|
Iżda Pawlu qal liċ-ċenturjun u lis-suldati: “Jekk dawn ma
jibqgħux fuq il-ġifen, intom ma tistgħux issalvaw.”
Imbagħad is-suldati qaċċtu l-ħbula tad-dgħajsa u ħallewha tmur
għal riħha. Meta sar il-ħin biex jisbaħ, Pawlu qabad
iħajjarhom ilkoll biex jitrejqu b’xi ħaġa, u qalilhom: “Issa
ġa ilkom erbatax-il ġurnata tistennew sajmin u ma dduqu xejn.
Għalhekk inħajjarkom tieħdu xi ħaġa ta’ l-ikel, u jwetikom
f’saħħitkom, għax ħadd minnkom mhi se tintiliflu xagħara waħda
minn rasu.” Kif qal dan, qabad il-ħobż, radd il-ħajr ‘l
Alla quddiem kulħadd qasam u beda jiekol. Imbagħad
kulħadd għamel il-qalb u ħadu xi ħaġa ta’ l-ikel huma wkoll.
Konna b’kollox mitejn u sitta u sebgħin ruħ fuq il-ġifen.
Wara li xebgħu, bdew iħeffu l-ġifen u jwaddbu l-qamħ il-baħar.
Meta mbagħad sebaħ, l-art ma għarfuhiex, lemħu biss bajja bi
xtajta fiha, u qatgħuha li, jekk jista’ jkun, jitfgħu l-ġifen
fuqha. Irħew l-ankri u telquhom il-baħar, u ħallew ukoll
l-irbit tat-tmun. Imbagħad tellgħu l-qala tat-trinkett
għar-riħ u ħadu għax-xtajta. Iżda ħbatna ma’ sikka, li
kellha l-baħar miż-żewġ naħat. Il-pruwa baqgħet imwaħħla
sewwa fil-post u ma tħarrkitx iżjed, imma l-poppa bdiet
titfarrak bil-qilla tal-mewġ. Is-suldati riedu kieku
joqtlu l-priġunieri, li ma jaħrabx xi ħadd minnhom bil-għawm,
iżda ċ-ċenturjun, li ried isalva ‘l Pawlu, ma ħalliex il-ħsieb
tagħħom iseħħ. Lil dawk li kienu jafu jgħumu ordnalhom
jintefgħu huma l-ewwel il-baħar u jmorru l-art; lill-oħrajn
ordnalhom jilħqu x-xatt minn fuq twavel u minn fuq bċejjeċ
imkissra tal-ġifen. U hekk kulħadd qabad l-art qawwi u
sħiħ.
Meta ħlisna mill-għarqa, sirna nafu li l-gżira kien jisimha
Malta. In-nies tagħha ġiebu ruħħom magħna bi ħlewwa liema
bħalha. Laqgħuna tajjeb lilna lkoll u qabbdulna ħuġġieġa,
għax kienet bdiet nieżla x-xita u kien il-bard. Mela Pawlu
ġabar qatta zkuk niexfa u tefagħhom fin-nar. Fiz-zkuk kien
hemm lifgħa li mall ħasset is-sħana, ħarġet u qabdet ma’ id
Pawlu. In-nies tal-gżira, kif raw il-lifgħa mdendla ma’ idu,
bdew igħidu wieħed lill-ieħor: “Dar-raġel żgur xi qattiel,
għax għad li ħelisha mill-baħar, il-ġustizzja ma ħallitux
igħix!” Imma hu farfar il-lifgħa ġon-nar u ma ġralu xejn.
Huma stennew li se jarawh jintefaħ jew jaqa’ u jmut f’daqqa.
Wara li damu jistennew ħafna u raw li ma ġralu ebda deni,
biddlu l-ħsieb u bdew igħidu li kien xi Alla.
Hallelujah. Hallelujah.
Faħħru l-Mulej, ġnus kollha,
sebbħuh, popli kollha, għaliex qawwija hi l-grazzja tiegħu għalina:
il-fedelta` tal-Mulej tibqa’ għal dejjem.
Hallelujah.
F’dak iż-żmien, Ġesu` qal lill-Ħdax: “Morru fid-dinja kollha,
xandru l-Bxara t-tajba lill-ħolqien kollu. Min jemmen u
jitgħammed, isalva, iżda min ma jemminx, ikun ikkundannat. U
dawn huma l-mirakli li jsieħbu ‘l dawk li jemmnu: f’ismi
jkeċċu x-xjaten, jitkellmu b’ilsna ġodda, jaqbdu s-sriep
b’idejhom, u jekk jixorbu xi xorb li jġib il-mewt ma
jagħmlilhomx ħsara, iqiegħdu idejhom fuq il-morda u dawn ifiqu.”
U hekk il-Mulej Ġesu`, wara li kellimhom, kien imtella’
fis-sema u qagħad in-naħa tal-lemin ta’ Alla. Huma mbagħad
marru jippriedkaw kullimkienġ il-Mulej kien jaħdem magħhom u
jwettaq il-kelma bil-mirakli li kienu jsiru magħha. |
-
Il-miġja ta’ San pawl fostna, kif inħarsu lejha? Bħala
kumbinazzjoni?
-
Il-festa tan-nawfraġju ta’ San Pawl, sakemm li jibqagħalha
sena li niċċelebrawha f’Malta?
-
Fejn insibu l-qawwa tagħna, bħala Maltin, biex nigħixu
l-valuri nsara? Biex inkunu xiehda ta’ Kristu, x’għandna
nagħmlu fil-parroċċa tagħna?
Naħsbu u Niftakru
Il-ħajja tagħna hi sensiela ta’ ġrajjiet. Ħafna minnhom
fasslulna ħajjitna u ġraw barra mir-rieda tagħna. Dawk li ma
jemmnux f’Alla jsejħulhom kumbinazzjonijiet, destin, xorti.
Aħna li nemmnu ngħidu li ħarġu mill-imħabba ta’ Alla, li
dejjem tridilna l-ġid.
Illum qegħdin niċċelebraw il-festa tan-nawfraġru ta’ San pawl,
waħda mill-ġrajjiet li fasslitilna ħajjitna bħala Maltin.
Għalina li nemmnu, din il-ġrajja ma kienetx kumbinazzjoni,
iżda biċċa mill-pjan ta’ Alla li jsalva d-dinja, u għalhekk
lilna l-Maltin ukoll. Hekk tlabna fil-bidu tal-quddiesa:
O Alla, fil-provvidenza tiegħek
tal-għaġeb int għoġbok li l-Appostlu Missierna San pawl jara
l-għarqa biex jiġi fostna u jxandrilna l-fidi.
Hekk
Alla qiegħed is-seis tal-Knisja Maltija, skond il-kwalitajiet
speċjali tagħna bħala Maltin, għax il-fidi mhux biss ma
teqridx it-tajjeb li ssib fil-bniedem, iżda tkabbru, tqawwih u
ssebbħu; u dawn huma l-mirakli li
jsieħbu ‘l dawk li jemmnu.
Minn
dak iż-żmien aħna l-Maltin qtajna tifsila għalina, dik ta’
nsara, li għażlitna minn popli oħra tal-Mediterran. Minħabba
din il-għażla, id-deċiżjonijiet importanti li ħadna bħala
Maltin u li sawr l-ħajja Maltija kienu mnebbħa mill-persuna u
t-tagħlim ta’ Kristu. Għalhekk il-festa ta’ llum baqgħalha
sens jekk Kristu għadu jnebbaħna fid-deċiżjonijiet li nieħdu u
fit-tifsila tal-Hajja tagħna bħala komunitả nisranija, li hi
l-Knisja ta’ Malta.
Jixraq li nistaqsu lilna nnifisna: Il-valuri tagħna l-Maltin
ta’ llum għadhom imnebbħa mit-twemmin F’Alla? Meta l-qassisin
ixandru lil Alla, qegħdin iwassluh kif għallem fuqu Ġesù
Kristu, jeew qegħdin iwasslu xbiha ta’ Alla ieħor, maħluq
mill-interessi tal-bnedmin? Il-miżżewġin, fl-imħabba ta’
bejniethom u fir-rabta ma’ wliedhom, qegħdin jafdaw xortihom u
l- gejjieni tagħhom f’idejn Alla? Il-ħaddiema, ta’ liema
taqsima huma, jaraw ‘l Alla l-ħallieq, dak li fdalhom
f’idejhom it-tkattir tal-ħolqien permezz ta’ xogħolhom
għall-qadi ta’ ħtiġiet il-bniedem? Dawk li jaqdu lill-pajjiż
fil-qasam politiku, soċjali, ekonomiku, meta jiddeċiedu x’inhu
l-aħjar għall-poplu Malti, qegħdin jistmaw il-jeddijiet ta’
Alla? Dawn it-tweġib tagħna jsibu l-qofol tagħhom, jekk aħna,
il-Maltin insara, nagħtu l-ewwel post lil Alla fl-għażliet
tagħna ta’ kuljum.
Il-qawwa tagħna, biex ngħixu dawn il-valuri, bħala wlied San
pawl, insibuha fir-rabta li għandu jkollna ma’ Kristu, bħala
Knisja ta’ Malta magħquda mal-Knejjes imxerrdin mad-dinja,
mhux biss fil-fidi u fit-tama, iżda wkoll fl-imħabba. Din hi
karatteristika li San pawl faħħarna għaliha u hi l-qofol ta’
kull komunitả nisranija: In-nies tagħha ġiebu ruħhom bi
ħlewwa liema bħala. Laqgħuna tajjeb lilna lkoll. Din
l-imħabba, bħala Knisja ta’ Malta, irridu nuruha l-ewwelnett
lill-kap tagħha, l-isqof tad-djoċesi tagħna, billi naqsmu
miegħu r-responsabiltajiet li għnadu u nisimgħu il-kelma
tiegħu, kif ulied jisimgħu lil missierhom. Minn din l-imħabba
toħroġ il-għaqda bejn l-aħwa fil-fidi b’għażla speċjali ta’
dawk in-nies l-iżjed fil-bżonn: il-foqra, il-morda,
il-midimbin, l-imġarrbin u l-imwarrbin tas-soċjetả. Iżda,
minħabba li aħna l-insara rridu mnaqdu mhux biss lil niesna
iżda lid-dinja, l-imħabba tagħna trid tfeġġ bħala dawl fost
nies ta’ reliġjonijet oħra, fost dawk stess li jfittxuna biex
isallbuna.
B’hekk inkunu nilqgħu l-kmand ta’ Kristu, kif lqgħu Missierna
San Pawl u għamel minna l-Maltin saltna ta’ qassisin: Morru
fid-dinja kollha xandru l-xara t-ajaba lill-ħolqien kollu.
U nkunu xiehda ħajja ta’ Knisja nisranija ħajja li tagħtina
raġun li niċċelebraw il-festa tan-nawfraġju ta’ San Pawl.
|
