|
|
L-EVANĠELJU
Mt. 5:
13 - 16 |
F’dak iż-żmien: Ġesύ qal lid-dixxipli tiegħu: “Intom il-melħ
ta’ l-art. Imma jekk il-melħ jaqta’, biex jerġa’ jieħu
l-imluħa tiegħu? Għal xejn iżjed ma hu tajjeb ħlief biex
jintrema barra u jintrifes min-nies.
Intom id-dawl tad-dinja. Ma tistax tkun moħbija l-belt li tkun
qiegħda fuq muntanja. Anqas ma jixegħlu musbieħ u jqegħduh
taħt il-kejl, iżda fuq l-imnara, ħa jdawwal lil min ikun
fid-dar.
Hekk
għandu jiddi d-dawl tagħkom quddiem il-bnedmin, biex jaraw
l-għemil tajjeb tagħkom, u jagħtu glorja lil Missierkom li hu
fis-smewwiet.
-
X’nifhmu meta ngħidu li n-nisrani għandu jkun il-melħ ta’
l-art u d-dawl tad-dinja? Id-dinja f’liema ħwejjeġ għandha
bżonn id-dawl u l-melħ tagħna l-insara?
-
X’għandna nagħmlu biex inkunu tabilħaqq melħ ta’ l-art u
dawl tad-dinja ta’ llum?
-
Bil-mod kif qegħdin ngħixu u naħdmu bħala individwi, bħala
parroċċi u bħala djoċesi, nistgħu ngħidu li qegħdin inkunu
tabilħaqq dawl ta’ Malta u tad-dinja? Jew xi drabi d-dawl
tagħna naħbuh ukoll taħt il-kejl? X’nistgħu nagħmlu aħjar?
Naħsbu u Niftakru
Ġesύ
huwa d-dawl veru li jdawwal kull bniedem (Ġw 1, 9).
Huwa x-xemx tielgħa, u jagħti d-dawl lil min jinsab
fid-dlamijiet u d-dell tal-mewt (Lq 1, 78-79). Kristu
idda fil-milja tad-dawl tiegħu dak in-nhar li rebaħ il-mewt u
huwa għalhekk li dak in-nhar ta’ Sibt il-Ġħid, iċ-ċelebrant
jixgħel il-blandun, igħollih u jurih quddiem kulħadd bħala
d-dawl ta’ Kristu. |
Fiċ-ċelebrazzjoni tal-magħmudija, f’isem it-tarbija tiegħu,
il-missier jixgħel xemgħa żgħira mill-blandun. Id-dawl
tal-blandun jgħaddi għand it-tarbija, għax kull min jitgħammed
jibda jieħu sehem mill-ħajja u mid-dawl ta’ Kristu. B’dan
id-dawl aħna nifhmu s-sens u l-iskop ta’ ħajjitna u
tal-ħolqien; nagħarfu xi jrid minna Alla f’kull waqt ta’
ħajjitna u nkunu xiehda ħajjin ta’ Kristu fost d-dlamijiet ta’
l-injoranza, tal-ħażen u tal-mewt.
Għalhekk in-nisrani li rċieva l-ħajja u d-dawl ta’ Kristu, ma
jistax iżomm dan id-dawl għalih innifsu, ma jistax iqiegħdu
taħt il-kejl ta’ xi kappella. Jeħtieġ li jqiegħdu fuq l-imnara
biex idawwal lil dawk kollha li jkunu fil-pjazez,
fil-fabbriki, fil-każini. Bħala l-melħ ta’ l-art, in-nisrani
ma jistax jibqa’ magħluq fl-armarju ta’ xi sagristija.
Jeħtieġ li jidħol fil-ħajja ta’ kull jum biex waqt li jħarisha
mit-taħsir, jagħtiha s-sens u t-togħma tagħha. Id-dawl li huwa
rċieva, in-nisrani għandu r-responsabbiltả li jwasslu
lill-oħrajn.
Għamlu kollox mingħajr tgemgim u mingħajr tlaqliq, ħalli tkunu
nies bla għajb u safja, ulied Alla bla tebgħa f’nofs bnedmin
ta’ ħajja mgħawġa u mħassra; fosthom intom għandkom tiddu
fid-dinja bħal kwiekeb u ddawlulhom il-kemma tal-ħajja
(Fil 2, 14-16).
Inkunu għalhekk il-melħ ta’ l-art u d-dawl tad-dinja, mhux
tant meta nibnu l-akbar knejjes, nagħmlu l-isbaħ armar, jew
norganizzaw l-itwal purċissjonijiet, daqskemm meta naqsmu
ħobżna ma’ min hu bil-ġuħ, indaħħlu f’darna lill-imsejkna bla
saqaf, inlibbsu lil min hu għarwien u n-nies ta’ darna ma
ninswehomx. Id-dawl tagħna jfeġġ bħaż-żerniq, mhux tant
bil-kliem sabiħ li ngħidu fuq l-imħabba tal-proxxmu daqskemm
bl-għemil u s-sagrifiċċji tagħna biex inxebbgħu lir-ruħ
imsejkna u biex inwarrbu minn nofsna l-moħqrija,
l-isfruttament ta’ kull xorta, l-abbuż tas-setgħa, u dak kollu
li jbaxxi d-dinjitả tal-bniedem. Jeħtieġ li l-bnedmin jaraw
l-għemil u mhux biss il-kliem sabiħ tagħna. |
