XI TKUN L-UNITA' PASTORALI?

Fuq talba tas-Sinodu Djoċesan, il-parroċċi f’Malta inġabru f’sittax-il unità pastorali.  Kull unità tiġbor flimkien għadd ta’ parroċċi li jkunu fil-qrib. Fi Frar 2004, fil-Knisja f'Malta bdiet titwettaq ħidma mill-parroċċi flimkien miġburin f'dawn l-Unitajiet.

Imma qed iħallu xi effett?

Fost il-ħidmiet li diġa' twettqu jew li għad iridu jitwettqu, il-Perit Joe Magro, Delegat ta' Monsinjur Arċisqof għal-Lajċi, jsemmi...

• korsijiet għal-letturi, għall-katekisti, għall-adulti, għall-ministri straordinarji tat-tqarbin, u għall-persuni separati

• korsijiet dwar il-Bibbja, it-tagħlim soċjali tal-Knisja, id-djakonija, is-Sinodu u konferenzi dwar l-Ewkaristija

• ċelebrazzjonijiet bħal pellegrinaġġi ewkaristiċi flimkien bejn il-parroċċi fl-istess unità

• ħolqien ta' direttorju b'informazzjoni reliġjuża għall-parroċċi ta' l-unità

• kuntatti bejn il-kunsilli pastorali parrokkjali u l-kummissjonijiet, skambju dwar il-pjanijiet pastorali tal-parroċċi, stediniet għal attivitajiet ta' xulxin, laqgħat bejn s-saċerdoti u l-kappillani, qsim ta' informazzjoni dwar attivitajiet varji, diskussjoni dwar diffikultajiet li niltaqgħu magħhom fil-parroċċi

• laqgħat ta' talb bejn il-membri tal-kunsilli pastorali parrokkjali flimkien

• talb, irtiri, eżerċizzi u  ħidmiet pastorali oħra flimkien.

• attivitajiet oħra bħal: laqgħat dwar l-ambjent, wirjiet minn artisti lokali u taħditiet dwar l-Ikoni.

Din il-ħidma permezz ta' Unitajiet Pastorali hija esperjenza ġdida u għalhekk irridu nagħtuha ż-żmien biex tiżviluppa. Irridu wkoll nafdaw fl-Ispirtu Qaddis biex iwassalna għall-bidliet tal-qalb li neħtieġu biex nersqu aktar lejn xulxin.