Il-Papa dwar id-dritt tat-tfal li jkollhom ġenituri miżżewġa

Vatikan: Il-Papa Benedittu XVI qal li t-tfal għandhom id-dritt li jkollhom ġenituri miżżewġa. Meta kien qed jindrizza lill-parteċipanti ta’ konferenza tal-presidenti tal-Kummissjonijiet Episkopali ta’ l-Amerika Latina  għall-familja u għall-ħajja, rispettivament, Benedittu XVI qal li t-tfal għandhom dritt li jitwieldu u jitrabbew fi ħdan familja mwaqqfa fuq iż-żwieġ.

Fil-kungress organiżżat mill-Kunsill Pontifiċju għall-familja, il-Kap tal-Kattoliċi ma naqasx ukoll milli jistieden lill-komunita ekkleżjali sabiex tippreżenta bl-almu kollu tagħha r-rikkezza tal-valur straordinarju taż-żwieġ, li bħala istituzzjoni naturali huwa patrimonju ta’ l-umanità.

Minn Karl Wright, RTK

Il-Presepju ta' Manweli

Tarxien: Ta' kull sena Emanuel Axiaq itella presepju ferm artistiku u kbir fil-garaxx tiegħu f'Ħal Tarxien. Dan il-presepju li fih medda ta' 165 pied kwadru hu maħdum kollu mill-ġablo, ġibs u kolla.
B'esperjenza ta’ 40 sena fil-qasam tal-presepji, din is-sena Manuel irnexxielu joħloq xeni ferm oriġinali li jolqtu l-għajn ta' kull min iżur dan il-presepju. Il-pasturi, li b'kreativita' ħoloq b'idejh dan l-artist, ikomplu jżejnu b'armonija dan il-presepju. hu ċertament presepju ta' kalibru, li l-artist kapaċi joħloq b'tant interess u dedikazzjoni. Għalhekk ta' kull sena, mijiet ta' delettanti u saħansitra turisti, jżommu l-appuntament tagħhom mal-presepju ta' Ħal Tarxien.
 Il-presepju li jinsab f' Għimmanu-EL, Triq Karlu Maratta, Ħal Tarxien, ikun miftuħ mis-16 ta’ Diċembru sat-3 ta’ Jannar.  Il-ħin tal-wiri huwa kuljum mill-5:00 p.m. sat- 8:00 p.m.  Fil-Ħdud u festi jkun miftuħ mill-10:00 a.m. sa 12:00a.m. u mit-3:00p.m. sat- 8:00p.m.

Ara aktar ritratt tal-presepju...

Website Kattolika Ġdida

USA: Il-konferenza ta’ l-isqfijiet Amerikani nediet sit ġdid ta’ l-internet li joffri bosta riżorsi ġodda.

Id-direttur eżekuttiv Paul Henderson qal li s-sit il-ġdid jagħti lill-klienti tiegħu, inkluż mexxejja ta’ parroċċi, isqfijiet u ovvjament saċerdoti oħra iċ-ċans u l-opportunita li jikkuntattjaw lill-konferenza episkopali bil-ħtiġijiet tagħhom. Is-sit il-ġdid ta’ l-internet, http://www.usccbpublishing.org jinkludi dokumenti li jistgħu jitniżżlu u materjal ieħor aċċessibbli għal kulħadd. Is-sit jippermetti wkoll aċċess għal sit oħra bħal dak li jġib it-test sħiħ tal-Bibbja l-ġdida Amerikana u l-Katekiżmu tal-Knisja Kattolika. Permezz tass-it wieħed se jkun jista’ wkoll jordna materjal u riżorsi sabiex jixtrihom direttament permezz ta’ l-internet.

Minn Karl wright, RTK.