WARA 89 SENA, IL-ĠRAJJA TA’ FATIMA GĦADA GĦADDEJJA
Il-Ġimgħa, 13 ta’ Ottubru huwa id-89 anniversarju
mid-dehra tal-Madonna ġewwa Fatima, fil-Portugal. Dakinhar folla ta’
aktar minn 70,000 persuna raw “Il-Miraklu tax-Xemx”.
Kien sitt xhur qabel, eżattament fit-13 ta’ Mejju 1917, fir-raħal ċkejken
ta’ Fatima, qrib Lisbona Portugall, meta
l-Madonna dehret lit-tlitt itfal Luċija, Franġisku u
Ġaċinta,
waqt li huma kienu qed jirgħu n-ngħaġ
fil-Cova da Iria.
Wara dakinhar, il-Madonna baqgħet tidher lil dawn
it-tfal fit-13 ta’ kull xahar sa Ottubru ta’ l-istess sena, meta
folla ta’ għexieren ta’ eluf ta’ nies raw ix-xemx tinqala minn
postha, iddur fuqha nfisha bħal rota kbira tan-nar u tinżel lejn
l-art. Imma l-istorja ta’ Fatima ma ntemmitx hemm. Hija storja li
għada sejra sal-lum.
Fl-okkażżjoni tat-89 anniversarju tad-dehriet tal-Madonna
ġewwa Fatima, qegħdin intellgħu ma’ din il-website, paġna oħra
permanenti bi stampi u r-rakkont ta’ din il-ġrajja strordinarja.
It-test huwa meħud mill-ktejjeb, Il-Ġrajja tal-Madonna
ta’ Fatima,
publikat bil-Malti mis-Soċjetá tad-Duttrina Nisranija (il-M.U.S.E.U.M.).
Il-ħajr tagħna lis-Soċjetá tal-permess biex inkun nistgħu nużaw dan
il-materjal fil-website tal-parroċca tagħna.
“Il-Ġrajja ta’ Fatima” b’ritratti meħuda
f’dawk il-jiem. >>
ISQFIJIET EWROPEJ JILTAQGĦU
FIR-RUSSJA
Għall-ewwel
darba fl-istorja, il-Kunsill tal-Konferenzi
ta’ l-Isqfijiet Ewropej (CCEE)
iltaqgħu bejn l-4 u t-8 ta’ Ottubru, f’San Pietruburgu, fir-Russja,
ġrajja li sa ftit snin ilu ħadd qatt ma kien biss joħlom li qatt
tista’ sseħħ. Magħhom kien hemm ukoll ir-rappreżentant tas-Santa
Sede.
Mons. Arcisqof Ġużeppi Mercieca attenda għal Assemblea Plenarja
tal-Kunsill li bħala tema prinċipali kellu riflessjoni fuq
is-servizzi tas-CCEE, li din is-sena jagħlaq 35 sena mill-bidu
tiegħu. Il-Presidenti ta’ l-34 Konferenza ta’ l-Isqfijiet membri
tal-Kunsill ħabirku biex jidentifikaw linji gwida għal azzjonijiet
futuri u evanġelizazzjoni mis-CCEE.
Fil-bidu tal-laqgħat tagħhom, l-Isqfijiet kellhom ukoll
l-opportunita’ li jisimgħu dwar is-sitwazzjoni tar-reliġjon ġewwa
l-Knisja fir-Russja u barra minnha, minn fomm rappreżentant
tal-Patrijarkat Ortodoss ta’ Moska u l-Isqof Kattoliku ta’ Moska.
