HALLELUJAH

Hallelujah.  Hallelujah.

Il-Ħaruf tal-Għid tagħna,

li hu Kristu, hu maqtul:

nagħmlu mela festa fil-Mulej.

Hallelujah.

Kien l-ewwel jum tal-ġimgħa, filgħodu kmieni kif kien għadu d-dlam, u Marjam ta’ Magdala ġiet ħdejn il-qabar u rat il-blata mneħħija mill-qabar.  Għalhekk telqet tiġri għand Xmun Pietru u għand id-dixxiplu l-ieħor il-maħbub ta’ Ġesù , u qaltilhom: “Qalgħu l-Mulej mill-qabar, u ma nafux fejn qegħduh.”

Pietru u d-dixxiplu l-ieħor ħarġu u ġew ħdejn il-qabar.  It-tnejn ġrew flimkien, imma d-dixxiplu l-ieħor ħaffef aktar minn Pietru, u laħaq qablu ħdejn il-qabar.  Tbaxxa, u ra l-faxex tal-għażel mixħutin hemm, iżda ma daħalx.  Imbagħad wasal warajh Xmun Pietru, daħal fil-qabar, u ra l-faxex tal-għażel mixħutin, u l-maktur li kien madwar rasu; dan ma kienx mal-faxex, imma mgeżwer u mixħut għalih.

Imbagħad id-dixxiplu l-ieħor, li kien wasal l-ewwel ħdejn il-qabar, daħal wkoll, ra, u emmen.

Sa dak in-nhar kienu għadhom ma fehmux l-Iskrittura li kienet tgħid li kellu jqum mill-imwiet.

Fil-Quddiesa ta’ filgħaxija ta’ llum jista’ jinqara l-Evanġelju li ġej.....

Lq 24, 13-35

Dak in-nhar stess fl-ewwel jum tal-ġimgħa tnejn mid-dixxipli kienu sejrin lejn raħal jismu Għemmaws, sittin stadju ’l bogħod minn Ġerusalemm, jitħaddtu bejniethom fuq kulma kien ġara.  Huma u jitħaddtu u jistaqsu ’l xulxin, Ġesù nnifsu resaq lejhom u baqa’ miexi magħhom.  Imma għajnejhom kellhom xi jżommhom u ma setgħux jagħrfuh.

U hu qalilhom: “X’intom titħaddtu bejnietkom intom u mexjin?”  U huma waqfu, b’ħarsa ta’ niket fuqhom.  Imbagħad wieħed minnhom, jismu Kleofa, wieġeb u qallu: “Int waħdek f’Ġerusalemm il-barrani li ma tafx x’ġara hemmhekk f’dawn il-jiem?”

“X’ġara?” staqsiehom.  Qalulu: “Fuq Ġesù ta’ Nażaret, li kien profeta, setgħan fl-għemil u fil-kliem quddiem Alla u quddiem il-poplu kollu, kif il-qassisin il-kbar u l-kapijiet tagħna tawh biex ikun ikkundannat għall-mewt u sallbuh.  Aħna konna nittamaw li hu kien dak li kellu jifdi lil Israel; iżda mbagħad fuq kollox, ġa għaddew tliet ijiem fuq din il-ġrajja!  Issa wkoll xi wħud min-nisa tagħna ħasduna, għax marru kmieni ħdejn il-qabar u l-ġisem tiegħu ma sabuhx, u ġew jgħidu wkoll li dehrulhom xi anġli li qalulhom li hu ħaj.  Imbagħad marru ħdejn il-qabar xi wħud minn tagħna u sabu kollox kif kienu qalu n-nisa, imma lilu ma rawhx!”

Imbagħad qalilhom Ġesù: “Kemm intom bla għaqal u moħħkom tqil biex temmnu dak kollu li qalu l-profeti!  U ma kellux il-Messija jgħaddi minn dawn il-ħwejjeġ u hekk jidħol fil-glorja tiegħu?”  U beda minn Mosè u l-profeti kollha ifissrilhom kull ma kien hemm fuqu fl-Iskrittura.

Meta qorbu ħdejn ir-raħal fejn kienu sejrin, hu għamel tabirruħu li se jibqa’ sejjer ’il bogħod.  Iżda huma riedu jżommuh u qalulu: “Ibqa’ magħna, għax issa sar ħafna ħin u l-jum ġa wasal biex jispiċċa.”  Imbagħad daħal joqgħod magħhom.

U waqt li kien fil-mejda magħhom, qabad il-ħobż, qasmu u tahulhom.  Għajnejhom imbagħad infetħulhom u għarfuh, iżda hu kien għab minn quddiemhom.  U wieħed lill-ieħor bdew jgħidu: “Ma kinetx imħeġġa qalbna ġewwa fina waqt li kien qiegħed ikellimna fit-triq u jfissrilna l-Iskrittura?”

Dak il-ħin stess qamu u reġgħu lura Ġerusalemm.  Hemm sabu l-Ħdax u ’l sħabhom miġburin flimkien, u dawn qalulhom: “Il-Mulej qam tassew, u deher lil Xmun!”

U huma wkoll tarrfulhom x’kien ġralhom fit-triq u kif għarfuh fil-qsim tal-ħobż.

Kien l-ewwel jum tal-ġimgħa, filgħodu kmieni kif kien għadu d-dlam....

L-Evangelista Ġwanni, tul l-evanġelju tiegħu joħloq analoġija interessanti bejn ir-rakkont li jatgħti u l-jiem tal-ħolqien hekk kif rakkontati fil-Ġenesi.   “Fil-bidu Alla ħalaq is-sema u l-art u kienet l-art taħwid u baħħ; u d-dlam kien fuq wiċċ l-abbissi..... U Alla qal: ‘Ħa jkun id-dawl.’ U dawl sar.... u dalam u sebaħ – L-ewwl jum.” (Ġen 1:1-2)

Anke hawn Ġwanni jerġa jfakkarna li kien id-dlam, l-istess kif qalilna li kien id-dlam f’dak il-ħin meta Ġuda ħareġ miċ-ċenaklu biex jagħti bidu għall-ġrajja tal-passjoni. (Ġw 13:30).  Donnu l-Evanġelista jrid jurina li minn dak il-mument sa issa, tul il-ġrajja kollha tal-passjoni u l-mewt ta’ l-Imgħallem, kien mument ta’ dlam.  Kien bil-lejl. Imma issa, f’dan l-ewwel jum ta’ ġimgħa ġdida, sebaħ jum ġdid, it-tmien jum, il-jum li fih Kristu, li huwa l-veru dawl tagħna qam glorjuż u rebbieħ fuq il-mewt u fuq il-ħażin.

“Qalgħu l-Mulej mill-qabar, u ma nafux fejn qegħduh.”

Min? U għalfejn?   Huwa ġisem mejjet, imfarrak u flaġġellat għandu bżonnu xi ħadd?  Imma Ġesù m’għadux iktar mejjet.  Huwa ħaj.  M’għandu bżonn lil ħadd biex jaqilgħu mill-qabar.  Kien huwa stess li ħareġ rebbieħ u glorjuż.

Pietru u d-dixxiplu l-ieħor ġrew flimkien, imma d-dixxiplu l-ieħor ħaffef aktar minn Pietru, u laħaq qablu ħdejn il-qabar.  Tbaxxa, u ra l-faxex tal-għażel mixħutin hemm, iżda ma daħalx. 

Fil-mixja tal-fidi mhux kollha nimxu bl-istess pass.  Ikun hemm min iħaffef aktar mill-ieħor.  Imma għax aħna Knisja, mhux individwi mexin kulħadd għal rasu, irridu nistennew lil xulxin ħalli nwieżnu lil xulxin u hekk l-aħħar pass nagħmluh flimkien.

Imbagħad wasal warajh Xmun Pietru, daħal fil-qabar, u ra l-faxex tal-għażel mixħutin, u l-maktur li kien madwar rasu; dan ma kienx mal-faxex, imma mgeżwer u mixħut għalih.

Min jaf x’fissret għal Pietru dik id-daħla tiegħu fil-qabar ta’ Kristu ftit siegħat wara li kien ċaħdu u ħalef li ma jafux?  Min jaf x’ħass f’qalbu?  Xi ħsibijiet ġew f’moħħu, l-aktar meta lemaħ il-qabar vojt?   

U jekk tassew kien kif ħasbu n-nisa, li “qalgħu l-Mulej mill-qabar, u ma nafux fejn qegħduh”, allura kif tispjega il-faxex u l-maktur li kien imkeffen fihom.   Min hu dan li qabel jisraq ġisem mejjet, joqgħod ineħħilu minn fuqu il-kefen tiegħu?

Imbagħad id-dixxiplu l-ieħor, li kien wasal l-ewwel ħdejn il-qabar, daħal wkoll, ra, u emmen.

Ra u emmen!  X’ra?  Qabar vojt? il-faxex mixħuta fil-ġenb?  Kemm drabi il-Mulej jagħtina sinjali biex jgħina nsaħħu l-fidi tagħna u aħna bil-kemm nintebħu bihom!   Kemm sinjali madwarna juruna bil-kobor tal-għemejjel ta’ Alla! 

Imma minkejja kollox ....

Sa dak in-nhar kienu għadhom ma fehmux l-Iskrittura li kienet tgħid li kellu jqum mill-imwiet.

Bir-raġun...  għax l-Ispirtu s-Santu kienu għadhom ma rċevewh.  Kellu jkun l-Ispirtu s-Santu li kif qalilhom Ġesù, “Meta jiġi hu, l-Ispirtu tal-verità, iwassalkom għal verità kollha.” (Ġw 16:13)