IL-GWARDJI SVIZZERI

Minn Harry Agius Ordway

Matul dan l-aħħar xahar jew ftit aktar żgur li smajna u rajna aktar minn qatt qabel dak kollu li kien qed jiġri ġewwa l-Belt tal-Vatikan! U trid jew ma tridx xi wieħed jew aktar mill-Gwardji Svizzeri rajna żgur u dan minkejja l-fatt li qatt ma kienu protogonisti.

Intant, nhar il-Ġimgħa, 6 ta’ Mejju fil- 5.00 ta’ wara nofsinhar fil-bitha kbira, msemmija għal San Damaso, miksija b’madum sabiħ antik, li ddawwar il-Palazz Appostoliku, 31 rekluta ġdid ser jieħdu l-ġurament bħala Gwardji Svizzeri Pontifiċji quddiem membri tal-Kurja Rumana, rappreżentanti diplomatiċi, u awtoritajiet ċivili u reliġjużi mill-Isvizzera. Ħamsa u għoxrin minnhom ser jieħdu il-ġurament bil-Ġermaniż, erbgħa bil-Franċiż, wieħed bit-Taljan, u ieħor bir-Romanesk. Għal din iċ-ċelebrazzjoni, ibda mill-Kmandant sa l-iżgħar halberdier tal-110 membru tal-korp, ilkoll Gwardji Svizzeri, ser ikunu fl-aqwa dehra tagħhom.

Ta’ min jgħid li l-Gwardja Svizzera Pontifiċja twaqqfet mill-Papa Ġulju II fl- 1506 bħala korp li jiddependi direttament mis-Santa Sede, bid-dmir prinċipali tagħhom ikun li jiddefendu il-persuna tal-Papa u l-Palazzi Appostoliċi.

Nhar il-Ġimgħa, 6 ta’ Mejju, fis-7.30 ta’ filgħodu jkun hemm Quddiesa fil-Bażilka ta’ San Pietru għall-Gwardji Svizzeri u membri tal-familji tagħhom u ħbieb. Fid-9.00, l-Arċisqof Leonardo Sandri jqassam dekorazzjonijiet militari lill-membri tal-Korp, u l-Kmandant tal-gwardji jpoġġi girlanda tar-rand fuq il-monument li jfakkar il-gwardji mejta. Ta’ min jgħid li s-6 ta’ Mejju hu l-jum tal-ġurament għall-gwardji ġodda għaliex f’dak il-jum, fl-1527, 147 membru mill-189 Gwardji Svizzeri kienu tilfu ħajjithom waqt is-Sakkeġġ ta’ Ruma meta kienu qed jiddefendu lill-Papa Klement VII u lill-Knisja mill-qilla tat-truppi ta’

l-Imperatur Karlu V.

Intant il-Kappillan tal-Korp jaqra dan il-ġurament: “Jiena naħlef li fedelment, lealment, u onorabilment naqdi lill-Papa Benedittu XVI u lis-suċċessuri leġittimi tiegħu, u anki li niddedika lili nnifsi lilhom b’saħħti kollha, anki li nasal biex nissagrifika ruħi għalihom waqt li nkun qed niddefendihom. Jien nagħmel l-istess wegħda lill-Imqaddes Kulleġġ tal-Kardinali kull meta s-Sede jkun battal. Barra dan nwiegħed lill-Kmandant u lis-superjuri l-oħra tiegħi rispett, fedeltà, u ubbidjenza. Dan kollu naħlef! Nitlob ‘l Alla u lill-Padruni Qaddisa tiegħi jgħinnuni.”

Imbagħad kull rekluta jiġi msejjaħ b’ismu u, bl-ilsien tiegħu, jikkonferma l-ġurament. Il-qaddisin padruni tal-Gwardji Svizzeri Pontifiċji huma San Martin, San Bastjan, u San Niklaus von Flue, “difensur tal-paċi u missier il-Patrija.”

Tajjeb li ngħidulkom xi trid biex issir Gwardja Svizzeru: trid tkun Svizzeru Kattoliku ta’ taħt it-30 sena, għażeb, itwal minn 174ċentimetru (5piedi u 8pulzieri), b’diploma professjonali jew bi grad sekondarju jew xi grad ieħor tali.Trid tkun ukoll għaddejt kors fl-iskola Militari Svizzera. Dawn il-gwardji jgħixu ġewwa l-Belt tal-Vatikan u l-inqas servizz li jridu jagħtu hu ta’ sentejn.