġusta ma jistgħux joħorġu minn djarhom, jistgħu jiksbu l-Indulġenza Plenarja fi djarhom stess, jew fejn ikunu qegħdin, jekk jingħaqdu fl-ispirtu u x-xewqa tal-Papa f’talb lil Marija Immakulata, u jgħidu l-Missierna u l-Kredu. F’dawn il-każi, barra li jridu jkunu b’ruħ meħlusa minn kull forma ta’ dnub, il-persuni konċernati jrid ukoll ikollhom l-intenzjoni li josservaw ilkundizzjonijiet normali għall-Indulġenza Plenarja, l-iktar kmieni possibbli.

IL- PRESEPJU TA' MANWELI

Tarxien: Ta' kull sena Emanuel Axiaq itella presepju ferm artistiku u kbir fil-garaxx tiegħu f'Ħal Tarxien. Dan il-presepju li fih medda ta' 165 pied kwadru hu maħdum kollu mill-ġablo, ġibs u kolla.
B'esperjenza ta’ 40 sena fil-qasam tal-presepji, din is-sena Manuel irnexxielu joħloq xeni ferm oriġinali li jolqtu l-għajn ta' kull min iżur dan il-presepju. Il-pasturi, li b'kreativita' ħoloq b'idejh dan l-artist, ikomplu jżejnu b'armonija dan il-presepju. hu ċertament presepju ta' kalibru, li l-artist kapaċi joħloq b'tant interess u dedikazzjoni. Għalhekk ta' kull sena, mijiet ta' delettanti u saħansitra turisti, jżommu l-appuntament tagħhom mal-presepju ta' Ħal Tarxien.
Il-presepju li jinsab f' Għimmanu-EL, Triq Karlu Maratta, Ħal Tarxien, ikun miftuħ mis-16 ta’ Diċembru sat-3 ta’ Jannar. Il-ħin tal-wiri huwa kuljum mill-5:00 p.m. sat- 8:00 p.m. Fil-Ħdud u festi jkun miftuħ mill-10:00 a.m. sa 12:00a.m. u mit-3:00p.m. sat- 8:00p.m.