Hames Hadd tal-Ghid

L-EWWEL QARI

Atti 1:1-11

Fl-ewwel kitba tiegħi, O Teofilu, tkellimt fuq dak kollu li Ġesù kien għamel u għallem mill-bidu sal-jum li fih kien meħud fis-sema, wara li bl-Ispirtu s-Santu wissa lill-appostli li hu kien għażel. Lil dawn hu deher ħaj wara mewtu b’xhieda sħiħa għalih innifsu, billi dehrilhom għal erbgħin jum u kellimhom fuq is-Saltna ta’ Alla. Waqt li kien magħhom, qalilhom biex ma jitilqux minn Ġerusalemm, imma joqogħdu jistennew isseħħ il-wegħda tal-Missier. “Fuq din,” qalilhom, “smajtuni nkellimkom: li Ġwanni għammed bl-ilma, imma intom titgħammdu bl-Ispirtu s-Santu fi ftit jiem oħra.”

Għalhekk, xħin kienu flimkien, staqsewh, “Mulej, hu dan iż-żmien li fih int se terġa’ twaqqaf is-saltna ta’ Israel?” Hu weġibhom: “Mhix biċċa tagħkom li tkunu tafu l-jiem u ż-żmien li l-Missier żamm fis-setgħa tiegħu. Imma intom tiksbu qawwa, meta jiġi fuqkom l-Ispirtu s-Santu. U tkunu xhieda tiegħi f’Ġerusalemm, fil-Lhudija kollha u s-Samarija, u sa truf l-art.”

Wara li qal dan, kien meħud ’il fuq waqt li huma kienu jħarsu lejh, u sħaba ħadithulhom minn quddiem għajnejhom. Hu u tiela’ ’l fuq huma kienu jħarsu b’għajnejhom iċċassati lejn is-sema, meta f’daqqa waħda ġew ħdejhom żewġt irġiel bi lbies abjad, li qalulhom: “Irġiel tal-Galilija, x’intom tħarsu lejn is-sema? Dan Ġesù, li ttieħed minn magħkom lejn is-sema, hekk għad jerġa’ jiġi kif rajtuh sejjer.”

SALM RESPONSORJALI

Salm 46

Tela’ l-Mulej b’għajat ta’ ferħ.

Ċapċpu idejkom, intom ġnus kollha,

ifirħu b’Alla, għajtu u għollu leħinkom!

Għax il-Mulej, il-Għoli, hu tal-biża’,

hu Sultan kbir fuq l-art kollha. R/.

Tela’ l-Mulej b’għajat ta’ ferħ,

il-Mulej bid-daqq tat-trombi.

Għannu lill-Mulej, għannu,

għannu lis-Sultan tagħna, għannu! R/.

Għax hu s-Sultan ta’ l-art kollha:

għannu bis-sengħa lil Alla!

Isaltan Alla fuq il-ġnus kollha,

Alla qiegħed fuq it-tron imqaddes tiegħu.R/.

IT-TIENI QARI

Efesin 1:17-23

Ħuti: Alla ta’ Sidna Ġesù Kristu, il-Missier tal-glorja, jagħtikom spirtu ta’ għerf u rivelazzjoni biex tagħarfuh, u jdawlilkom il-għajnejn ta’ qalbkom biex tagħarfu x’inhi t-tama tas-sejħa tagħkom, x’inhu l-għana tal-glorja tal-wirt tiegħu mal-qaddisin, u x’inhu l-kobor bla qjies tas-setgħa tiegħu fina li emminna, skond il-ħila tal-qawwa kbira tiegħu li wera fi Kristu, meta qajmu mill-imwiet u qiegħdu fil-lemin tiegħu fis-smewwiet, ’il fuq minn kull Saltna u Setgħa, minn kull Qawwa u Ħakma, ’il fuq minn kull isem li jissemma, mhux biss għaż-żmien ta’ issa, imma wkoll għalli ġej.

U hu qiegħed kollox taħt riġlejh, u għamlu Ras fuq il-Knisja kollha, li hi l-Ġisem tiegħu, il-Milja ta’ dak li jimla kollox f’kollox.

Hallelujah. Halleluljah.

Morru għallmu l-Ġnus kollha, jgħid il-Mulej;

jiena magħkom dejjem, sa l-aħħar taż-żmien.

Hallelujah.

L-EVANĠELJU

Mattew 28:19-20

F’dak iż-żmien: il-Ħdax-il dixxiplu telqu lejn il-Galilija u marru fuq il-muntanja fejn kien ordnalhom Ġesù. Kif rawh, inxteħtu quddiemu; imma xi wħud iddubitaw.

Ġesù resaq ikellimhom u qalilhom: “Lili ngħatat kull setgħa fis-sema u fl-art. Morru, mela, għallmu l-ġnus kollha, u għammduhom fl-Isem tal-Missier u ta’ l-Iben u ta’ l-Ispirtu s-Santu, u għallmuhom iħarsu dak kollu li ordnajtilkom jien. U ara, jiena magħkom dejjem, sa l-aħħar taż-żmien.”

ĦSIBIJIET MILL-EVANĠELJU

Nistgħu ngħidu li l-qari tal-lum iffakkarna f’numru ta’ siltiet oħra li jħabbru dan il-mument....

Ġesù, li kien ġie minn għand Alla u kienn sejjer għand Alla... (Ġw 13:3)

Sejjer inħejjilkom post fejn toqgħodu. (Ġw 14:2)

Min jemmen fija, hu wkoll għad jagħmel l-opri li qed nagħmel jien, u akbar minnhom għad jagħmel, għax jien sejjer għand il-Missier. (Ġw 14:12)

Ma nħallikomx iltiema. (Ġw 14:18)

Kieku kontu tħobbuni, kontu tifirħu li sejjer għand il-Missier. (Ġw 14:28)

Meta jiġi d-Difensur li se nibgħatilkom mingħand il-Missier... (Ġw 15:26)

Il-Ħdax-il dixxiplu ..... kif raw lil Ġesù, inxteħtu quddiemu; imma xi wħud iddubitaw.

Fid-dubji tiegħi spiss inġib quddiem għajnejja dan il-vers u nagħmel kuraġġ għaliex jekk l-appostli, wara tliet snin jiġru ma’ Ġesù kien fadlilhom id-dubji tagħhom, kemm aktar jien?

Ġesù resaq ikellimhom...

Kultant ngħir għalihom. Kemm kienu iffurtunati l-appostli ngħid bejni u bejn ruħi. Ġesù nnifsu jitkellem magħhom. Imma forsi lili u lilek mhux ukoll ikellimna? Qatt smajtu jkellmek? Forsi l-istorbju ta’ madwarek, u dak ta’ ġo fik ma ħallewkx tisimgħu. Erġa pprova. Ibqa pprova u tara kif tisimgħu.

U ara, jiena magħkom dejjem, sa l-aħħar taż-żmien.

Magħna? Dejjem? Sa l-aħħar? Anke miegħi? Imma jiena ma narahx! Fejnu?

Mulej, jekk inti miegħi, jiena għaliex mhux qed narak? Nitolbok iftaħli għajnejja ħalli jiena wkoll nibda narak. Jiena wkoll nintebah li inti miegħi – dejjem u sa l-aħħar taż-żmien.