ĦARĠA SPEĊJALI TAL-FULJETT PARROKKJALI

Għadha kif ġiet publikata u qed tiġi mqassma l-ħarġa speċjali għal żmien il-festa, tar-rivista, Tarxien.  Minbarra l-kelma tal-Kappillan Dun Renè Vella u l-editorjal, hemm ukoll artiklu dwar il-Ħidma tal-Kumitat tal-Festa, siltiet mill-Omelija li l-Papa Benedittu XVI għamel fl-okkazzjoni tas-Solennità tat-Tħabbira tal-Mulej, artiklu tassew informattiv dwar l-Istatwa Titularu u l-Iskultur tagħha u diversi kitbiet oħra fosthom xi ħsibijiet miktuba apposta għat-tfal. Fil-qoxra hemm ritratt bil-kulur tal-pittura ta’ Filippo Lippia li juri t-Tħabbira ta’ Marija. 

Din il-publikazzjoni qed titqassam fid-djar kollha tal-parroċċa.

Konferenza dwar il-familja

Fis-sensiela ta’ laqgħat ta’ formazzjoni u informazzjoni fuq l-ittra appostolika Familiaris Consortio, il-Kummissjoni Djoċesana Familja, flimkien mal-kumitat imwaqqaf apposta biex ifakkar il-ħamsa u għoxrin anniversarju tal-pubblikazzjoni tal-ħsibijiet tal-Papa Ġwanni Pawlu II fuq il-familja, se tmexxi konferenza bit-tema, Għas-Servizz tal-Familja nhar is-Sibt, 20 ta’ Mejju, 2006 fis-sala ta’ l-iskola Santa Monica, Triq Maria Spinelli, Gżira. Il-konferenza tibda fis-6.00 ta’ fil-għaxija u tispiċċa biċ-ċelebrazzjoni tal-quddiesa fit-8.00 pm. Il-kelliem prinċipali se jkun Patri Ugo Cremona O.P. Kulħadd hu mistieden biex jattendi.