Bil-miġja tal-Ispirtu s-Santu, il-Komunità  żgħira ta’ dixxipli saret il-Knisja ta’ Ġesù u bdiet il-mixja tagħha fid-dinja. L-Evanġelju ta’ San Ġwann jimposta l-ġrajja fl-Ewwel Jum tal-Ġimgħa, jum il-qawmien ta’ Ġesù. San Luqa, fil-Ktieb tal-Atti tal-Appostli, iqiegħed il-ġrajja  f’Għid il-Ħamsin, il-jum li fih il-Lhud kienu jiċċelebraw il-festa tat-twaqqif tal-Poplu ta’ Alla bil-Patt tas-Sinaj, meta l-Mulej niżel fuq il-muntanja fin-nar (Eż 19).

Ġwanni (fl-Evanġelju) u Luqa (fl-Atti) għandhom perspettiva differenti; iżda l-għan tagħhom hu l-istess. It-tnejn juru li l-Ispirtu, li ta qawwa lil Ġesù fil-missjoni tiegħu li jxandar u jwettaq is-Saltna ta’ Alla, huwa l-istess Spirtu li issa jkompli jsaħħaħ il-Knisja fl-istess missjoni mad-dinja kollha u sal-aħħar taż-żmien. Dak li Ġwanni jgħidilna li ġara fis-satra taċ-ċenaklu, bil-bibien magħluqa, Luqa juri l-effett tiegħu fil-beraħ f’Ġerusalemm quddiem folla ta’ nies, li kienu ġew hemm minn kull nazzjon li hawn taħt is-sema.

L-EWWEL TQARBINA FIL-PARROĊĊA

Tarxien, 14 Mejju 2005: Illum, għall-Parroċca ta’ Ħal Tarxien huwa jum speċjali mhux biss għaliex bħal kumplament tal-Knisja Kattolika qegħdin niċċelebraw l-ewwel inżul ta’ l-Ispirtu s-Santu fuq il-Knisja, imma wkoll għaliex għadd ta’ tfal, ulied din il-parroċċa se jirċievu għall-ewwel darba lill-Ġesù fl-Ewkaristija.

Din l-okkażżjoni hija dejjem waħda speċjali mhux għal dawn it-tfal biss u ghall-familji tagħhom, imma għall-parroċċa kollha għaliex, iktar persuni fi ħdanha se jibda’ jkollhom iċ-ċans li huma wkoll jiltaqgħu kuljum personalment ma’ Ġesú fis-Sagrament ta’ l-Ewkaristija.

Imma din is-sena l-Ewwel Tqarbina hija okkażżjoni speċjali doppjament għaliex aħna lkoll, mal-Knisja kollha qegħdin fis-sena, dikjarata mill-maħbub Papa Ġwanni Pawlu II bħala sena tal-Ewkaristija.

Għalhekk ejjew aħna lkoll, flimkien ma’ dawn it-tfal u mal-familji tagħhom, niskopru mill-ġdid l-għana kbira li tfisser l-Ewkaristija fil-ħajja tal-Knisja kollha u fil-ħajja tagħna personali, billi nersqu iktar spiss u b’iktar qima u mħabba lejn dan is-Sagrament, imma b’mod speċjali billi nħalluh jibdilna f’insara tassew, mhux biss f’dawk il-mumenti li nkunu l-knisja imma tul ħajjitna kollha.

Fl-isfond ta’ l-istampa ta’ hawn fuq jidher il-Papa San Piju X, li kien huwa li naqqas l-eta ta’ l-Ewwel Tqarbina minn 12 jew 14-il sena kif kienet sa zmienu għal 6 jew 7 snin, meta t-tfal ikunu daħlu fl-użu tar-raġuni.