EMAIL

L-ewwel qal: “Sagrifiċċji u offerti, u vittmi maħruqa u vittmi għad-dnubiet, la ridthom u anqas għoġbuk”, għalkemm dawn titlobhom il-liġi; imbagħad qal: “Hawn jien, ġejt, biex nagħmel ir-rieda tiegħek.” B’hekk Alla neħħa s-sagrifiċċji ta’ l-ewwel, biex iqiegħed flokhom it-tieni. Bis-saħħa ta’ din ir-rieda aħna ġejna mqaddsin, permezz ta’ l-offerta tal-ġisem ta’ Ġesù Kristu magħmula darba għal dejjem.

Hallelujah, Hallelujah.

Il-Verb ħa l-ġisem u għammar fostna,

u aħna rajna s-sebħ tiegħu.

Hallelujah.

F’dak iż-żmien:  L-anġlu Gabriel kien mibgħut minn Alla f’belt tal-Galilija, jisimha Nażaret, għand xebba magħarrsa ma’ raġel jismu Ġużeppi, mid-dar ta’ David; u x-xebba kien jisimha Marija. Daħal għandha u qalilha: “Sliem għalik, mimlija bil-grazzja, il-Mulej miegħek.”

Għal dan il-kliem tħawdet, u bdiet titħasseb bejha u bejn ruħha x’setgħet tfisser dik it-tislima. Iżda l-anġlu qalilha: “Tibżax, Marija, għax int sibt grazzja quddiem Alla. Ara, inti se tnissel fi ħdanek u jkollok iben u ssemmih Ġesù. Hu jkun kbir, u jkun jissejjaħ Bin il-Għoli, u l-Mulej Alla jagħtih it-tron ta’ David missieru; u jsaltan fuq dar Ġakobb għal dejjem, u s-saltna tiegħu ma jkollhiex tmiem.”

Iżda Marija qalet lill-anġlu “Kif ikun dan, ladarba ma nagħrafx raġel?” Weġibha l-anġlu u qalilha: “L-Ispirtu s-Santu jiġi fuqek, u l-qawwa tal-Għoli tixħet id-dell tagħha fuqek; u għalhekk dak li jitwieled minnek ikun qaddis u jkun jissejjaħ Bin Alla. U ara, il-qariba tiegħek Eliżabetta, hija wkoll nisslet iben fi ħdanha, u dan għax għal Alla ma hemm xejn li ma jistax isir.” Imbagħad qalet Marija: “Hawn jien il-qaddejja tal-Mulej; ħa jsir minni skond kelmtek!”  U l-anġlu telaq minn ħdejha.

L-anġlu Gabriel kien mibgħut minn Alla f’belt tal-Galilija, jisimha Nażaret, għand xebba magħarrsa ma’ raġel jismu Ġużeppi, mid-dar ta’ David; u x-xebba kien jisimha Marija....

L-anġlu ma kiex mibgħut isib xi xebba, tkun min tkun, imma għand Marija, ix-xebba ta’ Nażaret, l-għarusa ta’ Ġużeppi.  Kull sejħa li jagħmel Alla hija dejjem waħda personali. Lili jagħmilli sejħa u lilek jagħmillek oħra.  Issejħilna b’isimna għaliex lilna jafna personalment u bid-dettalji kollha tagħna; aktar milli jafuna dawk ta’ madwarna.  Aktar milli jafuna il-familjari tagħna.  Aktar milli aħna stess nafu lilna nfusna.

“Sliem għalik, mimlija bil-grazzja, il-Mulej miegħek.” 

Forsi lili u lilek, mhux ukoll Alla jrid jimliena bil-grazzja?  Forsi aħna mhux ukoll għandna kulljum u f’kull ħin lill-Mulej magħna.  U għalhekk ikun jgħodd biss minni u minnewk jekk it-tislima ta’ l-anġlu lil Marija tkunx tgħodd għalina wkoll. Jiddependi minna jekk inkunux aħna wkoll mimlijin bil-grazzja.  Jiddependi minn jekk il-Mulej ikunx kontinwament magħna, jew aħjar, aħna miegħu.  Da parti tiegħu, anke lilna jrid jimliena bil-grazzja.  Anke magħna jixtieq ikun kontinwament.  Imma jiena u inti inħalluh kif ħallietu Marija?  Nagħtuh iċ-ċans li jaħdem fina kif ħadem fiha?  Li jinkarna f’ħajjitna kif inkarna f’Marija?

Għal dan il-kliem tħawdet....

Spiss nitħawdu aħna wkoll. Ninfixlu.  Imma anke lilna, jgħidilna. “Tibżgħux. għaliex intom ukoll sibtu grazzja quddiem Alla. Intom ukoll tistgħu tirċievu fikom kuljum lill-istess Iben ta’ Alla.  Dak l-istess wieħed li tnissel f’Marija.” 

Iżda dan ikun biss aħna wkoll inħallu lill-Ispirtu ta’ Alla jiġi fuqna. Jekk bħal Marija ngħidulu “Iva, jiena l-qaddej/qaddejja tal-Mulej.  Ħa jsir minni dak li jrid hu.”  Allura Hu jagħmel fina wkoll l-għeġubijiet tiegħu.  Imma spiss jiġri li minflok inħalluh jaħdem fina dak li jrid hu, inkunu rridu jagħmel dak li rridu aħna.  Forsi spiss, mhux hekk ikun it-talb tagħna?

U ara, il-qariba tiegħek, hija wkoll.....

U Alla qatt ma jħallina naħsbu biss għal rasna.  Lilna wkoll iddawrilna ħarsitna lejn il-qraba tagħna, għaliex hunma wkoll sabu l-grazzja tagħhom quddiem Alla.  Spiss forsi inkunu aħna li bla ma nindunaw inkunu imsejjħa minn Alla biex inwasslulhom il-grazzji ta’ Alla; kif bl-istess mod jiġri wkoll li ħafna drabi Alla jinqegħda bihom biex iwassal l-imħabba tiegħu lilna.

Lest bħal Marija, inkun jiena wkoll ta’ servizz għall-oħrajn?  Intbaħt li ma nista’ qatt nilqa’ lil Alla f’ħajti jekk ma nilqgħax ukoll lil ħuti u l-qraba tiegħi? Anzi, meta nservi lilhom inkun inservi lilu stess. Hekk biss nistgħu sinċerament intennu.

Jien il-qaddejja tal-Mulej.