“SALVAW LIT-TARBIJA!”

“L-imħabba hi l-isbaħ sentiment li Alla ħawwel fir-ruħ tar-raġel u l-mara”

Jikteb Harry Agius Ordway.

(Meħud mir-rivista FLIMKIEN)

Din is-sentenza meħuda minn ittra li Gianna Beretta Molla kienet kitbet lill-għarus tagħha Pietro – li aktar tard sar żewġha – ġiet ikkwotata mill-Papa Ġwanni Pawlu II dakinhar li ddikjarha qaddisa fis- 16 ta’ Mejju 2004.

U għaliex, mara miżżewġa li għexet ħajjitha bl-aktar mod normali, saret qaddisa?

Għaliex mhux biss mietet b’eroiżmu kbir imma wkoll għexet u baqgħet fidila lejn il-wegħda li tat dakinhar taż-żwieġ tagħha. Is-sagrifiċċju kbir li bih tat ħajjitha huwa xhieda li dawk biss li għandhom il-kuraġġ li jagħtu lilhom infushom totalment lil Alla u lill-oħrajn, jistgħu jaslu biex jirrealizzaw bl-aktar mod sħiħ lilhom infushom.

Gianna Beretta twieldet f’Magenta, qrib Milan, fl- 4 ta’ Ottubru, 1922. Minn meta kienet żgħira għexet ir-rigal tal-fidi kbira li kellha, xhieda tat-trobbija Nisranija li kisbet mingħand il-ġenituri tagħħa. B’riżultat ta’ dan, Gianna kienet tħares lejn il-ħajja bħala rigal meraviljuż minn Alla. Hija kellha fidi qawwija

fil-providenza u kienet aktar minn ċerta mill-bżonn tat-talb u l-effett tiegħu.

Għalkemm matul is-snin tagħha fis-sekondarja u l-Università ħadet b’serjetà kbira l-istudju tagħha hija baqgħet tagħti sehemha fix-xogħol maż-żgħażagħ ta’ l-Azzjoni Kattolika. Barra dan, bħala membru fis-Soċjetà ta’ San Vinċenz de Paule, Gianna kienet tgħin lill-anzjani u lil dawk fil-bżonn. Wara li ggradwat bħala tabiba u kirurga mill-Università ta’ Pavia fl- 1949, hija fetħet klinika f’Mesero, qrib Magenta. Speċjalizzat fil-Pedjatrija fl-Università ta’ Milan tliet snin wara b’attenzjoni speċjali lejn l-ommijiet, it-trabi, l-anzjani u l-fqar.

Xogħolha f’dan ikl-qasam tant ħaditu bħala missjoni li l-ħidma tagħha fl-Azzjoni Kattolika, l-aktar qalb iż-żgħar, żdiedet ħafna. Fl-istess waqt kienet tgawdi l-ħajja u l-ħolqien billi tiskijja u tixxabbat mal-muntanji. Fit-talb kienet irriflettiet u ħasset li l-vokazzjoni kienet dik li tiżżewweġ u tibni familja verament Nisranija.

Matul l-għerusija tagħha ma’ Pietro Molla tant kienet tħossha ferħana li ma kienx jgħaddi waqt li ma kenitx tirringrazzja ‘l Alla għal daqstant ferħ. Pietro u Gianna żżewġu fl- 24 ta’ Settembru, 1955 f’Magenta stess. F’Novembru ta’ wara welldet lil Pierluigi. Tfal oħra ġewhom f’perjodu qasir: f’Diċembru ta’ wara twieldet Mariolina u f’Lulju ta’ l- 1959 kellhom lil Laura. Gianna issa kienet tħossha tassew ferħana u li rrealizzat lilha nnifisha bl-aktar mod sħiħ.

Gianna rat kif għamlet kif taqdi d-dmirijiet tagħha bħala omm, flimkien ma’ dawk bħala mara miżżewġa u tabiba, bl-entużjażmu ta’ waħda li trid tgawdi kull mument li toffrilha l-ħajja.

F’Settembru ta’ l-1961, fit-tieni xahar tat-tqala tagħha, bdiet tbati minn uġigħ: kienet tfaċċat fibroma fl-utru u kellha bżonn ta’ operazzjoni. Imma peress li din l-operazzjoni setgħet twaqqaf it-tqala, Gianna insistiet mal-kirurgu biex isalva lit-tarbija li kellha fil-ġuf. Min-naħa tagħha afdat lilha nfisha fit-talb u fil-Providenza.

Il-ħajja Gianna kienet tħobbha, imma kienet tħobbha fl-aktar sens sħiħ tagħha. Hija rringrazzjat lill-Mulej li ħajjet it-tarbija kienet ġiet salvata. Matul is-seba’ xhur ta’ wara hija wriet kuraġġ kbir u baqgħet taqdi d-dmirijiet ta’ omm u ta’ tabiba qisu baqa’ għaddej kollox normali – għalkemm il-ħin kollu titlob lill-Mulej biex it-tarbija ma tgħaddi minn l-ebda tbatija meta jasal il-ħin li titwieled.

Ftit jiem qabel il-ħlas stqarret li kienet lesta tagħti ħajjitha għat-tarbija: “Jekk tiġu biex tagħżlu bejni u bejn t-tarbija, toqogħdux taħsbuha. NInsisti: salvaw it-tarbija! ”

Fl-għodwa tal- 21 ta’ April, 1962, twieldet Gianna Emanuela. Għalkemm sar aktar milli wieħed seta’ jagħmel biex jiġu salvati l-omm u t-tarbija, Gianna mietet sebat ijiem wara. Fl-aħħar jiem kienet il-ħin kollu tgħid: “Ġesù nħobbok. Ġesù nħobbok. “ Kien għad kellha biss 39 sena. Il-funeral tagħha kien okkażjoni ta’ qsim il-qalb profond imma fl-istess ħin ta’ fidi u ta’ talb.

Jalla aħna wkoll nerġgħu nsibu sens fis-safa, fil-kastità, u fis-sbuħija ta’ l-imħabba – hi x’inhi s-sejħa tagħna fil-ħajja.