Mill-Kummissjoni Djoċesana Familja...

GRAZZI LIN-NANNIET KOLLHA

Fl-okkażjoni tal-festa ta’ Sant’Anna u San Ġwakkin (l-Erbgħa, 26 ta’ Lulju) il-Kummissjoni Djoċesana Familja tixtieq tiftakar fin-nanniet kollha u tirringrazzjahom għax-xogħol prezzjuż li qed jagħmlu kemm ma’ uliedhom kif ukoll ma’ ulied uliedhom. Fl-istess ħin, tħeġġeġ lin-nanniet biex ikomplu jgħaddu l-fidi u l-valuri tagħhom lill-familjari kif stednithom jagħmlu l-Ħames Laqgħa Mondjali tal-Familji li għadha kif saret f’Valenzja fi Spanja.

Il-Kummissjoni Djoċesana Familja tixtieq b’mod speċjali tirringrazzja lil dawk in-nanniet li qed jagħtu sehemhom fit-trobbija tan-neputijiet speċjalment f’dawk il-każi meta ż-żewġ ġenituri jaħdmu. Barra l-apprezzament li jistħoqqilhom, dawn in-nanniet għandhom jirċievu sostenn u għajnuna mis-soċjeta’.

Wasal iż-żmien li jibdew isiru korsijiet apposta għan-nanniet biex jgħinuhom fit-trobbija tan-neputijiet tagħhom. Dawn il-korsijiet għandhom ikunu ndirizzati lejn il-ġenituri u n-nanniet flimkien biex flimkien jitgħallmu jagħmlu l-għażliet u jiffaċċjaw il-problemi li t-trobbija tat-tfal tista’ ġġib magħha.

In-nanniet m’għandhom qatt ikunu sfruttati speċjalment mit-tfal tagħhom stess. Niftakru li mhux in-nanniet kollha għandhom l-enerġija biex jieħdu ħsieb għal sigħat twal it-tfal tat-tfal tagħhom. In-nanniet għandhom bżonn aktar minn qatt qabel il-ħin tal-mistrieħ tagħhom.