MESSAĠĠ MILL-KAPPILLAN IL-ĠDID

Dan l-ewwel messaġġ tiegħi lilkom, għeżież Tarxiniżi, qed niktibulkom f'mument privileġġjat fil-ħajja tal-Knisja f'pajjiżna: wara konsultazzjoni ma' numru kbir ta' nies, diskussjonijiet fit-tul, u approvazzjoni tad-dokumenti bħala frott ta' dawn, issa qegħdin fil-fażi tat-twettieq tas-Sinodu Djoċesan. Diġà kull parroċċa, inkluża dik tagħna, fasslet pjan pastorali għas-sentejn li ġejjin. Issa jmiss li lkoll kemm aħna nxammru l-kmiem biex is-suġġerimenti li saru minnkom u f'isimkom nibdew narawhom jieħdu l-ħajja għall-ġid ta' kulħadd.

Quddiem dan kollu, responsabbiltà partikulari taqa' fuqi bħala kappillan; kappillan TAGĦKOM, għaliex huwa mingħand l-Arċisqof li jien irċevejt dan il-mandat; kappillan GĦALIKOM, għaliex bħas-saċerdoti l-oħra fil-parroċċa nixtieq inkun qrib ta' min hu żgħir u ta' min hu kbir, ta' min jiflaħ u ta' min ma jiflaħx, ta' min iħoss ħafna entużjażmu u ta' min imtela bil-qrusa, ta' min dejjem fuq quddiem u ta' min dejjem fuq wara; kappillan MAGĦKOM, għaliex nemmen bis-sħiħ li l-komunità parrokkjali tinbena bis-sehem ta' tant persuni li t-talenti u l-kariżmi tagħhom joħorġuhom għad-dawl. Hawnhekk ma nistax ma niħux l-okkażjoni biex nuri l-apprezzament tiegħi għall-ħidma tal-kappillani li mexxew din il-parroċċa, u mhux inqas lil Dun Karm Mercieca, li għal dawn l-aħħar disa' snin kien ir-ragħaj li b'dedikazzjoni mhux żgħira mexxa l-komunità parrokkjali ta' Ħal Tarxien.

B'dawn is-sentimenti nwasslilkom din l-ewwel kelma tiegħi. Nittama li fis-snin li ġejjin jien inkun ta' servizz għal kull wieħed u għal kull waħda minnkom biex flimkien inkomplu ninbnew f'komunità li togħġob lill-Mulej u lil Marija.

Fr Renè Vella

Kappillan

IL-PAPA LURA FIL-VATIKAN

Ruma, 10 ta’ Frar 2005 – Wara għaxar t’ijiem ta’ rikoveru fil-poliklinika Ġemelli, illejla il-Papa Ġwanni Pawlu II rritorna lura fil-Vatikan.  Fil-popemobile li wasslitu lura kien hemm ukoll is-Segretarju tal-Istat, il-Kardinal Angelo Sodano kif ukoll is-Segretarju privat tal-papa, l-Arċisqof Stanislao Dziwisz.

Il-bieraħ, tfajjel marid li qiegħed rikoverat ukoll fl-istess poliklinika żar lill-Papa fl-appartament tiegħu u rċieva minn għandu barka speċjali, li Ġwanni Pawlu nnifsu talbu biex jgħaddiha lit-tfal kollha l-oħra li hemm fl-istess sptar.

Il-Ħadd li għadda f’nofsinhar, il-ħin li normalment il-Papa jżomm l-appuntament regolari tiegħu ta’ kull ġimgħa għat-talba tal-Angelus, huwa tfaċċa għal ftit minuti mit-tieqa tal-appartament fil-poliklinika, minn fejn wara li inqara l-messaġġ tiegħu minn Mons Sandri, Ġwanni Pawlu nnifsu ta l-barka appostolika tiegħu.