HUMA KIENU GĦADHOM MA FEHMUX.. .... U JIENA X’FHIMT?

Tliet personaġġi li fil-mixja li għamlu lejn il-qabar vojt, nilmħu l-mixja tagħhom lejn il-fidi.  Marija ta’ Magdala, l-Appostlu Xmun Pietru u d-Dixxipli l-Maħbub.  Bħal bosta oħrajn ta’ żmienhom, kienu għadhom ma fehmux li Ġesú mhux hemm.  Huwa qam.  Mela kif tfittxu lil min hu ħaj qalb il-mejtin? Mill-banda l-oħra hemm Marija, Omm Ġesú.  F’ħajtu kienet tiġri wara binha kull fejn mar.  Baqgħet miegħu sa l-aħħar nifs taħt is-Salib.  Imma issa, ħdejn il-qabar, mhix hawn!  Binħa mhux mejjet imma ħaj.  U dan hija tafu.  Dan hija emmnitu ferm qabel emmnuh u fehmuh l-oħrajn kollha ta’ madwaru.  Ara ftit ħsibijiet dwar l-Evanġelju tal-lum.

 

Jum il-Vokazzjonijiet 2006

"Ma tiskantax li, fejn hemm min jitlob bil-qalb, joktru l-vokazzjonijiet. Il-qdusija tal-Knisja tiddependi essenzjalment mill-għaqda ma’ Kristu u mill-ftuħ tal-qalb għall-grazzja li taħdem fil-qalb ta’ dawk li jemmnu. Għal dan il-għan irrid nistieden lill-insara kollha biex jieħdu ħsieb li jkollhom rabta intima ma’ Kristu, Mgħallem u Ragħaj tal-Poplu tiegħu, u jimitaw lil Marija, li baqgħet tgħozz f’qalbha dawn il-misteri divini u taħseb ħafna fuqhom."

Hekk kiteb il-Papa Benedittu XVI fil-messaġġ tiegħu għall- Ġurnata Dinjija ta’ Talb għall-vokazzjonijiet li din is-sena se tkun ċelebrata nhar il-Ħadd, 7 ta’ Mejju.  Huwa kompla jgħid li l-piz ta’ żewġ millennji ta’ snin jagħmilha iebsa biex wieħed jagħraf dak li hu ġdid fil-misteru tal-għaġeb li nkunu wlied Alla.  Iżda l-futur hu tassew tal-għaġeb: aħna msejħin biex ngħixu bħala aħwa ta’ Ġesu’ u li nħossu li aħna wlied l-istess Missier. Dan hu don li jirrivoluzjona kull ideja u pjan li hu biss uman.  (Ritratt mill-Catholic Press Photo to Ruma.)

Aqra l-messaġġ kollu tal-Papa Benedittu XVI

Tqarbin Solenni tal-Morda tal-Parroċca

Is-Sibt, 22 ta’ April, wara l-quddiesa ta’ filgħaxija, se jsir it-Tqarbin solenni tal-morda tal-parooċca kif soltu jsir għal żmien il-Għid. 

Għalkemm dak in-nhar mhux se jkun possibbli li jitqarbnu l-morda kollha, madankollu t-tqarbin tal-morda jsir b’mod regolari fid-djar tagħhom matul is-sena kollha.

F’dan il-ministeru jgħinu wkoll diversi Ministri straordinarji tat-tqarbin.

L-Ewkaristija hija waħda mill-ħoloq li tgħaqqad lil dawn ħutna, irtirati f’darhom minħabba nuqqas ta’ saħħa, mal-membri l-oħra tal-parroċċa.  Il-ħolqa l-oħra trid tkun bla dubju ta’ xejn, id-Djakonija – jiġifieri l-qadi li aħna lkoll noffru b’imħabba u b’ġustizzja lil dawn ħutna morda.